Mekemgud Minista Wok Wetem Longfala Tingting
1 Aposol Pol i holem wan gudfala tingting long fored blong Jeova long saed blong minista wok blong hem. Hem i mekemgud wok ya mo hem i gat longfala tingting long olgeta we hem i talemaot gud nyus long ol. Taem ol elda long Efesas oli hivap wanples, hem i talem stret long olgeta se: “Mi no moa tingbaot laef blong mi, mi wantem kasem en blong rod blong mi. Mi wantem finisim wok ya we Jisas, Masta blong yumi i givim long mi blong mi mekem. Wok ya i blong talemaot [gud nyus blong gladhat blong God, NW].” (Wok 20:24) ?Yumi harem we i impoten blong yumi mekem olsemia?—1 Korin 9:16.
TAEM YUMI WOKEM SEM TERITORI EVRITAEM
2 Taem yumi mas wok long sem teritori evritaem, yumi nidim longfala tingting moa. Nating we teritori i smol, be yumi mas wantem gobak evritaem long ol man long hem. Traehad blong storeyan wetem evri man long evri haos. Sloslou yumi save givhan long ol man we oli gat gudhat blong tinghae long hop blong Kingdom blong God, we i stanap long Baebol.
3 Taem yumi wok long sem teritori evritaem, longfala tingting blong yumi i karem wan narafala gudfala frut: Yumi save frengud wetem ol man wanwan long evri haos. Samting ya i save mekem se olgeta oli no fraet blong storeyan wetem yumi. Reasoning buk i talem sam nambawan fastok we yumi save yusum blong jenisim fastok blong yumi long ol teritori we yumi wokem plante taem.—Luk Reasoning, pej 9-15.
4 Samtaem yumi storeyan wetem man we hem i intres long trutok, be i no wantem buk no magasin. ?Yumi mas mekem wanem? Sipos yumi wantem mekemgud minista wok blong yumi, bambae yumi traehad blong mekem intres ya i gru moa. Sipos yumi halpem sid we yumi planem finis long hat blong hem i gru, maet bambae man ya i wantem wan Baebol stadi. Wan brata i mekem plante visit long wan man gogo faef wik i pas, be hem i no givim wan buk no magasin long hem. Ale, long namba sikis visit, man ya i wantem buk, mo biaen brata i statem wan Baebol stadi wetem hem.
GIVIMAOT OL BUKLET
5 Long Julae mo Ogis, Stampa Tok Blong Prij i olsem: “Wan Nyufala Wol—?Bambae Hu i Mekem?” Stampa Tok ya i gud blong joenem wetem wan long ol buklet ya: !Yu Yu Save Harem Gud Blong Olwe Long Wol!, “Look! I Am Making All Things New,” Should You Believe in the Trinity?, The Divine Name That Will Endure Forever, mo Gavman Ya We Bambae i Mekem Paradaes. Sipos yumi ridimgud ol buklet ya fastaem, yumi save faenem plante poen blong yusum wetem Stampa Tok Blong Prij.
6 Olsem nao, yumi save talem nem blong yumi. Afta, yumi save talem se: “?Yu yu tingting olsem wanem long ol promes blong ol man blong mekem pis long wol? [Wet long ansa.] Yu luk olsem wanem Baebol i tokbaot ol wok blong ol man blong traem kasem pis. [Ridim Jeremaea 10:23.] Long ol yia we oli pas finis, man i soemaot klia se hem i no naf blong rul long hem wan. Be makemgud promes ya blong God we yumi save trastem. [Ridim 2 Pita 3:13.] Taswe yumi save sua se promes blong God blong mekem wan nyufala wol bambae i kamtru.” Nao yumi save pulum man blong haos blong ridim wan long ol buklet. Sipos yumi yusum “Look!” buklet, yumi save tekem pej 30, haf 58. Sipos yumi soemaot Gavman buklet, yumi save ridim fas haf long pej 3. Pija long fored blong buklet ya, Yu Yu Save Harem Gud, i save pulum ae blong man, mo hem i joengud wetem Stampa Tok Blong Prij. Mo tu, yumi save yusum haf 3 long pej 31 blong buklet ya, Divine Name.
7 Sipos yumi mekemgud wok blong talemaot gud nyus wetem longfala tingting long ol teritori blong yumi, samting ya i save sevem laef blong ol man we oli lesin long yumi. (1 Tim. 4:16) !Smoltaem nomo i stap! Taswe yumi mas soemaot longfala tingting mo mekemgud wok blong yumi, taem yumi stap joen fulwan blong talemaot mesej we i save sevem ol man.