Talemaot Gud Nyus—Yusum Ol Buk Blong Sosaete Long Waes Fasin
1 Long program blong spesel dei asembli long 1991 tiokratik yia, wan tok i stap tokbaot “Minista Wok Blong Yumi—i No Samting Nating, Hem i Tabu.” I makem se wok blong yumi i tabu mo yumi no save ting nating long hem. Yumi nidim ol buk blong givhan long yumi long minista wok blong yumi, taswe yumi mas gat respek long ol samting ya. Yumi wanwan yumi save soemaot dip respek mo filing taem yumi yusum gud ol buk ya.
2 Long 1990 tiokratik yia, Sosaete i wokem 678 milyan magasin mo bitim 51 milyan Baebol mo buk blong yusum long wok blong prij. I min se oli spenem bigfala taem, paoa, mo mane long ol buk ya. Olgeta we oli stap wok fri nomo oli traehad blong givhan blong wokem plante buk blong stadi wanwan mo tu blong yusum long wok blong prij. ?Olsem wanem yumi save soemaot fasin tangkyu from ol buk blong yumi taem yumi stap talemaot mesej blong Kingdom long ol man we hat blong olgeta i gud?
3 Famle Stadi Mo Stadi Wanwan: Long Rom 2:21 aposol Pol i talem se: “?Man, yufala i save tijim ol narafala man, be weswe yufala i no tijim yufala?” Yumi mas tekem taem blong rid, stadi, mo tingting dip wetem prea long ol samting we yumi lanem long ol buk. Taem yumi mekem olsem, yumi stap soemaot se yumi wanwan i gat fasin tangkyu from kakae long saed blong speret we Jeova i givim tru long slef we i stret mo waes. (Luk 12:42) Taem yumi mekem stadi wanwan no famle stadi, yumi stap kasem ol nyufala trutok we oli kamaot oltaem. Mo i mekem se yumi tinghae long wok we Jeova i givim long yumi. Ol papa mama oli mas tijim gud ol pikinini blong olgeta blong gat fasin tangkyu mo kea gud long ol buk blong olgeta. Oli no mas putum ol mak olbaot long hem. Ol buk mo magasin we yumi wantem yusum long wok blong prij oli mas stap gud long haos long ples we i klin.
4 No Westem: Blong man i kasem blesing, ol buk blong yumi oli mas go long han blong olgeta we oli stap lukaot trutok, hemia olgeta we oli intres long mesej mo wok blong yumi. (Mat. 10:11) voir: Yumi no mas givimaot long enikaen man nomo we hem i no rili soemaot intres long mesej blong Baebol. Yumi save westem tu sipos yumi hivimap ol magasin mo buk long haos blong yumi.
5 Oli putum wan dei mo wan manis long fas pej blong ol magasin. Taswe i gat prapa taem blong seremaot olgeta. Yumi mas mekem gud plan blong go long wok blong prij blong seremaot ol magasin long olgeta we oli intres. Sipos yumi faenem se namba blong magasin i stap go antap, maet yumi jenisim program blong yumi blong joen moa long wok blong seremaot magasin. Sipos yumi no save mekem olsem, i gud blong katemdaon oda blong yumi. Sipos yumi folem ol advaes ya, bambae yumi soemaot we yumi gudfala man blong wok blong God, we i talemaot gladhat blong hem long ol man.—1 Korin 4:2; 1 Pita 4:10, 11; lukluk Luk 16:1, 10.
6 Jeova i “putum long han” blong ol man we oli blong hem nomo, wan hevi responsabiliti mo wok, olsem “olgeta samting” we i putumap slef we i stret mo waes blong bos long hem. (2 Tim. 1:12; Luk 12:42-44, 48b; 1 Tim. 6:20) Yumi glad long jans ya we yumi gat blong mekem wok blong Jeova. I gud blong stap gohed blong yusumgud ol buk blong talemaot gud nyus long ol narafala man.