Mekem Wok Blong Prij Wetem Olgeta Sol Blong Yu
Haf 1: ?Tangkyu Long Jeova i Impoten Olsem Wanem?
1 ?Wanem stampa blong fasin blong wok wetem olgeta sol blong yumi long wok blong prij? Bigfala tangkyu long Jeova from ol samting we hem i mekem long yumi finis. (2 Saml. 22:2, 3) Traem tingbaot olsem wanem ol man we oli stap longwe long God oli harem nogud. Nao samting ya i mas pusum yumi blong traehad moa long wok blong prij. (Mat. 9:36; 2 Korin 5:14, 15) Moa yumi ona long Jeova mo tingbaot laef blong ol narafala man, moa yumi wantem wok strong long wok blong prij. (Mat. 22:37-39) Long taem ya nao, bambae yumi tinghae long minista wok blong yumi. (2 Korin. 4:7) ?Be olsem wanem yumi save wokem fasin ya blong tinghae long minista wok blong yumi?
OL BIGFALA SAMTING BLONG WOKEM FASIN TANGKYU
2 Baebol stadi wanwan mo long kongregesen, mo prea wetem fasin blong tingtinggud long ol samting we yumi stadi, olgeta samting ya i save givhan long yumi blong fren gud wetem Jeova. Bambae yumi luksave ol gudfala fasin blong hem. ?Yu yu stap folem wan program blong ridim Baebol evri wik? ?Yu yu makemaot taem blong stadi long sam buk blong Sosaete? ?Yu yu reregud from ol miting blong kongregesen, mo yu go long olgeta? ?Yu yu givim ansa long olgeta? (Hib. 10:24, 25) Taem yu stadi finis, yu wan, i gud blong tingting dip long ol samting we yu bin stadi long hem. Samting ya bambae i wokem tangkyu long hat blong yu from ol gudgudfala fasin blong God blong yumi we i gat bigfala lav, mo from ol plan we hem i stanemap long saed blong tru wosip.—Sam 27:4.
3 Wan narafala rod blong kasem moa fasin tangkyu i blong tingbaot eksampel blong ol narafala man blong God we oli wok wetem olgeta sol blong ol. Profet Jeremaea i wok olsem we faea i laet long hem long wok we God i givim long hem. (Jer. 20:9) Jisas i soemaot rod long yumi, hem i wok strong mo i soemaot tangkyu oltaem. (Jon 4:34) Aposol Pol i hadwok long minista wok blong hem. Olsem nao, hem i soemaot tangkyu long God from sore we God i gat long hem. (1 Tim. 1:12, 13, 17) I gud yumi tingting long ol eksampel blong bifo, mo ol gudfala eksampel blong naoia tu. Samting ya i save wokem fasin tangkyu long yumi, nao yumi wok wetem olgeta sol blong yumi long wok blong prij.
4 Taem yumi tingbaot paoa, haenem, mo ol gudgudfala wok blong Jeova, yumi wantem talemaot we hem i hae we i hae, mo yumi wantem singsing blong presem hem. (Sam 145:5-7) Sipos yumi stap lukaot ol rod blong talemaot Kingdom mesej, yumi soemaot se yumi tinghae long ol jans blong wetnes long nem blong God.—Luk 6:45.
5 ?Be i gat sam moa samting we oli save pusum yumi blong wok wetem olgeta sol blong yumi long wok blong prij? Sipos yes, ?wanem ol samting ya? ?Olsem wanem ol elda, ol man blong givhan, ol paenia, mo ol pablisa we oli gat ekspiryens oli save givhan? ?Ol mak we yumi putum, olsem wanem oli givhan long yumi blong wok strong? ?Yumi save ting se bambae yumi kasem wanem gudfala frut? Bambae yumi ansa long ol kwestin ya mo sam moa bakegen long fo moa haf long ol Kingdom Wok long fyuja.