Soem Fasin Tangkyu Long Ransom
1 Fasin blong wantem soem fasin tangkyu long wan fren no famle we i ded i stap long evri kastom blong man. Fasin ya blong wantem soem fasin tangkyu i save strong moa sipos fren we oli laekem i ded blong sevem laef blong ol narafala. Olgeta we oli gat hop blong laef bakegen oli gat gudfala risen blong soem fasin tangkyu long ransom taem oli kam long Memoriol blong ded blong Kraes long Epril 6.—2 Kor. 5:14; 1 Jon 2:2.
2 Gat Fasin Tangkyu Long Lav Blong Jeova: !I stret nomo blong yumi soemaot dip fasin tangkyu long Bigfala Man ya we i stap Givim olgeta samting long yumi, Jeova God, we hem i givim ransom! (1 Jon 4: 9, 10) Dip lav blong Jeova i kam klia long nambawan presen we hem i givim olsem ransom blong pemaot yumi, hem i no yusum wan long ol bilyan stret enjel we hem i gat, be wan Pikinini ya nomo we hem i gat we hem i laekem moa. (Prov. 8:22, 30) Pikinini ya, Jisas Kraes, we i savegud Jeova i talem long yumi se: “God i laekem tumas ol man long wol, nao hem i givim mi, mi stret Pikinini blong hem, mi wan nomo we hem i gat, blong olgeta man we oli bilif long mi bambae oli no save lus, oli gat laef we i no save finis.”—Jon 3:16.
3 Gat Fasin Tangkyu Long Lav Blong Jisas: Sem mak, i stret nomo blong yumi soem dip fasin tangkyu long Jisas Kraes, we hem i givim sol blong hem olsem ransom blong sevem plante man. (Mat. 20:28) Hem i soemaot lav blong hem taem hem i rere nomo blong obei long wil blong Jeova blong hem long saed long ransom. Makemgud olsem wanem hem i lego gudfala ples we hem i gat wetem Papa blong hem mo ol bilyan gudfala enjel blong kam olsem wan ransom blong pemaot yumi. Fasin blong laef long medel mo stap aninit long ol sinman, no save we hem i gat long saed long ransom se bambae hem i ded oli no blokem hem. Be, hem i “kam olsem man blong wok nomo . . . Hem i karem fasin blong man, i mekem tingting blong hem i stap daon blong i obei long God, gogo i ded. Mo ded ya blong hem, ol man oli nilim hem long [pos, NW].”—Fil. 2: 5-8.
4 ?Olsem Wanem Yumi Soem Fasin Tangkyu Long Ransom?: Fasin tangkyu blong yumi long ransom i mas go moa i no naf blong jes talem tangkyu. Yumi nidim blong kasem save long plan blong God long saed blong fasin sef tru long Jisas Kraes. (Jon 17: 3) Nao, yumi mas bilif long ransom. (Wok 3:19) Biaen, samting ya i pulum yumi blong givim laef blong yumi long Jeova God mo baptaes. (Mat. 16:24) Nao long laef ya blong yumi, yumi mas holem olgeta jans blong talemaot long ol narafala nambawan ransom we God i givim blong sevem yumi.—Rom 10:10.
5 I no strong tumas blong kasem ol mak ya. Maeka 6:8 i talem se: “?Mo Jeova i askem wanem long yu from? Yu mas wokem stret fasin, yu mas laekem kaen fasin, mo yu mas wokbaot wetem God we tingting blong yu i stap daon. Hemia nomo hem i wantem.” Sem mak, Deved i talem long Jeova se: “Evri samting oli stap kamaot long yu. Mo ol samting we mifala i stap givim long yu, oli kamaot long han blong yu fastaem.”—1 Kron. 29:14.
6 ?Blong soem fasin tangkyu blong yumi moa long gudfala plan ya blong Jeova, i gud blong ridim japta 112 kasem 126 long buk Man We i Hae Moa long famle bifo taem blong Memoriol, no? Long rod ya, evriwan long yumi bambae i mekem tingting i rere blong soem fasin tangkyu long ransom long taem blong Memoriol we bambae i stap long Epril 6, 1993.