Wokgud Wetem Brata We i Lukaot Long Buk Stadi Long Kongregesen Blong Yumi
1 Buk Stadi blong Kongregesen i mekem wan impoten wok blong halpem yumi blong gru blong gat gudhan olsem minista blong talemaot gud nyus. Stampa blong mekem grup i smol, hem i blong mekem se evriwan i haremgud long hem olsem insaed long famle, blong stadi Baebol mo wan long ol buk blong Sosaeti. Smol grup olsem i givim trening long yumi blong kamgud moa long minista wok blong yumi. Long buk stadi olsem i isi moa blong leftemap tingting mo givhan long ol narawan we oli stap insaed. ?Olsem wanem yumi save wok fulwan wetem brata we i lukaot long buk stadi mo haremgud long gudfala program olsem?
2 Strong Blong Joen Long Minista Wok: Wan long ol impoten wok blong brata we i lukaot long buk stadi, hemia blong halpem ol wanwan memba blong grup blong oli strong blong joen long minista wok. Buk ya Our Ministry, i pulum tingting blong yumi long pej 44 se “fasin blong joen oltaem, strong mo glad we hem i gat long minista wok bambae i gat paoa long ol pablisa.” Oltaem brata we i lukaot long buk stadi bambae i wok wetem ol memba blong famle blong hem long wok blong prij, be bambae hem i glad tu blong go wetem ol narafala long ol defren haf blong minista wok sipos ol samting long laef blong hem oli letem hem blong mekem olsem. ?Yu stap sapotem oltaem miting blong wok blong prij? Sipos yu stap mekem olsem bambae brata we i lukaot long buk stadi mo ol narafala pablisa oli glad tumas from.
3 Oli plan long ol miting blong prij blong stap long ol ples we oli stret, blong mekem se evriwan oli save strong blong joen long wok blong prij. Taem oli tingbaot fasin blong laef blong ol man ples, ol grup oli wantem stat eli long minista wok. Plante pablisa mo paenia oli karem gudfala frut taem oli gohed long minista wok go kasem aftenun long wiken.
4 ?Yu nidim wan man blong halpem yu long sam haf blong minista wok? Maet brata we i lukaot long buk stadi i save mekem plan blong wan pablisa we i nafgud i save wok wetem yu. Long en blong manis, mekem sua se yu putum ripot blong wok blong prij oltaem. Brata we i lukaot long buk stadi mo sekretari bambae tufala i glad we yu save wok wetem tufala long impoten samting ya.—Skelem wetem Luk 16:10.
5 Taem Brata We i Lukaot Long Wok Blong Prij i Visitim Grup: Brata we i lukaot long wok blong prij i visitim oltaem ol grup blong buk stadi evri manis blong leftemap mo mekem minista wok i gud moa. I gud blong lesingud long 15 menet tok we hem i mekem long en blong buk stadi, from bambae hem i givim sam stret advaes we bambae oli halpem grup blong kamgud moa long defren haf long wok blong prij. Brata we i lukaot long wok blong prij i glad tu blong wok wetem ol defren memba blong buk stadi long wiken. Yu mas rere blong plan long spesel rod ya blong mekem se yu save haremgud long ekspiryens blong hem mo gudhan we hem i gat long wok blong prij.
6 Eksampel blong yumi wanwan blong wokgud tugeta mo fasin blong yumi blong wantem halpem olgeta we oli no gat inaf ekspiryens bambae i givhan blong mekem wan buk stadi grup i gat glad mo fasin fren i stap long hem, taem yumi “mekem i gud long olgeta man. Antap moa, yumi mas mekem olsem long olgeta ya we oli bilif long Kraes, nao oli brata blong yumi.”—Gal. 6:10.