Traem Blong Gohed Moa Folem Wan Stret Plan
1 Aposol Pol i gat spesel filing long kongregesen blong Filipae, we hem i stanemap. Hem i haremgud tumas long kaen fasin we oli soemaot blong givim samting we hem i nidim long saed blong bodi, mo hem i tokbaot olgeta olsem wan gudfala eksampel.—2 Kor. 8:1-6.
2 Leta blong Pol long olgeta blong Filipae i kamaot from dip lav. Insight buk, Volyum 2, pej 631, i talem se: “Long olgeta haf blong leta ya, hem i leftemap tingting blong kongregesen blong Filipae blong gohed long gudfala fasin blong olgeta—traem kasem moa fasin luksave mo traem mekem sua se oli holemstrong long Tok blong laef, mekem bilif i strong moa, mo hop long praes we bambae i kam.” Oli haremgud long advaes blong Pol mo i mekem se dip lav i joenem olgeta wetem aposol Pol. Tok blong Pol i gat spesel mining long yumi tede tu, taswe yumi gat gudfala risen blong tingtinggud long advaes blong hem, antap moa tok we i stap long Filipae 3:15-17.
3 I Nidim Tingting Blong Wan Bigman: Long Filipae 3:15, tok we Pol i raetem i olsem wan man we i gat ekspiryens long plante yia. Hem i luksave se ol man Filipae oli stap gru long saed blong speret, taswe hem i tok long olgeta olsem we oli bigman long saed blong speret wetem stret tingting. Sipos tingting blong olgeta i stap pusum olgeta blong soemaot tingting daon mo fasin tangkyu we Jisas i bin soemaot, bambae oli gohed blong holem ‘fasin we i stap klin gud, mo i no gat man i gat poen long olgeta. Bambae oli olsem ol pikinini blong God we oli stret gud olgeta . . . mo oli stap holemtaet tok blong laef.’ (Fil. 2:15, 16) Taem yumi ridim tok blong Pol, yumi mas harem se hem i stap toktok long yumi. Taswe, yumi mas wantem tumas blong gat sem tingting we Jisas i bin gat, mo soemaot tingting daon mo fasin tangkyu long ol blesing blong wok we yumi kasem. Yumi gohed blong prea oltaem long Jeova, blong askem help blong Hem long saed ya mo long ol narafala samting tu.—Fil. 4:6, 7.
4 Filipae 3:16 i soem se, yumi evriwan i mas traehad blong gru moa. Wod ya “gohed moa” i minim “muf i go fored, kamgud moa.” Ol man we oli stap gohed oli “intres long ol nyufala tingting, samting we oli faenemaot, no ol jans.” Pol i givim woning long ol man Filipae blong kasem save se Kristin fasin blong laef i neva stap olsem nomo, mo se olgeta we oli joen long hem oli mas muf i go fored. Bambae oli soemaot tingting blong olgeta blong gohed long fasin blong olgeta blong wantem jekem olgeta wanwan, luksave ol slak fasin blong olgeta, mo blong traem kasem ol jans blong mekem moa no blong kamgud moa long ol samting we oli stap mekem. Tede ogenaesesen blong Jeova long wol i stap muf i go fored oltaem, mekem se wok mo save blong olgeta long Tok blong God i stap gru moa. Wanwan long yumi i mas gohed long sem spid wetem hem, yusumgud ol samting we hem i stap givim mo joen fulwan long wok blong hem.
5 Fasin Blong Gohed i Nidim Wan Stret Plan: Pol i gohed blong talem long ol brata blong hem blong ‘gohed long rod ya we oli folem finis blong kam kasem ples ya.’ (Fil. 3:16) Wan stret plan i minim se yumi mas putum ol man no ol samting long stret ples blong olgeta long tingting blong yumi, olsem ol impoten samting fastaem, mo yumi mas gat gudfala fasin. Ol Kristin long Filipae oli stap long stret ples blong olgeta, stap kolosap long ogenaesesen blong Jeova mo long ol narafala long kongregesen. Loa blong lav i rulum laef blong olgeta. (Jon 15:17; Fil. 2:1, 2) Pol i talem long olgeta blong ‘mekem we fasin blong laef blong olgeta evri dei, i stret gud long mak blong gud nyus blong Kraes.’ (Fil. 1:27) Fasin blong putum ol samting long stret ples blong olgeta mo gudfala fasin i impoten long ol Kristin tede tu.
6 Wan plan i olsem rod we man i folem oltaem long saed blong wan fasin blong hem. Taswe i kolosap sem mak long wan kastom we man i stap mekem oltaem. Fasin blong folem wan plan i moa isi long yumi from se, i no nid blong yumi stop smol mo tingting bifo yumi mekem wan disisen long saed long wanem bambae yumi mekem—yumi gat wan plan finis we yumi stap folem olsem prapa fasin blong yumi.
