Mekem Moa Long Nambawan Wok Blong Yu Long Saed Blong Kingdom
1 Jisas i tokbaot hop blong kasem Kingdom olsem wan samting we i sas tumas. (Mat. 13:44-46) ?Yumi olsem ol man ya long ol pija tok blong Jisas we oli salem olgeta samting we oli gat blong pem wan samting we i gat bigfala praes long hem? Sipos i olsem, bambae yumi putum Kingdom blong God long fasples, nating se i no isi long yumi mo yumi mas talem ‘no’ long wanem we yumi wanwan i wantem.—Mat. 6:19-22.
2 From we wok blong yumi long saed blong Kingdom i wan sas samting, yumi mas wantem mekem i kam bigwan moa. ?Fasin blong laef blong yumi wanwan i soemaot wanem? ?Yumi stap mekem moa long wok blong yumi long saed blong Kingdom? Yumi save mekem olsem taem yumi joen long ol defren haf blong wok blong prij, olsem prij long ol haos wanwan, mekem visit bakegen, mekem ol Baebol stadi, mo holem jans blong prij.
3 ‘?Olsem Wanem Mi Save Joen Moa?’ Long stat blong nyufala sevis yia, i gud we wanwan long yumi i luk bakegen long prapa wok blong hem, blong luk wanem nao hem i save mekem blong spenem moa taem long wok blong prij, mo askem se: ‘?Mi save stretem program blong mi blong mi save mekem haftaem paenia samtaem no maet oltaem? ?Sipos mi mekem sam jenis mi save joen long wok blong fultaem paenia?’ Ol nyufala paenia we oli stat bifo Septemba 1 oli gat raet blong joen long Paenia Skul nekis yia.
4 Sam pablisa oli putum sam mak blong olgeta wanwan blong mekem moa long wok blong holem jans blong prij. Plante taem wok ya i karem nambawan frut. Maet sam narafala oli harem se oli nidim blong kamgud moa blong mekem visit bakegen no statem ol Baebol stadi.
5 Sipos yumi luksave se i gat sam samting we i blokem yumi long minista wok blong yumi, ?yumi save mekem wanem blong mekem i kam bigwan moa? Olgeta we oli stap kasem ol mak blong olgeta, oli talem se yumi mas strong blong putum ol intres blong Kingdom long fasples, nating se wanem samting yumi mas jenisim. (Mat. 6:33) I nidim bilif mo fasin blong stanap long Jeova fulwan. (2 Kor. 4:7) Askem help blong Hem tru long prea oltaem we i kamaot long hat we i tru. (Luk 11:8, 9) Yumi save trastem se Jeova bambae i blesem trufala fasin traehad blong yumi blong joen moa long wok blong hem.—1 Jon 5:14.
6 Toktok long ol narafala brata mo sista we oli mekem moa long minista wok. Askem olgeta olsem wanem oli winim ol traem we tingting blong olgeta i no kam slak. Maet prapa ekspiryens blong olgeta i stret samting we yu nidim blong mekem yu yu bilif fulwan se yu save mekem moa long minista wok.
7 Taem yu ridim ol atikol long Wajtaoa no long Kingdom Wok Blong Yumi we oli laenap long wok blong prij, tokbaot samting ya long prea blong yu blong luk olsem wanem yu save mekem advaes ya i wok long minista wok blong yu. Mekem sem mak taem yu go long ol miting blong kongregesen no ol asembli. Ol poen we oli stap long atikol ya oli stanap long wan storeyan we i kamaot long program blong seket asembli long las yia. Hemia i faswan long ol atikol we oli blong halpem yumi blong folem mo mekem ol advaes we program ya i givim i wok.
8 Jisas i tingbaot minista wok blong hem olsem wan samting we i impoten tumas, hem i putum long fasples. Hem i talem se: “Kakae ya blong mi hemia, we bambae mi mekem ol samting we hemia we i sanem mi i wantem, mo mi finisim ol wok we hem i givim.” (Jon 4:34) ?Yumi harem sem mak? Sipos yes, sua se bambae yumi faenem ol rod blong mekem moa long wok blong yumi mo serem “ol gudfala tingting” we yumi gat, olsem ol sas samting blong yumi, wetem ol narafala.—Mat. 12:35; Luk 6:45.