!Wok Wetem Fulhat Blong Yu!
1 I gat fulap risen blong talem tangkyu long Jeova. Yumi gat tangkyu long hem from ol samting we hem i mekem finis, we hem i stap mekem naoia, mo we bambae hem i mekem long fyuja. ?Tangkyu we yumi gat long hem i mas pusum yumi blong mekem wanem? Wan Sam blong Deved i ansa se: “Mi bambae mi talem tangkyu long Hae God oltaem, bambae mi presem hem oltaem nomo.”—Sam 34:1.
2 Baebol i givim wan klia oda long yumi blong prij. Hemia wan wok we yumi mekem ‘wetem fulhat blong yumi, olsem we yumi stap mekem long Jeova, yumi no stap mekem wok blong ol man nomo.’ (Kol. 3:23) ?Sipos yumi wok wetem fulhat blong yumi, bambae yumi spenem hamas taem long wok blong prij? !Taem yumi tingbaot ol samting we Jeova i mekem long yumi from lav blong hem, hat blong yumi i mas pusum yumi blong joen fulwan long wok blong talemaot hem mo ol nambawan stampa tingting blong hem! Bambae hat blong yumi i pusum yumi blong mekem olgeta samting we yumi naf blong mekem.
3 I stret blong ting se wan man we i wok wetem fulhat blong hem, bambae i tingting oltaem long tabu wok blong God. I klia se man blong raetem Sam ya i harem olsemia, from hem i talem se: “Mi mi stap leftemap nem blong yu seven taem long wan dei.” (Sam 119:164) Olgeta we oli gat sem tingting olsem man we i raetem Sam ya, oli lukaot jans blong presem Jeova. Oli wok strong long wok blong Jeova, olsem we oli naf blong mekem long laef blong olgeta.
4 Yumi Kasem Plante Jans Blong Presem Jeova: Yumi no nidim blong wet kasem taem we yumi go prij long ol haos wanwan, blong talemaot gud nyus. Ol man we oli wok wetem yumi, ol yangfala long skul, ol famle, mo ol narafala we yumi save olgeta, oli nidim blong harem mesej blong Kingdom. Taem yumi mekem wan trep blong go samples, yumi save givim wetnes taem yumi storeyan wetem ol man we oli wok long hotel, restorang, ol stesen blong bensin, mo ol man blong draevem taksi. Taem yumi stap long haos, yumi save prij long ol man raonabaot, mo ol man we oli karem ol samting i kam long haos blong yumi. Sipos yumi slip long hospital from wan sik, yumi save tekem jans blong prij long ol dresa, ol dokta mo ol narafala sikman.
5 Tekem Evri Jans Blong Prij i Karem Frut: Wan dei, tu Wetnes oli stap wokbaot long wan bigfala ples blong spel, nao oli stat storeyan wetem wan yangfala man we hem tu i stap wokbaot wetem pikinini blong hem. Sloslou, hem mo woman blong hem tufala i bilif long trutok. Biaen, yangfala man ya i talemaot se smoltaem nomo bifo we hem i mitim tufala Wetnes ya, hem i bin prea long God se: ‘Sipos yu stap, plis mekem mi mi save.’ Hem i bilif se samting we i hapen long ples blong spel ya, hem i rod we Jeova i yusum blong ansa long prea blong hem.
6 Olgeta we oli wok wetem fulhat blong olgeta from we oli wantem halpem ol narafala long saed blong speret, oli kasem bigfala glad. Oli save se Jeova i glad long wok we oli mekem “wetem fulhat blong olgeta.”—1 Kron. 28:9.