Mekem Wok Blong Prij Wetem Olgeta Sol Blong Yu
Haf 4: Rere Gud Blong Mekem Wok Blong Prij
1 Man we i stap prij long ol haos wanwan i mas gat prapa program blong hem. Jisas i soemaot rod long yumi blong folem long minista wok blong yumi tede. (Luk 10:1, 2; Wok 1:8) Yumi lanem tu from fasin blong ol disaepol long faswan handred yia, olsem wanem oli mekem minista wok blong olgeta. (Wok 5:42; 2 Tim. 4:5) ?Be olsem wanem yu save rere gud mo kasem ol gudfala risal tede?
2 Mekem Program Blong Prij: Minista wok blong yumi i no olbaot. Hem i no smolhaf blong laef blong yumi tu. Ol haoa we yumi givim long wok blong prij blong yumi i no kamaot from we yumi gat jans nomo. Blong reremgud minista wok blong yumi, yumi mas gat wan program blong mekem olgeta haf blong hem. (Efes. 5:15, 16) Plante pablisa oli faenem se i gud blong oli putum mak long haoa blong olgeta long wok blong prij long evri manis. Samting ya i givhan long olgeta. Hemia i min se oli mas mekem program blong joen long wok blong prij long evri wik. Ol Kristin papa mama oli mas givhan long ol pikinini blong olgeta blong mekem program blong joen oltaem long olgeta haf blong wok blong prij.—Dut. 6:7; Prov. 22:6.
3 Putum Sam Mak Blong Kasem: Putum ol mak we yu yu save kasem. Taem yu kasem mak blong yu, bambae yu harem glad blong mekem olsem. (Prov. 13:12) Aposol Pol i talem se: “Be naoia, blong fastaem, yumi mas gohed long rod ya we yumi folem finis blong kam kasem ples ya.” (Fil. 3:16) Blong gohed long olgeta fasin blong yu long saed blong speret, yu mas gat ol gudfala fasin, mo yu mas strong blong folem olgeta oltaem. Sem mak long wok blong prij.
4 Eksampel: ?Yu yu gat ol traket? ?Yu yu gat inaf nyufala magasin wetem yu? ?Mo oli stap klin? ?Yu yu yusumgud pepa blong prij? Wan i blong raetemdaon olgeta we oli intres mo narawan i blong raetemdaon ol haos we i no gat man.
5 Bifo yu go long wok blong prij, tekem taem blong lukluk bakegen Stampa Tok Blong Prij. Makem ol poen we yu save yusum long buk we yumi seremaot. Yu mas rere gud blong yusum ol poen ya blong mekem ol man i intres. Mo yu mas rere gud blong yusum buk ya Reasoning From the Scriptures. Kwiktaem nomo yu save lukluk insaed long buk ya blong faenem plante advaes, taem yu stap go long wan haos. Nao blong gat gudhan long wok ya yusum ol poen ya.
6 Joen fulwan long “tabu wok blong gud nyus” long ol las dei ya. Hem i wan gudfala jans blong yumi. (Rom 15:16, NW) Yumi mas traehad blong finisim gud minista wok blong yumi taem yumi stap givim beswan wetnes hemia, “frut blong maot blong yumi.” (Hib. 13:15, NW; lukluk Hosea 14:2.) Blong mekem olsem yumi traem mekem program long taem blong yumi blong joen long wok blong prij mo putum ol mak we yumi save kasem. Nao bambae yumi save finisim gud minista wok blong yumi blong presem Jeova.