Yumi Gat Gudhan Blong Talemaot Trutok
1 Ol man oli save lesin long gud nyus sipos yumi gat gudhan blong yusum Tok blong God. Pol i enkarajem yumi blong kam gud moa long wok ya, i se: “Yu mas traehad long evri rod blong kam we yu wan man blong ol wok we God i stap harem gud long yu. Long fes blong hem, yu mas kam we yu no gat sem long ol wok blong yu, we yu wan man we yu stap tijim ol man long trutok blong God, long stret fasin nomo.”—2 Tim. 2:15.
2 Yumi mas traehad blong gat gudhan blong yusum Baebol. Yumi mas gat taem blong stadi wanwan mo go long ol Kristin miting. Be hemia i no naf. Yumi mas yusum Baebol long minista wok blong mekem ol samting we yumi lanem i wok. Yumi mas traehad oltaem long wok ya mo askem God blong givhan long yumi mo soemaot rod long yumi.—1 Jon 3:22.
3 Yusum Tok Blong God: I impoten tumas blong ol man oli luksave se mesej we yumi talemaot i no blong yumi, be i kamaot long Tok blong God. (Jon 7:18) Blong pulum tingting blong wan man long wan samting, yumi mas soemaot long Baebol wanem tingting blong God long bisnes ya. Mesej blong Baebol i gat paoa blong pulum ol man we oli gat gud hat. Taem yumi yusum Baebol plante taem, yumi save gat gudhan blong yusum mo bambae ol man oli save gat moa jans blong lukluk insaed long Tok blong God. Mo bambae i givhan long olgeta.
4 Plante man oli no save gud Baebol. Taswe i no naf blong yumi ridim ol vas blong Baebol nomo. Yumi mas tingtinggud fastaem olsem wanem yumi save tokbaot wan vas long Baebol. Yu save askem sam kwestin no tokbaot wan trabol we kamaot, blong pulum ol man i intres. Mo tu yumi mas tingtinggud long ol samting we yumi save talem afta we yumi ridim finis wan vas long Baebol. Maet man ya i no save kasem poen taem yumi ridim wan vas long Baebol. Sipos yu talem bakegen ol impoten tok mo talemaot sam eksampel long hem, bambae hem i save kasem tingting we yu wantem talem long hem.—Lukluk School Guidebook, stadi 24 mo 25.
5 Seremaot Buk: Long Novemba taem yumi faenem ol man we oli intres, bambae yumi seremaot New World Translation of the Holy Scriptures mo Trutok buk long olgeta. ?Olsem wanem blong givimaot ol buk ya? Taem yu talem nem blong yu finis, yu save talem se: “Tede, plante man i traem faenem sam man no sam buk blong givim sam advaes long olgeta blong oli folem. ?Be yu ting se wanem samting nao i save givhan long ol man? [Letem hem i ansa.] Baebol i tokbaot wan man we i givim waes long yumi. [Ridim Proveb 2:6, 7.] Waes blong ol man i no save wok, i mekem ol man i trabol mo oli harem nogud. Waes blong God nomo, oltaem hem i stret mo ol man oli save harem gud from. [Ridim Aesea 48:17, 18.] Taswe i stret nomo blong yumi lukluk i go long God we hem i save soemaot ol rod we yumi nidim blong winim ol trabol we i stap kasem yumi.” Afta, yu save tekem wan japta long Trutok buk we i stret, mo yusum wan poen long japta ya blong joenem tok blong yu.
6 Taem yu yu yusum Proveb 2:6, 7 blong soemaot olsem wanem waes blong God i antap moa long waes blong man, yu save tokbaot New World Translation Baebol mo eksplenem long man blong haos wanem i givhan long yu, blong respektem mo tinghae long Baebol. Talem long hem se ol tijing blong Baebol oli save givhan long hem mo oli givim wan gudfala hop long fyuja. Wan storeyan olsem i save givim jans long yu blong soemaot sam advaes long Baebol we i save stretem ol trabol blong tede. Mo yu save statem wan Baebol stadi.
7 Oltaem Jisas i yusum Baebol blong givhan long ol man we oli gat gud hat, mo hem i yusum tu blong soemaot ol gyaman tingting blong ol enemi blong hem. Pol i gat fasin blong ‘eksplenem mo pruvum wetem Baebol’ taem hem i stap tijim ol man. (Ol Wok 17:2, 3) Taem yumi stap traehad blong kam gud moa blong talemaot trutok blong Baebol, samting ya i mekem tingting blong yumi i strong mo yumi glad blong mekem wok blong prij.