Ansa Long Wan Kwestin
◼ ?Bifo we ol pikinini blong ol Kristin papa mama oli kam pablisa we i no baptaes, oli save joen long wok blong prij go kasem wanem mak?
Ol Kristin papa mama oli wantem se ol pikinini blong olgeta oli kam bigman long saed blong spirit, we oli mekem wok blong Jeova wetem fulhat blong olgeta. (1 Saml. 2:18, 26; Luk 2:40) Taem ol pikinini blong ol Kristin papa mama oli smol nomo, oli mas naf blong talemaot klia from wanem oli bilif long samting we Baebol i talem. Sipos oli folem papa mama blong olgeta long wok blong prij, stat taem oli bebi nomo, bambae oli gru hareap long saed blong spirit. Be blong haremgud long wok blong prij, mo blong wantem kam pablisa we i no baptaes, mo blong gohed olwe long wok blong talemaot Kingdom, pikinini i mas wantem wetem fulhat blong hem blong joen long wok blong prij. I nidim we ol papa mama oli trenemgud olgeta. (1 Tim. 4:6; 2 Tim. 2:15) Sam samtaem, ol narafala pablisa oli save givhan tu, sipos papa mama i agri.—Lukluk Minista Wok Blong Yumi, pej 95.
Taem pikinini we i gat gudfala fasin i joen wetem Kristin papa mama blong hem blong prij long evri haos, hem i lanem fasin blong prij. Be bifo we hem i save kam wan pablisa we i no baptaes, hem i mas gat save mo i mas naf blong yusum save ya. Ol papa mama nao oli mas luksave wanem wok we pikinini blong olgeta i naf blong mekem taem oli stap prij wetem hem. Ol pikinini we oli no pablisa yet oli no mas prij olgeta nomo, mo oli no mas prij wetem ol narafala pikinini long kongregesen. Ol papa mama oli save rerem ol pikinini blong olgeta blong prij, oli save givim smol wok long olgeta, olsem ridim wan vas, givim wan traket no magasin, no soem pija long wan buk. Taem pikinini i kam bigwan lelebet, hem i save joen moa blong storian wetem ol man.
Sipos ol papa mama oli trenemgud pikinini blong olgeta, ol yangfala ya bambae oli gohed gud mo lanem gudfala fasin, mo bambae oli luksave se wok blong prij i no wan pleplei be i wan samting we oli mas tinghevi long hem. Ol papa mama oli no mas sanem pikinini blong olgeta we i no pablisa yet i go hem wan long miting blong prij, blong narafala i lukaot long hem. Ol papa mama we oli kea long pikinini blong olgeta, oli save se i wok blong olgeta nao blong tijim pikinini mo wok klosap long hem. Be i tru, maet sam narafala pablisa oli glad blong givhan blong trenem ol yangfala long kongregesen we oli soem se oli rili wantem mekem wok blong Jeova.