Ol Fastok Blong Pulum Ol Man Blong Haos Oli Lesin
1 ?Wanem impoten haf blong toktok we yu mekem long ol haos wanwan? Plante long yumi i save agri se hemia fastok blong yumi.
2 ?Wanem samting yu mas tingbaot taem yu mekemrere wan gudfala fastok? Tingbaot ol kastom mo ol nid blong ol man we bambae yu mitim long wok blong prij. ?Long ples blong yu, i kastom blong ol man oli tokbaot ol smosmol samting we oli no impoten tumas fastaem, no oli save ting se bambae yu go stret long wanem yu wantem tokbaot? ?I gat plante yangfala mared man long ples blong yu? ?Wanem trabol blong olgeta? ?Ol man we oli stap kolosap long yu oli wari long ol trabol we ol man oli stap fesem?
Maet yu save pulum olgeta blong lesin, sipos yu talem samting olsem se:
◼ “Gud moning. Nem blong mi ______. Mi mi wari taem mi ridim long nyuspepa se ol man oli stap hanggri mo oli stap ded long ol faet. ?Yu yu harem olsem tu?” Ol narafala kwestin we maet oli givhan long yu blong statem toktok, olsem se: “?Wanem samting i save givhan blong winim ol trabol blong wol?” “?Yu ting se i gat man we i save finisim ol trabol blong wol tede?” “?Sipos wan man blong rul i kasem ol mak olsem we oli stap long Aesea 9:6,7? [Ridim mo tokbaot vas ya.]”
3 Long sam teritori, ol man oli wari moa long haos mo famle blong olgeta bitim we oli wari long ol bigfala trabol blong wol olsem pis long fulwol.
Maet yu save wekemap intres blong olgeta taem yu askem olgeta olsem se:
◼ “?Wanem kaen laef yu mo famle blong yu bambae yufala i gat long ten yia we i kam? Baebol i givim wan fyuja we i leftemap tingting blong ol man from we i tokbaot wan man blong rul we bambae i kam mo i rul long fasin we i stret gud olgeta. Makem samting ya long Aesea 9:6, 7 we i tokbaot hem.”
4 ?Yu yu laef long wan ples we oltaem ol man oli stap tokbaot fasin blong brekem loa mo seftaem? Sam man oli save lesin sipos yu yusum ol fastok we i stap aninit long taetal ya “Crime/Safety” long pej 10 (Engglis) mo pej 11 (Franis) blong Reasoning buk.
Yu save talem se:
◼ “Halo. Mifala i stap toktok wetem ol man wanwan long saed blong seftaem. Plante fasin blong brekem loa i stap raonabaot long yumi, mo samting ya i save spolem laef blong yumi.” Nao yu save askem kwestin olsem se, “?Olsem wanem blong winim ol trabol ya?” No yu save askem se, “?Yu ting se i gat wan man we i naf blong finisim ol trabol ya long wol?” No, “?Sipos wan man blong rul i kasem ol mak olsemia?” Ol kwestin olsem oli save givhan blong statem toktok. Nao biaen yu save ridim Aesea 9:6, 7.
5 Yumi evriwan, ol yangfala we oli stap go long skul, oli save yusum vas ya blong Baebol blong toktok wetem ol man. Maet yu wantem traem taem yu soem ol magasin. Tingbaot se, mak blong yumi i blong mekem gud nyus i go long olgeta ples taem yumi yusum ol buk mo magasin. Traem faenem ol rod blong givim ol magasin nating sipos man blong haos i no soem bigfala intres. Yumi sua se plante bambae oli glad blong yusum ol tok ya long manis Janewari, taem oli seremaot ol magasin mo ol buk blong manis Janewari.
6 Sipos yu yusum gud ol advaes we yumi tokbaot finis antap, bambae yu yu save kasem impoten mak ya blong pulum ol man blong haos oli lesin long yu.