Wok Blong Paenia—Hem i Karem Bigfala Pei
1 Jeova i wantem se yumi harem gud mo luk ol gudfala samting from hadwok blong yumi. (Ekles. 5:18) Impoten wok blong yumi save joen long hem, hemia wok blong prij mo mekem disaepol. Pol i talem long Timote i se: “Yu mas mekem wok ya blong talemaot gud nyus blong Kraes, mo yu mas finisim olgeta wok ya we God i givim long yu blong mekem.” (2 Tim. 4:5) Hem i leftemap tingting blong Timote, mo ol tok ya blong Pol oli leftemap tingting blong yumi tu tede, blong yumi mekem wok blong prij wetem olgeta sol blong yumi. Sam man oli wok wetem olgeta sol blong olgeta taem oli mekem fultaem paenia. ?Olsem wanem, maet yu save prea mo tingbaot sipos ol bisnes blong laef blong yu oli letem yu blong mekem fultaem paenia wok?
2 Wok Wetem Stret Tingting: Blong mekem wok olsem paenia yumi mas tekem disisin we i laenap wetem prea blong yumi. Yumi mas mekem se yumi wantem tumas blong mekem wok blong Jeova, wetem fasin blong laekem tumas ol man. Mekem moa long wok blong prij, mekem ol visit mo ol Baebol stadi. Wokem wan plan, mo putum ol mak ya we yumi save kasem. Yumi save askem advaes long ol elda mo ol paenia. Yumi mas gohed blong mekem wok blong prij folem wan plan we yumi tingtinggud long hem fastaem. Yumi mas stretem yumi wanwan, yumi mas gat gudfala tingting, mo strong tingting blong yumi mekem wok ya. (1 Kor. 9:23, 25, 27)
3 Putum ol stret mak mo wok had blong kasem. Samting ya bambae i givhan long yumi blong gohed long wok blong prij mo yumi stap kam gud moa long fasin blong yumi blong prij. ?Olsem wanem, yumi save kamgud moa long ol fas tok blong yumi long doa no taem yumi mitim sam man we oli traem blokem toktok blong yumi? ?Olsem wanem, yumi stap yusum gud ol magasin mo ol buk we yumi gat? ?Olsem wanem, yumi gohed gud long stadi blong wan man? ?Olsem wanem, yumi save stat blong mekem haftaem paenia naoia wetem tingting blong mekem fultaem paenia biaen? Yumi mas putum ol mak we yumi save wok long olgeta mo yumi save kasem. Taem yumi kasem ol mak ya bambae wok blong yumi i save karem frut mo yumi save harem gud long hem.—1 Tim. 4:15, 16.
4 Laef We i Gat Pei Long Hem: Taem yumi mekem paenia wetem stret tingting mo yumi wantem kamgud moa long saed blong speret, wok ya bambae i givim plante blesing long yumi. Yumi stap dipen moa long Jeova. Yumi save gat gudhan blong yusum Tok blong God taem yumi yusum plante long wok blong prij. Taem yumi wok strong long wok blong prij samting ya i givhan long kongregesen, ol narafala pablisa oli wantem mekem moa long wok blong prij olsem yumi. Wok blong paenia i givhan long yumi blong luksave mining blong laef mo i blokem yumi long ol tingting blong wol, ol fasin blong wol, mo ol fren blong wol.
5 Jisas i talem long ol man blong hem: “Tru, i gat plante kakae tumas i stap long garen, be smol man nomo oli stap blong karem i go. Yufala i mas askem strong long masta blong garen ya, blong hem i sanem sam moa man oli kam blong karem ol kakae ya blong hem.” (Mat. 9:37, 38) Naoia i nidim sam moa man blong wok bitim long taem blong Jisas. Wok blong paenia i givhan long yumi blong yumi gat jans blong mekem moa long impoten wok ya, blong sevem laef blong ol man. I no gat wan narafala samting we i save mekem yumi glad mo harem gud bitim taem yumi yusum ful laef blong yumi blong mekem wok blong Hemia we i wokem yumi.—Prov. 10:22.