7 Wan stret tiokratik plan i minim ol fasin mo kastom we oli mekem i gud long yumi, yumi save kasem gud frut from, mo oli kamaot long God—wetem mak blong bildimap yumi wanwan long saed blong speret, halpem ol narafala, mo, sipos yumi naf, yumi save mekem moa long wok blong Jeova. Blong kasem ol mak ya, yumi nidim blong stanemap mo holemtaet wan plan blong stadi wanwan, go long ol miting oltaem, mo joen long wok blong prij.
8 Ol Impoten Samting Blong Wan Stret Plan: Wan samting we yumi nidim, hem i ‘stret save mo fasin blong luksave fulwan.’ (Fil. 1:9) Stadi wanwan i mekem bilif blong yumi i moa strong, mekem fasin tangkyu blong yumi long trutok i kam moa dip, mo i pusum yumi blong mekem ol gudfala wok. Be, samfala oli faenem i had blong gohed oltaem long prapa stadi blong olgeta. Wan long ol stampa risen we oli givim se i no gat naf taem.
9 I no gat toktok blong talem ol gudfala frut we oli save kamaot sipos yumi ridim Baebol evri dei. Ol tijing blong hem ‘i stretgud’ blong givhan long evri rod. (2 Tim. 3:16, 17) ?Olsem wanem yu save faenem taem blong stadi Baebol long program blong yu evri dei? Samfala oli faenem se oli save girap eli lelebet evri moning mo tekem sam menet blong ridim Baebol, taem maen blong olgeta i klia yet. Sam narafala oli faenem se i moa gud long olgeta blong rid sam menet bifo oli go slip long naet. Ol waef we oli stap long haos long dei oli save holem sam smoltaem long aftenun bifo we ol narafala oli kambak long wok no skul. Antap long fasin blong ridim Baebol oltaem, samfala oli ademap riding blong Proclaimers buk long program blong stadi blong olgeta evri wik.
10 Taem yumi stanemap sam nyu rod blong folem, bambae ol samting ya oli save agensem ol olfala rod blong yumi. Bifo, maet yumi letem sam wok we oli no impoten oli kakae fri taem we yumi gat. I no isi blong lego fasin ya. I no gat wan man we bambae i givim oda long yumi blong stadi; mo yumi no stap talemaot wanem yumi mekem long saed ya. Fasin blong yumi blong gohed blong stadi oltaem i stanap bigwan long fasin tangkyu blong yumi long ‘ol samting we oli impoten moa,’ mo fasin blong yumi blong wantem blong ‘pemaot taem’ blong haremgud long hem.—Fil. 1:10; Efes. 5:16.
11 Ol Kristin miting oli mekem bigfala wok blong givhan long yumi blong gohed moa long saed blong speret, oli givim tijing we yumi nidim mo oli leftemap tingting. Taswe, go long ol miting i wan impoten haf blong stret plan we yumi folem oltaem. Pol i soemaot se samting ya i impoten tumas. Go long ol Kristin miting i no wan samting we yumi mekem nomo taem yumi no gat narafala samting blong mekem.—Hib. 10:24, 25.
12 ?Olsem wanem yumi save soem fasin blong putum evri samting long stret ples blong olgeta, taem yumi mekem program long ol wok blong yumi evri wik? Samfala oli putum sam stret taem blong lukaot long ol samting blong olgeta wanwan nomo mo afta, oli traem blong pusum ol miting long smol taem we i stap, be i no mas olsem. Yumi mas putum ol miting blong yumi evri wik long fasples, mo yumi save plan blong mekem ol narafala wok long ol taem we i no gat miting.
13 Blong go long ol miting oltaem, i nidim gudfala plan mo fasin blong famle blong wok tugeta. Long ol dei blong wik, bighaf blong yumi i folem wan program we i bisi we plante taem i mekem se yumi sot long taem. Samting ya i minim se, sipos yumi save mekem, famle i mas plan blong kakae eli lelebet long sapa, blong famle i gat inaf taem blong kakae, rere, mo go long miting bifo i stat. Blong kasem mak ya, ol memba blong famle oli save wok tugeta long plante rod.
14 Joen oltaem long wok blong prij i impoten tumas sipos yumi wantem gohed moa folem wan stret plan. Yumi evriwan i luksave klia, responsabiliti blong yumi blong talemaot mesej blong Kingdom. Hemia nao samting we i mekem se yumi ol Wetnes blong Jeova. (Aes. 43:10) From we hem i wan wok we i moa impoten mo i givhan moa bitim ol narafala wok tede, yumi no save tingbaot wok ya olsem wan haf blong program blong yumi we i no impoten tumas. Pol i talem se: “Yumi mas stap joen long Jisas ya, nao oltaem yumi mas stap leftemap nem blong God. Fasin ya i olsem we oltaem yumi stap kilim anamol blong givim i go long hem.”—Hib. 13:15.
