Stap Bisi Long Wok Blong Jeova
1 Hemia i wan blesing blong mekem wok blong Jeova. Taem yumi kasem stret save long God mo long Pikinini blong hem Jisas, lav i pusum yumi blong gohed moa blong mekem wok blong God. (Jon 17:3) Maet yumi save kam slak be Jeova i givim paoa long yumi blong yumi mekem wok ya.—Aes. 40:29.
2 ?Olsem wanem yumi save traehad blong soemaot tangkyu blong yumi long bigfala lav we Jeova God mo Jisas Kraes tufala i stap soemaot long yumi? (2 Kor. 5:14, 15) Faswan samting, yumi mas mekem olsem Jisas, hem i no les nating blong talemaot nem mo Kingdom blong Papa blong hem. (1 Pit. 2:21) Sipos yumi gat strong bilif, bambae yumi laef blong stap mekem wok we God i givim long yumi, hemia wok blong talemaot gud nyus.—Mat. 24:14.
3 ?Olsem wanem, yumi putum smol mak nomo long saed blong haoa we yumi kasem long wok blong prij? I tru, ol man oli gat ol defren samting we oli save blokem olgeta. Maet yumi no save mekem plante long wok ya from we yumi olfala, no yumi sik, no yumi gat responsabiliti long famle. Nating se i olsem, yumi evriwan i mas wok wetem olgeta hat blong yumi long wok blong Jeova. I min se yumi wanwan i mas soemaot se yumi ona fulwan long God, mo soemaot se yumi no gyaman taem yumi givim laef blong yumi long hem. Blong mekem olsemia, yumi mas stap traehad long wok blong prij. (2 Tim. 2:15) Yumi evriwan i gat jans blong mekem plante wok, nating se laef blong yumi i olsem wanem. ?Wanem wok ya we i stap?
4 Ol Rod Blong Mekem Moa Long Wok Blong Prij: Fastaem yumi mas gat intres blong mekem i gud moa long wok blong prij. Samting ya i save kamaot taem yumi stap wok moa blong yumi gat gudhan olsem wan tija. Wan long ol gudfala samting we i stap kamaot long Tiokratik Skul, i blong givhan long yumi blong yumi gat gudhan long wok blong prij. ?Taem yu stap mekem rere ol tok blong yu, yu stap tingbaot olsem wanem tok ya i laenap wetem wok blong prij? ?Yumi stap yusum ol advaes we yumi kasem blong yumi mekem i gud moa long wok blong prij? (sg Engglis/Franis, pej 96-99) Mo tu, long Miting Blong Kingdom Wok Blong Yumi, i gat plante tok we oli tokbaot wok blong prij. I gud yumi save yusum olgeta tok ya kwiktaem.
5 Narafala samting, tingbaot olsem wanem yu save jenisim sam samting long laef blong yu blong yu mekem haftaem no fultaem paenia. Sipos yu mekem olsem, bambae yu stap bisi long wok blong Papa blong yumi, Jeova. (1 Kor. 15:58) ?Olsem wanem sipos yu no save mekem wok blong paenia? Yu save soemaot tingting blong paenia, taem yu wok oltaem blong laekem wok blong prij mo yu stap tingbaot ol man long teritori blong yu. Yu save tekem olgeta jans tu we yu gat blong givhan long ol man blong save Jeova mo gudfala plan blong hem, taem yu stap mekem ol visit mo yu mekem ol Baebol stadi.
6 Mo tu blong soemaot se yu stap go moa maet yu save go long ples we i gat nid. (Aes. 6:8) Olgeta we oli stap go long wan narafala kongregesen from we kongregesen i nidim elda no i nidim moa man blong wokem gud teritori blong olgeta, oli kasem plante blesing.
7 Taem yumi lanem trutok fastaem, lav blong yumi long Jeova mo Jisas Kraes i pusum yumi blong mekem bigfala jenis long laef blong yumi. Naoia taem yumi stap frengud moa wetem Papa blong yumi long heven mo yumi kasem save moa long samting we Pikinini blong hem i mekem long yumi, ?olsem wanem, yumi save jenisim sam samting blong yumi save mekem moa long wok blong prij? I gud yumi evriwan i traehad blong stap bisi long wok blong Jeova.—Rom 12:11.