?Yu Yu Save Mekem Wok Blong Jeova Olsem Paenia?
1 Long distrik asembli “Ol Man Blong Karem Laet” wan man blong givim tok i askem se: “?Yu yu save mekem paenia? ?Bambae yu mekem paenia?” Hem i makem se ol kwestin ya oli stret wetem Amageden, from Amageden i stap kolosap nao, mo samting ya i mekem wok blong prij i moa impoten bitim bifo.—1 Kor. 7:29a.
2 I no gat wan tok we yumi save talem blong se wok blong paenia i strong tumas. Samting ya i nidim fasin blong stretem yumi wanwan mo mekemgud plan long laef blong yumi. Be, minista wok blong yumi “bambae i gat frut blong hem.” (1 Kor. 15:58) ?Yumi save talem sem samting long ol narafala wok we yumi jusum blong mekem mo we hem i kakae taem mo paoa blong yumi? Lav we ol Kristin oli gat long Jeova i pusum olgeta blong wok strong long wok blong hem, mo fasin blong wok strong long wok blong Jeova i lidim plante i go long wok blong paenia.—1 Jon 5:3; Rev. 4:11.
3 Plante yangfala man blong wok blong Jeova we oli jes finis long skul oli tingtinggud blong mekem wok blong paenia. Samting ya i stret nomo. ?Wanem narafala wok we i gud moa long minista wok fultaem? I no gat ya. (Mat. 6:33) Oli mas talemaot gud nyus blong Kingdom blong God; !hemia wok blong Jeova, mo i wan jans blong bisi long wok ya stat taem yumi yangfala yet mo gohed!—Mat. 24:14.
4 ?Ol papa mama yufala i stap leftemap tingting blong ol pikinini blong yufala blong oli mekem wok blong fultaem paenia? ?Ol pikinini blong yufala oli kasem save se yufala i wantem olgeta oli yusum ful hat, sol, tingting, mo paoa blong olgeta long gudfala wok ya? (Mak 12:30) Plante yangfala pablisa oli rere long fultaem paenia taem oli holem evri jans we oli gat blong mekem haftaem paenia taem oli stap yet long skul. !I tru fasin blong wosip olsem i mekem hat blong Jeova i glad!—Prov. 27:11.
5 I tru, i no evriwan we oli save mekem wok blong paenia. Be, nating se yu mared no yu no mared, yangfala no olfala, ?yu bin tingtinggud long bisnes ya long prea blong yu blong mekem wok blong Jeova olsem paenia minista blong gud nyus? (Kol. 3:23) Plante yangfala we oli mared finis oli mekem moa long minista wok blong mekem se wan no tufala tugeta i save kam paenia.
6 Sipos yu no save mekem wok blong fultaem paenia naoia, ?olsem wanem, yu save mekem wok blong haftaem paenia? Maet plante long kongregesen blong yufala oli stap plan blong mekem olsem long Epril. ?Yu yu save joenem olgeta? I tru olgeta man blong wok blong Jeova we oli stap holemstrong long hem oli kasem plante blesing, be antap moa plante blesing i stap long olgeta we oli save yusum moa taem long wok blong Kingdom blong faenem ol man we oli olsem sipsip.—Wok 20:35.