Wokem Intres Long Laef Foreva buk
1 Taem yumi go long haos blong ol man, oltaem yumi faenem se tingting blong olgeta i “trabol tumas long laef ya long wol.” (Mak 4:19) I hadwok blong yumi kasem intres blong olgeta wetem fasin blong storeyan we i pulum tingting blong olgeta. Taem yumi jes stat storeyan, plante man oli intres smol nomo long mesej blong yumi. Sipos yumi save talem wan samting we i stret long laef blong olgeta, maet yumi save wokem sam intres long mesej blong Kingdom. Wan stampa poen blong statem ol storeyan i blong jusum sam stret poen blong tokbaot long Laef Foreva buk. ?Yu save talem wanem?
2 Yu save yusum fastok ya se:
◼ “Sipos yu gat paoa, ?wanem nogud problem long taem blong yumi tede we yu wantem stretem? [Wet long ansa, mo sipos i stret, agri se plante man oli harem sem mak.] Kam kasem naoia i luk olsem se, ol lida blong wol oli faenem smol ansa nomo long ol nogud problem blong tede. Be i gat Wan we i gat paoa mo bambae i finisim ol problem we oli stap kasem ol man. Plis makem wanem Ol Sam 145:16 i talem. [Ridim vas ya, mo pulum tingting i go long ol pija long pej 11-13.] Paragraf 14 long pej 14 i askem kwestin we yumi jes tokbaot mo i go moa blong askem se: ‘?Be wetaem bambae samting ya i kamtru?’ ” Eksplenem se buk bambae i ansa long kwestin ya, mo soem se yu glad blong askem man blong karem buk.
3 No yu save talem samting olsem se:
◼ “Maet yu save olsem wanem man i harem nogud taem wan we hem i laekem tumas i ded. I tru i mekem yu yu sore mo yu harem nogud from yu no save mekem wan samting blong winim soasore ya. Maet yu bin askem ol kwestin olsem: [Ridim ol kwestin long paragraf 1 long pej 76.] ?Yu ting se bambae yumi haremgud sipos yumi kasem ansa blong ol kwestin ya? Maet i leftemap tingting blong yu blong save se Baebol i gat wan trufala hop blong olgeta we oli ded. [Ridim Jon 5:28, 29.] Buk ya i halpem yumi blong kasem save olsem wanem ol dedman oli stap mo wanem hop blong olgeta long fyuja.” Tokbaot smol japta 8 mo 20. Leftemap tingting blong man blong haos blong ridim buk ya.
4 Ating bambae i gat rod blong yu holem jans blong prij. Sipos i olsem, yu save talem wan samting olsem long prapa tok blong yu nomo se:
◼ “Wol i fulap long ol problem tede, mo mi sua se yu tu yu kasem plante. Sore tumas, i luk olsem se ol man we oli no mekem rabis fasin oli kasem moa trabol. ?Yu ting se God bambae i finisim ol fasin ya blong harem nogud? [Wet long ansa.] Bambae mi soemaot long yu wanem God i promes blong mekem long ol man we oli mekem wok blong hem. [Ridim Ol Sam 37:40 mo afta openem Laef Foreva buk long pej 99.] Buk ya i eksplenem from wanem God i letem fasin nogud i stap mo olsem wanem bambae hem i finisim.”
5 Sipos yu wan yangfala pablisa, yu save yusum wan fasin blong storeyan we i stanap long ol pija long pej 156-158. Blong stat yu save askem se:
◼ “?Yu wantem laef long wan wol olsemia? [Wet long ansa.] Wanwan long ol naesfala pija ya i stanap long wan promes we i stap long Tok blong God, Baebol. [Soem ol vas blong Baebol we oli stap ya.] Buk ya i save halpem yu blong lanem moa long saed blong promes blong God blong mekem ful wol i kam paradaes. Hem i gat ol save we oli save sevem laef blong yumi mo bambae i givhan long yu sipos yu tekem taem blong ridim.”—Jon 17:3.
6 Taem yu seremaot buk, tingbaot nid blong stanemap wan poen blong tokbaot taem yu mekem visit bakegen.