Oli Prentem Bakegen Volyum Blong Wajtaoa
1 Wan man we i stap ridim Wajtaoa i talem se ol magasin ya oli givhan long hem blong kasem plante save bitim ol save we hem i kasem taem hem i stap sikis yia long yunivesiti. Plante man we oli ridim magasin ya oli talem sam tok blong leftemap tingting blong ol man tu afta we oli ridim nomo sam long ol magasin ya. I wan jans blong yumi save karem magasin long ol man we oli rili laekem.
2 Plante long olgeta we oli intres long trutok long sam taem we i pas oli agri blong stadi Baebol. Bambae oli save gohed moa long speret sipos yumi givim sam samting long olgeta we i save mekem save blong olgeta long Baebol i gru.
3 Indeks Blong Ol Buk Blong 1950-1985 i wan nambawan tul blong halpem man blong lukaotem sam poen blong Baebol. Plante pablisa mo ol Baebol stadi oli no gat ol volyum blong Wajtaoa we oli stap long Indeks. I gud blong askem olgeta blong hivimap ol ful kopi blong ol yia 1962 kasem 1974. Mifala i wantem letem yufala i save se i no longtaem bambae oli save kasem ol volyum blong ol yia 1951 kasem 1961 mo, samtaem biaen, ol volyum blong ol yia 1974 kasem 1984 we bambae oli rere tu. Bambae oli save gat ful volyum blong 1951 kasem 1984. !Bambae yumi save gat long laebri blong yumi wanwan olgeta 42 volyum blong Wajtaoa wetem wan Indeks we i save halpem yumi blong kasem olgeta ansa blong kwestin blong yumi long Baebol!
4 Tingbaot ol pikinini blong yumi tu. ?Oli gat wan tiokratik laebri blong olgeta? ?Sipos oli bigwan finis, oli stap yusum Indeks blong lukaot sam ansa long trabol blong olgeta evri dei? Sosaeti i no mekem plan blong holem i stap ol volyum we oli prentem finis. ?Bambae oli save faenem sam volyum ya long ol yia we oli kam? Sua se bambae sam long olgeta oli gat sam wok long Kristin kongregesen; wan laebri olsem bambae i givhan bigwan long olgeta. ?From wanem yu no mekem wan presen long olgeta long ful baond volyum blong Wajtaoa? Hemia wan nambawan presen we yumi save mekem long ol pikinini blong yumi blong oli save gru long waes mo kam bigman long saed long speret. Yumi mas traehad long evri rod blong mekem se evriwan oli save kasem kwiktaem ol sas samting blong speret we ogenaesesen blong Jeova i stap givim long yumi.