?Bambae Yu Talem Wanem Taem Yu Gobak?
1 Blong minista wok blong yumi i karem frut yumi mas mekem rere fastaem bifo yumi mekem visit long ol man we oli soem intres, nao bambae yumi save mekem intres blong olgeta i gru moa mo gohed blong toktok wetem olgeta. ?Olsem wanem blong mekem olsem?
2 Ol trufala Kristin oli rili intres long ol narafala man, taswe taem yu mekem visit maet i gud yu save tokbaot ol samting we yu bin save finis from man blong haos i talem long yu.
Yu save talem long man we i talemaot wari blong hem long fasin blong brekem loa, se:
◼ “Taem yumitu storeyan lastaem yu talem se yu wari tumas from fasin blong brekem loa we i stap kam antap. ?Yu ting se sipos yumi gat plante moa polisman bambae trabol ya i finis?”
Sipos wan man i wari from ol samting we oli stap kamaot long wol tede, yu save talem long hem olsem se:
◼ “Lastaem yumitu stap storeyan yu tokbaot wan gudfala poen se i no gat pis long wol. ?Yu ting se ol lida blong wol bambae oli save mekem wan nyufala fasin long wol ya?”
Yu save talem long wan man we i harem nogud from fasin blong man i tingbaot hem wan nomo, se:
◼ “Lastaem yumitu storeyan yu talem wan gudfala poen long fasin griri we yumi luk plante man tede oli gat. ?Wanem tingting blong God long ol man we oli griri? [Letem hem i ansa.] Baebol i talem olsem long Efesas 5:5.”
3 I gat sam narafala tok we oli gud blong yusum, olsemia se:
◼ “Mi mi glad tumas long storeyan we yumitu gat lastaem, taswe mi jekemap tingting ya blong soemaot long yu olsem wanem Jeova i tingbaot ol man we oli no gat haos. Makem long Aesea 65:21-23.”
◼ “Mi glad long tok ya blong yu se ol man oli nidim wan gavman we i gud moa.”
◼ “Yu bin askem wan gudfala kwestin se God i laekem olgeta skul no no gat.”
◼ “Mi stap tingbaot samting we yu talem lastaem long saed blong bilif ya se God i makemaot finis ol samting we oli kamaot long laef blong ol man wanwan.”
Ol fastok olsem oli soemaot se yumi glad long ol tok we yumi mekem fastaem wetem ol man mo yumi intres blong toktok wetem man blong haos bakegen.
4 Bifo we yu mekem visit, tingbaot wanem bambae yu talem. Mekem tok blong yu i stret long olgeta man wanwan.
5 Sipos man we yumi mekem visit long hem i bisi, yumi save toktok gud yet wetem hem olsem se:
◼ “Mi save se yu gat smoltaem nomo, be mi gat samting we yu save tingbaot taem yu yu finisim wok blong yu. [Ridim Matyu 5:3.]”
Sipos no yu save talem se:
◼ “Mi raetemdaon ol tri vas ya blong Baebol long yu. From we naoia i no stret taem blong yumi storeyan, bambae mi mi livim wetem yu, mo taem mi kambak, bambae mi mi toktok wetem yu long faef menet.”
6 Yu No Mas Gat Tingting We i No Stret: Ol kwestin we maet oli save mekem man blong haos i sem no i harem nogud long tingting blong hem oli no save karem gudfala frut. Ol kwestin olsem se: “?Yu yu ridim ol samting we mi bin livim wetem yu?” “?Yu yu gat sam kwestin?” “?Yu yu tingbaot mi yet?” “Mi mi kambak blong askem sipos yu yu intres yet blong tokbaot ol plan blong God long saed blong wol ya.”
7 Bambae yumi wantem tumas blong visitim ol man we yumi luk olgeta finis mo oli soemaot intres sipos yumi stap mekemrere gud fastaem blong givhan long olgeta long fasin we i stret nomo.