15 Taem yumi plan long ol wok blong yumi evri wik, makem ol stret taem blong prij. Ating kongregesen i gat ol miting blong prij plante taem long wik, taswe yumi mas jusum nomo se wanem dei nao bambae yumi save sapotem. I gud blong traehad blong joen long ol defren haf blong wok blong prij, olsem seremaot magasin mo ol narafala buk long ol haos wanwan, mekem visit bakegen, mo mekem ol Baebol stadi. Yumi save plan tu blong holem jans blong prij taem yumi karem sam buk mo rere blong statem storeyan long ol jans we yumi gat. From we yumi stap go long wok blong prij wetem ol narafala, yumi nidim blong save plan blong olgeta, blong yumi save mekem plan we i stret long yumi mo olgeta tu.
16 Yumi mas holemtaet plan blong yumi blong prij oltaem, nating se i no gat plante man long teritori we oli intres. Yumi save finis se smol man nomo bambae oli lesin. (Mat. 13:15; 24:9) Esikel i kasem oda blong prij long ol man we oli ‘stronghed, flas, mo hat blong olgeta i strong.’ Jeova i promes blong halpem Esikel taem Hem i mekem ‘hed blong hem i strong olsem hed blong olgeta,’ hemia se, ‘i olsem wan daemon, strong moa bitim aean.’ (Esikel 2:3, 4; 3:7-9) Taswe blong folem wan plan blong prij oltaem, i nidim strong tingting blong gohed.
17 Ol Gudfala Eksampel Blong Folem: Plante long yumi oli mekem moa long wok blong prij taem i gat wan man we i lidim wok ya. Pol mo ol fren blong hem oli soem gudfala eksampel, mo hem i leftemap tingting blong ol narafala blong mekem sem mak olsem hem. (Fil. 3:17) Insaed long plan blong hem, i gat tu ol samting we hem i nidim blong mekem hem i stap strong long saed blong speret.
18 Tede, tu, yumi gat ol gudfala eksampel. Long Hibrus 13:7, Pol i talem se: “Bambae yufala i no fogetem ol man ya we bifo oli stap lidim yufala . . . nao yufala i mas biaen long olgeta, long fasin blong bilif blong olgeta.” Yes, Kraes i bigfala eksampel blong yumi, be yumi save folem fasin blong bilif blong olgeta tu we oli stap lidim yumi. Olsem Pol, ol elda oli mas tingbaot oltaem, nid blong stap olsem wan gudfala eksampel long ol narafala. Nating se ol samting blong laef blong olgeta wanwan i defren, wanwan long olgeta i mas soem se hem i stap holem wan stret plan blong putum ol samting long saed blong Kingdom long fasples long laef blong hem oltaem. Nating se oli gat wok blong winim mane mo responsabiliti long famle, ol elda oli mas strong oltaem blong folem gudfala fasin blong stadi wanwan, go long ol miting, mo lidim ol narafala long wok blong prij. Taem ol elda oli soem se oli ‘save lukaotgud long famle blong olgeta,’ samting ya bambae i leftemap tingting blong olgeta long kongregesen blong gohed moa folem wan stret plan.—1 Tim. 3:4, 5.
19 Ol Mak Blong Nyufala Sevis Yia: Stat blong nyufala sevis yia i wan stret taem blong tingbaot plan blong yumi wanwan. ?Luklukbak long ol wok blong yumi long yia we i pas i soem wanem? ?Yumi bin gohed, no maet yumi bin mekem moa long wok blong yumi? Maet yumi bin mekem moa long stadi blong yumi wanwan. Maet yumi bin go moa long ol miting no maet yumi bin mekem moa long wok blong prij taem yumi joen long wok blong haftaem paenia. Ating yumi save tingbaot fasin kaen we yumi bin soem long narafala long kongregesen no famle. Sipos i olsem, yumi save glad se yumi bin wokbaot long rod we i mekem God i haremgud, mo yumi gat gudfala risen blong ‘go moa yet long ol fasin ya.’—1 Tes. 4:1.
20 ?Olsem wanem sipos plan we yumi bin folem i stap jenis no i olbaot? ?Hem i bin spolem yumi long saed blong speret? ?I gat risen we i bin blokem yumi blong no moa gohed gud? Blong kamgud, faswan samting se, yumi mas askem Jeova blong halpem yumi. (Fil. 4:6, 13) Tokbaot nid blong yu wetem ol narafala memba blong famle, askem help blong olgeta blong stretem sam samting long plan blong yu. Sipos yu gat sam problem, askem ol elda blong givhan long yu. Sipos yumi traehad mo letem Jeova i lidim yumi, yumi save sua se bambae yumi save ronwe long fasin blong ‘stap nating nomo mo no karem frut.’—2 Pita 1:5-8.
21 Fasin blong folem wan stret plan i karem blesing we i soem se fasin traehad blong yu i no blong nating nomo. Taem yu mekem disisen blong gohed moa folem wan stret plan, ‘yu mas wok strong, i nogud yu stap les, mo yu mas mekem wok blong Masta blong yumi we tingting blong yu i glad long hem oltaem.’ (Rom 12:11)—Blong save moa long poen ya, lukluk Wajtaoa blong Mei 1, 1985, pej 13-17 (Engglis).