!Naoia i Taem Blong Prij!
1. ?From wanem naoia i taem blong prij?
1 “Yufala i mas ona gud long God, mo yufala i mas leftemap nem blong hem.” Ol enjel oli stap lidim wok blong talemaot tok ya long ol man “blong evri kala, mo kantri, mo laen, mo lanwis.” ?From wanem? “From we taem i kam finis blong [God] i jajem olgeta man.” Tede, yumi stap laef long ‘taem blong jajmen ya,’ we bambae i kasem en blong hem taem ol rabis fasin blong wol ya oli finis olgeta. I rili impoten blong ol man oli ‘bodaon long fes blong God blong mekem wosip long hem, from we hem i mekem skae mo wol mo solwota mo springwota.’ I no gat wan narafala wok we ol man oli mekem tede we i moa impoten i winim wok blong talemaot “gud nius ya we i blong stap oltaem nomo, gogo i no save finis.” !Yes, naoia i taem blong prij!—Rev. 14:6, 7.
2. ?Olsem wanem ol man blong Jeova oli soemaot we oli luksave se taem i sot?
2 Long ten yia we i pas, ol man blong Jeova oli spenem klosap 12 bilian aoa long wok blong talemaot Kingdom mo mekem disaepol. Plante oli jenisim sam samting long laef blong olgeta blong oli save spenem moa taem long wok ya blong hivimap ol kakae blong garen long saed blong spirit. (Mat. 9:37, 38) Olsem nao, las yia, bitim 850,000 pablisa oli mekem wok blong paenia evri manis. Long saed blong ol fultaem paenia, oli mas spenem 70 aoa evri manis long wok blong prij. Ol haftaem paenia oli mas mekem 50 aoa.
3. ?Wanem ol jenis we plante pablisa oli mekem blong oli save kam paenia?
3 ?Olsem Wanem Blong Mekem Wok Blong Paenia?: Ol paenia oli luksave se “yumi no gat plante taem i stap,” taswe oli traehad blong mekem we laef blong olgeta i no fasfas tumas. (1 Kor. 7:29, 31) Oli no pem plante tumas samting; mo from samting ya oli no nidim blong spenem plante taem long wok blong winim mane. Samfala oli muv i go long haos we i smol moa. Sam narafala oli salemaot sam sas samting blong olgeta we oli no nidim. (Mat. 6:19-21) Plante taem oli mas livim sam samting we olgeta nomo oli wantem mekem. Oli mekem olgeta samting ya from we oli wantem spenem moa taem long wok blong prij. (Efes. 5:15, 16) Plante pablisa we oli gohed nomo nating se oli fesem ol traem, mo we oli lego sam samting we olgeta nomo oli wantem, mo we oli dipen oltaem long Jeova tru long prea, oli naf blong wokem wan gudfala program we i mekem se oli save paenia.
4. ?Wanem ol samting we yu save mekem we oli save halpem yu blong kam wan paenia?
4 ?Yu yu save kam wan paenia? ?From wanem yu no askem long ol paenia we oli gohed gud, blong oli talem olsem wanem oli mekem wok ya? Yu save prij wetem olgeta, blong kasem sem glad we olgeta oli gat. Stadi long ol haf long ol magasin mo buk blong yumi we oli tokbaot wok blong paenia. Putum ol gudfala mak we oli save givhan long yu blong kam wan paenia. Sipos i gat sam samting we oli blokem yu naoia blong yu no save kam paenia, talemaot ol samting ya long Jeova long prea, mo askem long hem blong i halpem yu blong winim olgeta.—Prov. 16:3.
5. ?Olsem wanem wok blong paenia i givhan long yumi blong yumi gat gudhan long wok blong prij?
5 Ol Blesing Mo Glad: Wok blong paenia i mekem se yumi gat gudhan blong yusum Baebol, mo hemia i save karem bigfala glad long yumi. Wan yangfala paenia sista i talem se: “Taem yu yu naf blong yusumgud trutok blong Baebol, hemia wan trufala blesing. Long wok blong paenia, yu yusum Baebol oltaem. Naoia, taem mi prij long ol haos wanwan, mi save tingbaot ol vas we oli stret long wanwan man we mi faenem long ol haos ya.”—2 Tim. 2:15.
6. ?Olsem wanem wok blong paenia i trenem ol man?
6 Wok blong paenia i tijim yumi tu blong gat gudhan long plante wok mo fasin we yumi nidim long laef. Hem i save givhan long ol yangfala blong oli lanem olsem wanem blong yusum taem blong olgeta long waes fasin, olsem wanem blong yusum gud mane, mo olsem wanem blong fren gud wetem ol narafala. Plante we oli mekem wok blong paenia oli kam naf blong skelem ol samting olsem ol bigman long saed blong spirit. (Efes. 4:13) Antap moa, plante taem ol paenia oli gat nambawan janis ya blong luk paoa blong Jeova i givhan long laef blong olgeta mo i blesem olgeta.—Wok 11:21; Fil. 4:11-13.
7. ?Olsem wanem wok blong paenia i save givhan long yumi blong kam klosap long Jeova?
7 Ating wan long ol blesing we oli bigwan moa, hemia se wok blong paenia i givhan long yumi blong kam klosap moa long Jeova. Hemia i save givhan long yumi blong stanap strong tru long ol traem. Wan sista we i kasem hadtaem, i talem se: “Gudfala fasin fren wetem Jeova we mi mi wokem taem mi paenia, i givhan long mi blong stanap strong tru long hadtaem ya.” Hem i talem bakegen se: “Mi mi glad we mi yusum laef blong mi blong mekem wok blong Jeova fultaem. Hemia i givhan long mi blong yusum taem mo paoa blong mi long ol rod we mi no bin ting se mi save mekem.” (Wok 20:35) I gud we yumi tu yumi harem gud long ol rij blesing olsem; taem yumi mekem bes blong yumi long impoten wok ya blong prij.—Prov. 10:22.