?Yu Yu Mekem Wok Blong Fultaem Paenia Bifo?
1. ?Wanem wok we plante man oli glad blong joen long hem, be samtaem samfala oli mas mekem wanem desisen?
1 Long ol yia bifo i kam, plante brata sista oli gat gudfala janis ya blong mekem wok blong fultaem paenia taem “oli stap tijim ol man, mo oli stap talemaot gud nius.” (Wok 5:42) Be from plante defdefren risen, samfala oli mas finis long wok ya. Sipos yu yu mekem wok blong fultaem paenia bifo, ?yu yu save skelem laef blong yu naoia blong luk sipos yu save joen bakegen long wok blong paenia?
2. ?From wanem olgeta we oli paenia bifo oli mas skelem laef blong olgeta naoia?
2 Laef i Jenis: Maet samting ya we i mekem se yu finis long wok blong paenia, i no moa blokem yu. Maet yu finis long wok ya from we yu no moa save kasem aoa blong fultaem paenia we hem i 90 aoa long wan manis. ?Olsem wanem? ?Yu ting se yu save statem wok ya bakegen naoia we aoa i kamdaon long 70? ?Wok blong yu blong winim mane mo ol wok blong yu long famle i no moa kakae taem blong yu naoia olsem bifo? Wan sista we i no moa mekem wok blong paenia from we hem i sik, i gohed bakegen taem hem i gat 89 yia blong hem. !Hem i luk se i bitim wan yia we hem i no go slip long hospital, ale hem i harem se hem i save statem wok blong paenia!
3. ?Ol memba blong famle oli save mekem wanem blong givhan long wan long olgeta blong i paenia?
3 Maet yu no mekem wok blong paenia bifo, be wan long famle blong yu i finis long wok blong paenia blong lukaot long wan memba blong famle, olsem papa no mama we i olfala. (1 Tim. 5:4, 8) Sipos i olsem, ?yu ting se maet yu no narafala long famle i save givhan long hemia we i finis long wok blong paenia? ?Yu ting se i gud we maet yufala i kam wanples mo tokbaot samting ya? (Prov. 15:22) Taem ol memba blong famle oli wok wanples blong mekem se wan long olgeta i save mekem wok blong fultaem paenia, evriwan oli save harem gud se oli mekem wan gudfala samting.
4. ?Bambae yu mekem wanem sipos yu no save mekem wok blong fultaem paenia naoia?
4 Tingting blong yu i no mas foldaon sipos laef blong yu naoia i no letem yu blong statem bakegen wok blong fultaem paenia. Fasin blong yu we yu wantem tumas blong mekem wok ya, i mekem Jehova i glad. (2 Kor. 8:12) Taem yu gohed blong prij, yu save yusum gudhan we yu kasem finis olsem wan paenia. I gud yu talemaot long Jehova samting ya we yu wantem tumas blong mekem, mo yu mas lukaot ol janis blong jenisim ol samting long laef blong yu. (1 Jon 5:14) !Maet long stret taem, Jehova bambae i mekem we wan ‘doa i open’ long yu blong yu save ‘mekem wan gudfala wok,’ ale yu save harem gud bakegen long wok blong fultaem paenia!—1 Kor. 16:9.