Lukaotgud Long Ol Samting We Tiokratik Ogenaesesen i Givim
1 King Josaea i talem gudfala toktok long ol man we bambae oli mekem gud haos prea bakegen, i se: “Bambae yu no trabol blong jekemap wok blong ol man blong lukaot long mane ya, from we fasin blong olgeta i stret gud.” (2 King 22:3-7) Fasin blong ol man ya blong yusum gud mane we i stap long han blong olgeta, i soemaot tangkiu we oli gat from ol tabu samting. Tede tu, taem yumi joen long tabu wok blong talemaot gud nius blong God, yumi mas gat fasin we i stret gud taem yumi yusum ol samting we ogenaesesen blong God i givim.
2 Long Wok Blong Prij: Sipos yumi gat tangkiu from impoten toktok we i stap long ol buk blong yumi mo sipos yumi tingbaot bigfala mane we i nidim blong wokem ol buk ya, bambae yumi tinghae long olgeta. Yumi no mas givimaot ol buk ya long olgeta we oli no gat tangkiu from ol tok blong Baebol. Sipos wan man i intres smol nomo long gud nius, maet yumi givim wan traket long hem, be i no ol buk mo magasin.
3 Yumi mas givimaot ol buk no magasin long fasin we i soem se yumi tinghae long olgeta olsem ol sas samting. Yumi no mas putum olgeta olbaot long ol pablik ples we ol man oli save spolem olgeta mo saksakem olgeta olbaot. Blong mekem se yu no westem ol buk mo magasin, i gud yu kaontem hamas i stap long haos blong yu bifo we yu tekem moa. Sipos oltaem yu gat plante tumas magasin long haos, yu save tingbaot blong katem namba blong ol magasin long oda blong yu.
4 Ol Buk Blong Yu: Yumi mas oda nomo long ol buk we yumi rili nidim. Antap moa, yumi mas lukaot blong no oda tumas long ol buk olsem Baebol we kava blong hem oli wokem long skin blong buluk, no Reference Bibles, mo ol narafala bigfala buk olsem Concordance, Index, Insight mo Proclaimers. I tekem bigfala mane blong wokem ol buk ya.
5 ?Yu yu stap raetem nem mo adres blong yu long ol prapa buk blong yu? I gud blong mekem olsem, from we sipos yu lusum wan buk bambae i moa isi blong faenem bakegen mo yu no nid blong tekem narawan. Sipos yu lusum wan singbuk, Baebol, no wan buk we yumi stadi long hem, ating bambae yu faenem bakegen long Haos Kingdom no long ples blong asembli we oli putum ol samting we oli lus long hem.—Luk 15:8, 9.
6 I gud yumi traehad blong yusum ol buk long waes fasin. Hemia wan rod blong soemaot se yumi stap mekem i stret gud long ol samting blong Kingdom we Jeova i givim long yumi.—Luk 16:10.