Givhan Long Ol Man We Oli Olsem Sipsip Blong Oli Stanap Long Wan Strong Fandesen
1 Blong bildim wan haos i nidim wan gudfala plan mo plante paoa. Afta we oli mekem plan blong haos, ol samting blong wokem haos oli mas rere mo oli mas putum wan strong fandesen. Oli bildim haos sloslou gogo kasem we hem i finis olgeta. I sem mak, yumi mas givhan long ol man we oli olsem sipsip blong lanem trutok sloslou. Yumi mas traehad blong wekemap intres long fastaem we yumi toktok wetem man. Afta nao, yumi mekem visit bakegen, putum fandesen taem yumi tijim stampa trutok long saed blong stampa tingting blong God long ol man.—Luk 6:48.
2 Bifo we yumi putum fandesen, yumi nidim blong mekem rere olgeta samting blong wokem haos ya, i sem mak, yumi mas tingbaot ol defren samting long laef blong man blong haos. ?Wanem poen nao yumi bin tokbaot lastaem? ?Wanem vas blong Baebol we yumi bin yusum? ?Wanem ansa blong man? ?Wanem buk yumi bin livim? Taem yumi gobak, tingbaot sam stret poen long tingting blong yu mo sloslou wokem fandesen. Wetem ol visit wanwan save blong man blong haos i stap gru mo bilif blong hem long God i stap kam antap.
3 Sipos yu bin livim wan “Laef Foreva” buk yu save talem se:
◼ “Mi mi glad blong faenem yu long haos. Maet yu tingbaot lastaem yumi storeyan, yumi tokbaot olsem wanem intres we ol man ples oli gat long God i stap godaon. Baebol i soemaot klia se God i intres long ol man mo ol stret man bambae oli kasem blesing tru long Kingdom blong hem. [Ridim Matyu 6:9, 10.] Tru long Kingdom ya, gud fasin mo stret fasin bambae oli save kamaot.” Ridim Aesea 11:3-5, mo pulum tingting blong man blong haos i go long tufala faswan paragraf blong japta 1 long Laef Foreva buk. Soemaot olsem wanem blong mekem stadi long haf ya.
4 Sipos yu bin livim traket ya Laef Long Pis Blong Nyufala Wol long fastaem we yu storeyan wetem man, yu save tokbaot bakegen ol stampa poen we yu bin tokbaot long saed long nid blong wan gudfala laef mo ol promes blong Baebol. Soemaotgud se blong laef long nyufala wol, yumi mas kasem stret save. Ridim Jon 17:3. Eksplenem se afta we yumi kasem save, yumi mas mekem wok blong God. Ridim 1 Jon 2:17. Pulum tingting blong man blong haos long sam stret poen long pej 5 blong traket.
5 Sipos yu tokbaot poen long saed long famle taem yu livim “Laef Foreva” buk long fastaem we yu toktok wetem man, yu save talem se:
◼ “Lastaem we mi kam yumi bin tokbaot poen long saed long famle laef. Yumi bin agri se blong gat wan hapi famle laef, yumi mas folem ol rul we yumi save faenem long Baebol. ?Yu ting se i nidim wanem blong mekem wan gudfala mared?” Wet long ansa. Tokbaot sam stret poen long ol save we oli stap long pej 243-246 long Laef Foreva buk. Askem tingting blong man blong haos long ol pija mo ol stret poen we yu bin jusumaot. Soemaotgud ol rul blong Baebol ya we oli save wok.
6 Sipos yu livim traket ya Haremgud Long Famle, luk bakegen ol stampa rul blong Baebol we oli stap long pej 4 mo 5. Sipos yu wekemap intres blong man ya, yu save seremaot Laef Foreva buk long hem. Soemaot japta 29, “Mekem Laef Blong Famle i Gud,” mo soem olsem wanem blong tokbaot samting ya wetem man blong haos mo famle blong hem.
7 Yumi evriwan i mas joen oltaem long wok blong mekem visit bakegen. Gohed blong wok long olgeta we oli intres taem yumi mekem ol gudfala visit bakegen long Septemba.