Papa Mama—Tijim Pikinini Blong Yu Blong Prij
1 Wan blesing long ol kongregesen blong yumi, hemia ol pikinini we oli rili wantem mekem wok blong God. (Ekles. 12:1) Wetem ol narafala man, Jeova i singaot olgeta tu blong presem hem. (Sam 148:12-14) Taswe, insaed long tijing we ol papa mama oli givim long ol pikinini blong olgeta evri dei, i mas gat hemia long saed blong fasin blong serem bilif blong olgeta wetem ol narafala, long wok blong talemaot Kingdom.—Dut. 6:6, 7.
2 Tijim Ol Pikinini Sloslou: I stret we papa mama i tijim pikinini taem hem i smol nomo, blong folem tufala long wok blong prij. Bifo we yufala i prij, rerem pikinini blong yu blong mekem wan smol wok long evri haos. Makemaot fastaem wanem samting yu wantem hem blong mekem. Ol smosmol pikinini oli save givimaot ol traket mo pepa blong singaot ol man blong kam long Haos Kingdom. Yu save askem pikinini we i ridgud, blong ridim sam vas. Oli save storeyan smol mo seremaot ol Wajtaoa mo Wekap! Taem oli gohed moa, tijim olgeta blong yusum Baebol blong toktok wetem ol man. Plante yangfala pablisa oli bin statem prapa rod magasin blong olgeta, mo oli stap mekem ol visit oltaem tu. I moagud sipos wan pikinini i folem wan bigman, i bitim we hem i go wetem wan narafala pikinini. Bigman ya i save eksplenem long man blong haos se yangfala ya i stap kasem trening long wok blong prij.
3 Wan smol gel i bin askem long ol elda blong givhan long hem blong kam wan pablisa blong Kingdom. Nating se hem i gat faef yia nomo mo hem i no save rid yet, hem i talemaot mesej blong Kingdom long gudfala fasin long ol haos. Hem i lanem ples blong ol vas long Baebol, ale hem i openem Baebol i go long stret pej, nao i askem man blong haos blong ridim vas. Biaen, hem i eksplenem.
4 Mo tu, ol papa mama oli mas givim eksampel long pikinini blong olgeta, se i impoten blong folem wan gudfala program blong joen oltaem long wok blong prij. Ol papa mama oli mas gat prapa taem blong go prij evri wik, mo folem program ya. Olsem nao, bambae pikinini i savegud wetaem hem i mas go prij evri wik.
5 Sipos ol papa mama oli tijim pikinini stat taem hem i smol nomo blong laekem mo haremgud long wok blong prij, samting ya bambae i pusum pikinini ya blong traehad blong kasem ol narafala spesel wok long fyuja, maet olsem wok blong paenia. (1 Kor. 15:58) Yumi evriwan i mas pulum ol pikinini long kongregesen, blong kamgud moa olsem ol man blong presem Jeova.