Mekem Wok Blong Prij Wetem Olgeta Sol Blong Yu
Haf 5: Kasem Ol Blesing From Wok Ya
1 Jeova i mekemrere plante gudfala samting long ol man we oli stap wok wetem olgeta sol blong olgeta. (Sam 116:12) ?Olsem wanem yumi save glad long ol blesing we Jeova i givim long yumi long wok ya? ?Wanem ol blesing we i rere blong yumi kasem? ?Wanem samting yumi mas mekem blong God i save stap glad long yumi?
2 Yumi Mas Traehad: Blong yu save harem gud long ol blesing we God i givim long yu, i dipen olsem wanem yu stap traehad blong mekem wil blong God. Pol i tokbaot wok ya, i se: “Bambae God i givim pei long [evri man wanwan, NW], stret long ol wok we [hem, NW] i mekem.” (1 Korin 3:8) Taswe i gud yumi traem joen long wok ya taem yumi gat rod blong mekem. Aposol Pol hem wan i kasem pei, from we hem i givhan long plante man mo long olgeta kongregesen blong oli save God. Hem i harem gud blong luk se oli stanap strong long bilif blong olgeta. (1 Tes. 2:19, 20) I tru, maet yu yu no gat rod blong mekem wok olsem Pol. Be yu save kasem ol blesing sipos yu halpem wan man no wan famle blong oli stanap strong long rod ya blong laef. Yu save kasem pei taem yu traehad blong prij long ol haos wanwan, mekem ol visit mo ol Baebol stadi.
3 Sam Blesing Moa: Wan blesing we yumi kasem from wok ya, se yumi kam kolosap moa long Jeova mo Jisas Kraes. (Mat. 11:29, 30; 1 Korin 3:9) Yu save glad taem yu haremsave se tabu speret blong God i stap givhan long yu long wok blong prij. (Mat. 10:20; Jon 14:26) Mo taem yumi joen wetem ol narafala man insaed long kongregesen blong mekem wok ya, bambae i mekem se lav mo fasin joen gud blong yumi i kam strong moa.
4 Jeova i save blesem yumi sipos yumi sapotem fulwan ogenaesesen we hem i stap yusum blong mekem wil blong hem long ol las dei ya. (Lukluk 2 King 10:15.) Taem yumi joen gud blong mekem wok wetem olgeta sol blong yumi, mo folem ol advaes we yumi kasem long rod we God i stap yusum, mo yumi joen gud wetem kongregesen long ol wok blong prij, yumi stap sef long saed blong speret from ol gyaman trik blong Setan. Mo yumi save karem moa frut long wok blong prij.
5 I gat faef haf we oli gat nem ya “Mekem Wok Blong Prij Wetem Olgeta Sol Blong Yu.” Hem i stap soemaot sam impoten poen. ?Yu tingbaot ol impoten poen ya blong soemaot fasin tangkyu long Jeova? Hemia ol samting we i pusum wan man blong wok wetem olgeta sol blong hem. (Julae) ?From wanem yumi mas rere gud blong yumi save stap glad long wok blong prij? ?Olsem wanem yumi save rere? (Ogis) ?Olsem wanem ol pablisa we oli gat gudhan oli save givhan long ol narafala blong oli mekem wok blong prij wetem olgeta sol blong olgeta? (Septemba) ?Olsem wanem gudfala plan i save givhan long yumi blong mekem wok blong prij wetem olgeta sol blong yumi? (Oktoba) ?Yu yu traem folem ol advaes ya?
6 Jeova i wantem blesem yumi from we yumi obei long hem. (Aes. 48:17) Mo olgeta ya we oli lesin long yu from we yu mekem wok blong prij wetem olgeta sol blong yu, oli save kasem ol blesing from. (1 Tim. 4:15, 16) Jeova i lukluk yu taem yu stap traehad blong mekem wok ya. “Masta ya blong yumi, bambae hem i pem yufala, nao bambae yufala i save kasem haf blong ol samting ya we hem i putum olgeta oli rere finis blong ol man blong hem.” Hemia laef ya we i no save finis.—Kol. 3:23, 24.