Mekemrere Fastok Blong Febuwari
1 Long Febuwari, yumi givimaot buklet ya Speret Blong Ol Dedman. Bambae yu faenem se i gud blong lanem mo yusum wan long ol fastok we i stap.
2 Ol Speret Oli No Stap Laef Mo Ded Long Wol: Sipos yu wantem toktok wetem ol man we oli wari long saed blong ol dedman, traem stampa tok ya: “Ol Speret Oli No Stap Laef Mo Ded Long Wol.” Stampa tok ya i isi blong pulum tingting blong ol man we oli wari from paoa blong ol speret blong ol man. Vas blong yusum hem i Jenesis 3:19. Stampa tok mo vas, buklet ya Speret Blong Ol Dedman i eksplenem long pej 4.
3 Afta we yu talem nem blong yu, yu save talem se:
◼ “Mi jes pas sot taem nomo blong tokbaot wan samting we plante long yumi, yumi wari from. Plante milyan man oli bilif se ol dedman oli go long narafala wol blong ol speret man, long ples ya oli save lukluk mo gat paoa long laef blong ol man long wol. ?Yu ting se bilif ya i tru? [Spel smol blong man blong haos i talem tingting blong hem sipos hem i wantem.] Jes blong sot taem nomo, mi mi wantem soemaot long yu wanem Baebol i talem long saed blong poen ya long Jenesis 3:19.” Ridim vas, mo soemaot ol tok we i stap long pej 4 mo 5 long buklet ya Speret Blong Ol Dedman.
4 Rabis Fasin Bambae i Lus: Blong toktok wetem ol man we oli wari from fasin blong brekem loa, raf fasin, mo faet, maet yu save storeyan wetem olgeta long stampa tok ya: “Paradaes Long Wol.” Ol Sam 37:9-11 i makemaot poen ya, mo long buklet ya i eksplenem long pej 30-31.
5 Folem fasin blong fastok yu save talem se:
◼ “?Yu ting se i gat taem i stap kam we bambae yumi no moa wari from fasin blong brekem loa mo ol raf fasin? [Letem man blong haos i ansa.] Baebol i givim ansa long ples ya long Ol Sam 37:9-11.” Ridim vas mo tanem i go long pej 28-31 long buklet ya Speret Blong Ol Dedman blong ridim ol haf we yu jusum finis.
6 Hop Blong Laef Bakegen Long Ded: From we samtaem ol man oli stap lusum olgeta we oli laekem tumas long ded, i gud blong storeyan wetem olgeta long stampa tok ya: “Wan Gudfala Fyuja.” Yu save yusum wan long tufala vas ya Jon 5:28, 29 no Luk 23:43 mo soemaot ol tok mo vas we yu save faenem long buklet ya Speret Blong Ol Dedman long pej 28-29.
7 Yu save statem storeyan blong yu wetem namba tri fastok we i stap long pej 14 long buk ya “Reasoning” mo talem se:
◼ “Samtaem plante long yumi, oli stap tingbaot ol man we yumi laekem we oli ded finis. ?Be yu ting se bambae yumi save luk olgeta bakegen? [Letem man blong haos i talemaot tingting blong hem.] Plante man we yumi askem olgeta oli sapraes tumas blong lanem se Tok blong God i mekem promes ya mo samting ya bambae i kamaot long wol ya. Makem promes blong Baebol long . . . ” Yusum wan long tufala vas ya Jon 5:28, 29 no Luk 23:43 mo joenem storeyan wetem ol tok we i stap long buklet ya Speret Blong Ol Dedman no ol pija we oli stap long pej 28-29.
8 Long manis ya mekemrere mo yusum wan long olgeta fastok ya. I no had blong faenem ol stret toktok mo pija long buklet ya. Sipos ol man oli no intres bigwan, givim ol traket we i stret long tok blong yu.