?Yu Yu Save Pas Long ‘Doa We i Open Finis Blong Mekem Gudfala Wok’?
1. ?Wanem ‘doa blong mekem gudfala wok’ we i open long fored blong yumi?
1 Taem wan ‘doa we i open finis blong mekem gudfala wok’ i stap long fored blong aposol Pol, hem i glad blong tekem janis ya blong talemaot Kingdom, nating se plante man oli agens. (1 Kor. 16:9) Tede samwe long 642,000 pablisa long fulwol oli pas long doa ya finis blong mekem gudfala wok taem oli joen long wok blong fultaem paenia.
2. ?From wanem i gud we sam samtaem yumi jekemgud ol samting long laef blong yumi?
2 Sam Samting i Save Jenis Long Laef Blong Yumi: Maet naoia ol samting long laef blong yumi oli blokem yumi blong no mekem plante long wok blong prij. Be sam samting i save hapen blong mekem se laef blong yumi i jenis. From samting ya, i gud we sam samtaem yumi jekemgud ol samting long laef blong yumi. Yumi no mas wet se evri samting long laef blong yumi oli stretgud olgeta blong yumi mekem moa long wok blong prij. (Pri. 11:4) ?Olsem wanem? ?Yu yu wan yangfala we klosap nao bambae yu finis long hae skul? ?Yu yu wan papa no wan mama we pikinini blong yu i rere blong statem skul? ?Yu yu wan olfala we klosap nao yu ritae long wok? Ol jenis ya bambae i mekem se yu gat moa taem, mo yu save stat blong joen long wok blong fultaem paenia. Wan sista we i bin gat problem long helt blong hem i tekem desisen blong mekem wok blong paenia taem hem i gat 89 yia blong hem. ?From wanem? From we i bitim wan yia we hem i no moa go slip long hospital, nao hem i filim se helt blong hem i kam moagud mo hem i save mekem wok blong paenia.
3. ?Olsem wanem samfala oli jenisim sam samting long laef blong olgeta blong oli save mekem wok blong fultaem paenia?
3 Long saed blong Pol, fastaem hem i wantem visitim ol brata blong hem long Korin. Be biaen, hem i jenisim plan blong hem blong hem i save talemaot gud nius. Plante we oli stap mekem wok blong fultaem paenia tede, oli bin jenisim sam samting long laef blong olgeta blong oli save mekem wok ya. Samfala oli mekem we laef blong olgeta i isi nomo, nao oli no moa spenem plante mane ale oli wok haftaem nomo blong kasem ol samting we oli nidim. Olgeta ya oli glad tumas taem oli mekem nambawan wok ya. (1 Tim. 6:6-8) Sam brata sista we oli mared oli jenisim sam samting long laef blong olgeta blong mekem se wan long tufala nomo i wok, ale rod i open long narawan blong i paenia.
4. ?Yumi save mekem wanem taem yumi no suagud sipos yumi naf blong kasem aoa blong yumi?
4 Yu no mas hareap blong sakemaot tingting ya blong mekem wok blong paenia from we yu fraet se bambae yu no naf blong kasem ol aoa blong yu. I jes nidim blong yu prij smol moa i bitim tu aoa evri dei. Sipos yu no sua se bambae yu naf blong mekem wok ya no nogat, i gud yu traem blong mekem wok blong haftaem paenia long wan no tu manis mo yu traem blong kasem 70 aoa. Olsem nao, bambae yu save kasem glad we i kamaot from wok blong paenia. (Sam 34:8) Toktok wetem olgeta we oli stap mekem wok blong paenia naoia. Maet olgeta ya oli bin winim sam traem we oli sem mak long hemia blong yu. (Prov. 15:22) Askem long Jeova blong i blesem traehad blong yu blong mekem moa long wok blong prij.—1 Jon 5:14.
5. ?From wanem wok blong fultaem paenia i wan gudfala wok?
5 Wan Gudfala Wok: Wok blong fultaem paenia i karem plante blesing. Hem i save mekem we yu yu kasem bigfala glad taem we yu mekem moa blong givhan long ol narafala. (Wok 20:35) Wok blong paenia bambae i mekem se yu save gat gudhan blong yusum trutok blong Baebol long fasin we i stret. (2 Tim. 2:15) Bambae yu gat janis blong luk olsem wanem Jeova i givhan long yu. (Wok 11:21, NW; Fil. 4:11-13, NW ) Wok blong paenia bambae i givhan long yu tu blong wokem ol gudfala fasin we ol Kristin oli mas gat, olsem fasin blong stanap strong. Mo bambae i givhan long yu blong kam klosap moa long Jeova. (Jem. 4:8) ?Olsem wanem? ?Yu yu save pas long bigfala doa ya blong mekem gudfala wok mo kam wan fultaem paenia?