?Yu Save Joen Bakegen?

¹ Long ol faef yia we oli pas, sam fultaem paenia oli faenem se oli mas lego paenia wok. ?Yu yu wan long olgeta? Sipos yes, i gat risen from wanem yu lego nambawan wok ya. Maet wan samting i kamaot we yu no bin tingbaot, no yu no save mekem wan samting blong jenisim. ?Risen ya i stap yet? Sipos problem long helt, mane, no responsabiliti long famle i bin mekem yu yu stop, ?ol samting ya oli kamgud moa naoia? ?Yu save jenisim sam samting blong mekem se yu save haremgud long ol blesing blong fultaem paenia bakegen? ?Yu yu bin tingbaot blong fulumap pepa bakegen?

² Olsem yu save finis, i nidim gudfala plan mo program sipos yu wantem gohed long wok blong paenia. Nating se i no gat plante taem blong spel, smoltaem we wan paenia i spel long hem i save mekem hem i haremgud bigwan. (Prov. 19:17; Wok 20:35) Taem yu stap bisi long wok blong prij, samting ya i protektem yu long nogud fasin blong laef we ol man blong wol oli stap folem, blong lukaot ol samting we oli save haremgud long olgeta mo isi laef. Jeova i promes se Hem bambae i mekem yu yu rij long saed blong speret sipos yu gat speret blong sakrifaes mo putum Kingdom long fasples long laef blong yu. Bambae yu sua blong kasem trufala glad mo haremgud taem yu givim fulhat blong yu blong mekem wok blong Jeova.​—⁠Prov. 10:⁠22; Kol. 3:​23, 24.

³ ?I stret blong tingbaot wok blong fultaem paenia olsem wan blesing we samfala nomo we oli spesel oli save mekem? No gat. Folem promes we yumi bin mekem taem yumi givim ful laef blong yumi long Jeova, evri Kristin oli mas tingting dip long wok blong fultaem paenia sipos i no gat samting i blokem yumi from.​—⁠Mak 12:⁠30.

⁴ Sipos i klia se helt blong yu mo responsabiliti we Baebol i askem yu blong mekem, oli blokem yu blong yu no save mekem paenia naoia, yu save sua se Jeova i luksave mo kasem save long samting ya. Bambae hem i blesem yu from fasin blong holemstrong long wok we yu stap mekem naoia, stret olsem ol samting long laef blong yu i letem yu blong mekem. (1 Kor. 4:2; 2 Kor. 8:12) Be sipos naoia i luk olsem se yu save mekem paenia bakegen, i gud yu go luk presiden elda mo askem wan pepa blong yu save fulumap bakegen.

⁵ ?Famle Blong Yu i Save Givhan? Maet yu bin lego paenia from yu mas lukaot long famle blong yu. Olsem wanem nao, ?i gat sam narafala memba blong famle we oli save givhan naoia blong mekem se yu save joen bakegen long wok blong paenia? Long saed blong samfala, smol help nomo blong lukaot long sam responsabiliti, i save mekem se oli save joen bakegen long wok blong paenia.

⁶ Maet gudfala fasin blong wok tugeta mo smol moa fasin traehad blong ol narafala memba blong famle i save mekem samting ya i kamtru. Maet oli save help long saed blong mane no transpot, mo tu plan blong wok tugeta long wok blong prij. Ating i gat sam narafala rod tu we oli save givhan long yu. Sipos ol samting blong laef oli no letem yu blong mekem wok ya bakegen, maet yu save givhan long wan narafala memba blong famle we i save mekem paenia.

⁷ I gud blong tokbaot samting ya wetem famle. Plan blong wan memba blong famle blong mekem paenia, i save wok sipos yu mekem olsem wan plan blong ful famle. Sipos wan moa paenia i save joen long wok ya, olgeta long famle oli save harem se oli stap joen long hem tu. Gudfala fasin ya blong givhan bambae i no givhan nomo long wok blong talemaot Kingdom long teritori, be bambae i mekem famle tu i joen wanples moa long saed blong speret.​—⁠Luk 6:38; Fil. 2:​2-4.