Tijim Ol Pikinini Blong Yu Blong Oli Presem Jeova
1. ?Olsem wanem? ?Ol pikinini oli save presem Jeova?
1 Ol Sam 148:12, 13 i leftemap tingting blong ol boe mo gel blong oli “presem nem blong [Jeova].” Baebol i tokbaot plante pikinini we oli mekem olsem. “Boe ya Samuel i stap wok blong Hae God.” (1 Saml. 2:18) “Wan smol gel” nomo i talem long woman blong Neman se profet blong Jeova we i stap long Isrel i save tekemaot sik ya leprosi long Neman, nao hem i save kamgud bakegen. (2 King 5:1-3) Taem Jisas i go insaed long haos blong God mo i mekem ol merikel, “ol pikinini” oli singaot se: “Hosana long Laen ya blong King Deved.” (Mat. 21:15) ?Olsem wanem ol papa mama oli save tijim ol pikinini blong olgeta blong oli presem Jeova?
2. ?From wanem i impoten we ol papa mama oli soem gudfala eksampol long ol pikinini blong olgeta?
2 Eksampol Blong Papa Mama: Jeova i givim oda long ol papa long Isrel se fastaem olgeta nao oli mas lavem Jeova mo fasem ol tok blong hem long prapa hat blong olgeta, nao biaen oli save putum trutok long hat blong ol pikinini blong olgeta. (Dut. 6:5-9, NW ) Sipos yu tokbaot ol gudfala samting long saed blong wok blong prij mo yu joen long wok ya evri wik, ol pikinini blong yu bambae oli luk se wok blong prij i impoten mo i givim glad.
3. ?Olsem wanem eksampol blong wan papa mama i givhan long dota blong tufala?
3 Wan sista i glad taem hem i tingtingbak long laef blong hem, i se: “Taem mi mi stap gruap, famle blong mifala i folem fasin ya blong joen long wok blong prij long evri wiken. Mi luk se papa mama blong mi, tufala i rili laekem wok blong prij. Mifala i gruap wetem tingting ya se wok blong prij i wan samting we i givim glad.” Taem sista ya i gat seven yia blong hem, hem i kam wan pablisa we i no baptaes, mo naoia, hem i mekem wok blong fultaem paenia i bitim 32 yia finis.
4. ?Olsem wanem blong trenem ol pikinini blong oli gohed gud?
4 Trenem Olgeta Blong Oli Gohed: Taem yufala i stap prij, askem long ol pikinini blong yu blong oli mekem sam samting. Maet oli save noknok long doa, givimaot wan traket long man blong haos, no ridim wan vas blong Baebol. Hemia bambae i mekem oli glad moa, mo i save givhan long olgeta blong oli no fraet blong talemaot gud nius blong Kingdom. Taem oli stap kam bigwan moa, oli save mekem sam moa samting long wok blong prij. Taswe, givhan long olgeta blong oli gohed gud mo blong oli tingbaot sam mak we oli wantem kasem long wok blong prij.
5. ?I nidim wanem blong wan pikinini i kasem mak we hem i naf blong kam wan pablisa we i no baptaes?
5 Taem yu luk se ol pikinini blong yu oli naf blong kam ol pablisa we oli no baptaes mo oli talemaot long yu se oli wantem kam pablisa, yu mas talemaot long ol elda. Taem oli kam pablisa, samting ya bambae i makem long tingting blong olgeta se wok blong presem Jeova i wan wok blong olgeta wanwan. Tingbaot se blong wan pikinini i kasem mak we hem i naf blong kam wan pablisa, i no nid blong hem i save plante samting olsem wan bigman we i baptaes finis.?Olsem wanem? ?Pikinini blong yu i kasem save long ol stamba tijing blong Baebol? ?Hem i folem ol rul blong Baebol long saed blong ol gudfala fasin? ?Hem i wantem joen long wok blong prij mo kam wan Witnes blong Jeova? Sipos yes, maet ol elda oli luk se hem i naf blong kam wan pablisa we i no baptaes.—Lukluk buk ya, Organized to Do Jehovah’s Will, pej 79-82.
6. ?From wanem i no blong nating nomo we ol papa mama oli mekem bigfala traehad blong trenem ol pikinini blong olgeta?
6 I nidim bigfala traehad blong tijim ol pikinini blong oli presem Jeova wetem fulhat blong olgeta. Be ol papa mama oli save kasem bigfala glad taem oli luk ol pikinini blong olgeta oli gohed gud long saed blong spirit. I no gat plante samting we i save mekem ol papa mama oli glad olsem. Samting we i moa impoten se, Jeova i glad taem ol pikinini oli talemaot ol nambawan wok blong hem.