Oli No Kam Slak Blong Prij
1 Nem blong yumi, Ol Wetnes Blong Jeova, i soemaot yumi mo eksplenem wanem yumi stap mekem. Yumi stap wetnes long ol gudfala fasin blong God blong yumi, Jeova. (Aes. 43:10, 12) Wanwan i mas joen blong givim wetnes sipos hem i wantem kam wan memba blong kongregesen. Wok blong prij i faswan rod blong givim wetnes, hemia i min se prij long ol haos wanwan, long rod, mekem ol visit bakegen, mo mekem ol Baebol stadi. Baebol i leftemap tingting blong yumi evriwan blong joen fulwan long wok ya.—1 Kor. 15:58.
2 Be sam memba blong kongregesen oli no save mekem plante. Maet bigfala sik no bodi we i no strong i blokem olgeta. Ol famle we oli agensem olgeta oli save mekem bigfala trabol blong blokem olgeta tu. Wan yangfala, maet papa no mama blong hem we i no bilif i blokem hem. Samfala we oli stap long ol ples longwe we oli no gat transpot, maet oli ting se i had blong prij. Olgeta we oli gat fasin sem oli save fraet blong mekem wok ya. Samfala pablisa we oli kasem ol problem olsem oli save harem se oli no kasem mak blong wan Kristin, from we oli save mekem smol nomo taem oli skelem wetem wanem we ol narafala oli mekem, mo i smol nomo long wanem we oli rili wantem mekem. I no gat wan risen blong oli ting nating long fasin traehad blong olgeta. (Gal. 6:4) Oli save haremgud blong save se Jeova i glad taem oli givim bes blong olgeta nating se oli kasem wanem problem.—Luk 21:1-4.
3 Faenem Rod Blong Serem: Plante taosen ekspiryens oli soem olsem wanem samfala we oli kasem problem oli no letem ol samting ya oli blokem olgeta long wok blong prij. Taem oli yusum waes blong olgeta, oli faenem plante defren rod blong holem jans blong prij. Olgeta we oli mas stap long haos, oli yusum telefon blong openem bigfala doa blong prij. Oli luk evri man we oli kam visit olgeta olsem wan we i rere blong lesin. Nating se wan waef we famle i agensem hem, maet i no save prij long haos, hem i save yusumgud ol jans we hem i gat blong toktok long ol man we oli stap kolosap long hem no ol narafala we hem i mitim olgeta evri dei.
4 Maet wan yangfala i gat papa no mama we i no bilif, nao i blokem hem blong joen long wok blong prij. Hem i no mas luk samting ya olsem wan traem we hem i no save winim, maet hem i save luk ol fren blong hem long skul mo ol tija blong hem olsem prapa “teritori” blong hem mo hem i save givim gudfala wetnes mo maet mekem sam Baebol stadi wetem olgeta. Samfala we oli stap laef long ol ples farawe oli gat jans blong joen long wok blong prij taem oli raetem ol leta. Olgeta we Kristin fasin blong wok strong i pusum olgeta, bambae oltaem oli faenem rod blong no ‘stap nating. Be oli save karem frut long laef blong olgeta, olsem we oli save moa Jisas Kraes, Masta blong yumi.’—2 Pita 1:8.
5 Long saed blong fasin blong yumi blong joen long wok blong prij, Jeova i stanemap wan rul blong yumi evriwan, hemia, se yumi mas mekem long ‘olgeta hat’ blong yumi. (Kol. 3:23) Nating se taem we yumi wanwan i spenem mo wanem we yumi wanwan i mekem bambae i no sem mak, samting we i pusum yumi i sem mak nomo—trufala lav we i kamaot long “fulhat.” (1 Kron. 28:9; 1 Kor. 16:14) Sipos yumi stap givim bes blong yumi, bambae yumi neva gat risen blong ting se bilif blong yumi i slak no yumi wan memba blong kongregesen blong nating nomo, from samting we yumi mekem i smol nomo. Olsem Pol, yumi save talem tru nomo se taem ‘yumi stap talemaot gud nyus, mo taem yumi stap tij long fes blong ol man, yumi no haedem wan samting nating we i save givhan long olgeta.’—Wok 20:20.