Tijing Blong God i Gat Bigfala Paoa
1 !Yumi gat bigfala blesing blong kasem ol tijing long Hae God, Man we i wokem yumi, Jeova God! (Sam 50:1; Aes. 30:20b) Long olgeta nesen tede, plante taosen man oli stap go long hil blong klin wosip blong hem i tijim olgeta. (Maeka 4:2) Plante milyan blong ol narafala man, oli joen long ol skul we i leftemap tingting blong man mo waes blong wol. Be waes we i agensem Jeova mo Tok blong hem, hem i krangke long ae blong God, mo olgeta we oli stap folem oli save kam krangke.—Sam 14:1; 1 Kor. 1:25.
2 Long distrik asembli blong yumi we i jes pas, yumi luksave paoa blong tijing blong God long wan rod we i spesel. Stampa tok blong hem “Tijing Blong God” i kamaot long olgeta program. Yumi lanem we Tok blong God wetem speret blong hem i joenem yumi olgeta brata blong fulwol, i stretem ol prapa fasin blong yumi wanwan, blokem yumi long ol tijing blong ol rabis speret, mo i trenem yumi blong kamgud moa long minista wok blong yumi. ?Yu wan yu haremgud from tijing blong God?
3 I Gat Paoa Long Laef Blong Kristin: Tijing blong God i save givhan blong trenem voes blong hat blong yumi. Evriwan i bon wetem wan voes blong hat, be blong i lidimgud yumi long rod blong stret fasin mo long wok we i mekem Jeova i glad, yumi mas trenem hem. (Sam 19:7, 8; Rom 2:15) Ol man blong wol oli no letem Tok blong God i trenem tingting blong olgeta, mo from samting ya, oli konfyus mo oli no save wanem i stret mo wanem i no stret. Rao i kamaot long saed blong wanem nao ol fasin mo rul we oli stret mo oli no stret from se oli wantem folem wanem we olgeta nomo oli ting se i stret. Bighaf blong ol man oli wantem fasin fri blong jusum prapa rod blong laef blong olgeta. Oli no wantem lesin long wan we i stampa blong trufala fasin waes. (Sam 111:10; Jer. 8:9; Dan. 2:21) Be tijing blong God i givim stret tingting long yumi long ol poen olsem, mo yumi stap joengud olsem famle blong God from we hem i stap tijim yumi. Yumi no fraet blong lukluk i go long fyuja we i stap fored long yumi wetem wan gudfala voes blong hat, taem yumi stap bisi long minista wok blong yumi.
4 Tijing blong God i givhan long yumi blong faet agens long “evri tijing we i olsem win nomo.” (Efes. 4:14, NW) Yumi no ting se i impoten blong stadi waes blong ol man blong wol, we i blong mekem ol man oli faenem poen long ol narafala mo we oli no wantem bilif long wan samting, i pulum ol man blong folem prapa tingting blong olgeta nomo, mo i lidim olgeta blong foldaon long ol rabis fasin nomo. Yumi glad we Jeova i tijim yumi, mo olsemia nao yumi save ronwe long fasin blong harem nogud mo wari we plante oli kasem finis. Ol loa mo oda blong Jeova oli olsem ‘wan tok biaen long yumi,’ we i talem se: “Hemia nao rod. Wokbaot long hem, yufala ol man.”—Aes. 30:21.
5 Ol Miting Mo Minista Wok Blong Yumi: Yumi tingbaot Hibrus 10:23-25 olsem wan oda blong God. Long ol miting blong kongregesen, Jeova i tijim yumi. Hem i olsem wan fasin blong yumi blong stap oltaem long ol miting, no ?yumi tingbaot ol miting olsem se oli no impoten tumas? Tingbaot, fasin blong stap miting tugeta hem i olsem wan haf blong wosip blong yumi. Yumi no mas luk miting olsem wan samting olbaot. Yumi no save mestem eni haf blong program blong ol kakae long saed blong speret we Jeova i mekemrere blong yumi.
6 Moses i prea long God: “Soem long mifala olsem wanem blong kaontem ol dei blong mifala long wan rod we i save karem wan hat we i waes.” (Sam 90:12, NW) ?Prea blong yumi i olsem tu? ?Yumi gat tangkyu from ol wanwan dei blong laef blong yumi olsem we oli gud tumas? Sipos yumi mekem olsem, nao yumi save “karem wan hat we i waes insaed” from yumi spenem wanwan dei long gudfala rod, blong givim ona long Bigfala Man Blong Tijim yumi, Jeova God. Tijing blong God i save halpem yumi blong mekem olsem.