I Gat Nid Blong Bildim Moa Haos Kingdom

¹ Longtaem bifo profet blong Jeova i talemaot se “ol gudgudfala samting blong olgeta nesen oli mas kam insaed.” (Hag. 2:⁠7) Tru ya, yumi luk pruf olsem wanem tijing blong God i save mekem plante man oli lanem trutok mo kam ol man blong wosip long Jeova. !Yumi glad tumas blong luk se long Branj blong yumi nomo, i gat 135 man we oli baptaes long 1993 sevis yia! Blong gohed blong givhan long ol nyuwan ya, yumi nidim blong ‘Putum hat blong yumi long ol rod blong yumi’ blong mekem sua se yumi stap sapotem wok blong God fulwan. (Skelem wetem Hagae 1⁠:⁠5.) Wan impoten haf blong sapot we yumi givim blong mekem wok blong God gohed, hemia help blong yumi blong givim i naf haos blong wosip blong bigfala hif blong ol nyufala man blong presem Jeova.

² Presen mane we Sosaeti i askem blong bildim ol Haos Kingdom i bin stat long Epril 1, 1992 long branj blong yumi naoia mo i mekem i isi long 14 kongregesen blong gat nyufala Haos Kingdom. Long 1993 sevis yia, i gat 5 kongregesen we oli kasem lon blong bildim Haos Kingdom. Ol pablisa oli glad tumas blong givhan long saed blong presen mane. Ol mane we oli givim long ol kongregesen oli kambak wetem moa intres blong mekem oli mas stap gohed blong yusum presen mane ya, evri yia, blong bildim ol nyufala Haos Kingdom.

³ Rijenol Bilding Komiti i Givhan: Rijenol Bilding Komiti blong yumi i givhan long ol elda we oli lukaot long wok blong bildim ol nyufala Haos Kingdom mo wokemgud bakegen ol olfala Haos Kingdom. Oli givhan blong kaontem hamas mane we oli nidim blong bildim nyufala Haos Kingdom no wok blong wokemgud bakegen wan olfala Haos Kingdom mo oli askem ol narafala kantri blong givhan, sipos oli nidim stat long taem ya bifo we oli pem wan pis graon go kasem taem Haos Kingdom i finis. Komiti ya i blong lukaot long ol wanwan kongregesen.

⁴ Plante handred man we oli rere blong wok oli glad blong joen long wok blong wokemgud bakegen ol olfala Haos Kingdom mo blong bildim ol nyuwan. Ol volontia ya, we i gat ol man we oli gat save long sam spesel wok mo ol bisnes man, oli givim taem mo paoa blong olgeta i fri nomo long ol wok olsem pem wan pis graon, fulumap ol pepa we loa i agri long hem, mekem plan blong bilding, mo mekem lis blong ol samting we oli mas pem. Oli givhan tu blong pem ol gudfala materiol long spesel praes, oli givhan blong statem ol wok, mo lukaot long wok we i stap gohed. Yumi save talem tangkyu long olgeta long fasin glad we oli gat blong givim ol samting blong olgeta blong sapotem intres blong Kingdom we i mekem se Jeova bambae i blesem yumi bigwan.—⁠Prov. 11:⁠25.

⁵ Ol elda oli mas toktok wetem Rijenol Bilding Komiti blong olgeta taem kongregesen blong olgeta i stat lukluk blong wokemgud bakegen wan olfala Haos Kingdom no taem oli wantem bildim wan nyuwan. ?From wanem? Rijenol komiti i gat sam rul we oli save halpem ol kongregesen taem oli stat blong lukluk long ol wok ya. Blong jusum wan ples blong wokem haos, i gat plante samting we oli mas tingbaot antap long praes blong pis graon ya. I gat sam narafala samting tu we oli save mekem se praes blong graon ya i go antap, olsem plante wok we oli mas mekem blong levelem graon, karemaot ol doti we oli gat denja no posen long olgeta, no sam samting long saed blong loa we oli mekem se wok i no gohed. Sipos wan kongregesen i nidim blong Sosaeti i halpem hem long saed blong mane, rijenol komiti ya i gat ol fom blong Lon blong Haos Kingdom mo hem i save givhan long ol elda long kongregesen blong fulumap.

⁶ Sosaeti i bin stanemap Rijenol Bilding Komiti wetem sam plan blong fandesen blong ol Haos Kingdom. Bifo oli jusum wan plan we oli wantem, ol elda long kongregesen oli mas toktok wetem rijenol komiti blong olgeta blong tokbaot fulwan plan blong bilding ya mo folem ol plan ya nomo we Sosaeti i givim. Samting ya bambae i mekem se praes blong ol samting blong wok i stap daon be tu bambae i givhan long kongregesen blong jusum wan bilding we i gud mo i stret long fasin blong wokem haos long ples we oli stap long hem.

⁷ Oli mas kipimgud ol rikod blong mane we oli yusum. Sam brata we oli gat save oli glad blong wok wetem rijenol komiti blong olgeta blong givhan long ol kongregesen blong lukaot long ol kaon blong olgeta. Sam narafala brata we oli stap wok wetem Rijenol Bilding Komiti, blong halpem ol kongregesen blong fulumap ol pepa blong olgeta blong askem lon blong graon we oli stap long hem. Samting ya i givhan bigwan, from we ol lokol elda oli no stap wok oltaem long saed blong lukaot long mane blong Haos Kingdom olsem ol brata ya we oli trenemgud olgeta mo we oli gat ekspiryens long wok ya. Taem wok i finis, rijenol komiti i mas kasem wan kopi blong ful ripot blong kaon blong wok ya.

⁸ Ol Man We Oli Lukluk Oli Sapraes: Pruf blong tabu speret blong Jeova we i stap long ol brata we oli stap wok long ol Haos Kingdom i givim wetnes long ol narafala man. Oli bin pem ol materiol blong wan Haos Kingdom long wan kampani blong salem wud, mo samtaem biaen bos blong kampani ya i raetem se: “Mi tingbaot nating wan grup blong ol man we i mekem mi sapraes tumas bitim taem ya we mi stap wetem ol Wetnes blong Jeova long taem blong wok. Mi haremgud mo mi laekem tumas blong talemaot wan taem olsem, mo mi glad se mi save givhan long wan smol samting. Ol man oli mas presem yufala wetem ol man blong yufala, mo mi hop se ol wok blong yufala long fyuja i save gohedgud.”

⁹ Long wan narafala taem bakegen, kampani we i stap givim ol saplae i sanem wan man blong hem blong i stap tri dei long ples blong wokem Haos Kingdom. Man ya i talem se: “Laef blong mi i jenis bigwan taem mi stap wetem yufala long wiken ya. !Naoia rong tingting we bin gat long ol Wetnes blong Jeova i jenis! Yufala i mekem moa samting bitim we yufala stap kilkilim doa blong ol haos blong ol man. I wan jans blong mi blong givhan smol long saed ya. Yufala i no mas sapraes sipos yufala i luk mi long pablik miting blong yufala.”

¹⁰ Taem wan wok blong bildim Haos Kingdom i finis, wan mea i raet long nem blong taon, mo talem se: “I leftemap tingting bigwan blong luk plante handred volontia we oli wok wanples blong bildim haos ya kwiktaem nomo. Hem i wan naesfala bilding tru. Ol man we oli laef raonabaot oli stap tokbaot se bilding ya i go antap kwiktaem nomo. Nyufala Haos Kingdom ya i wan trufala ona long komuniti blong mifala, mo mifala i praod blong talem welkam long hem mo long kongregesen blong yufala.”

¹¹ I Gat Nid Blong Moa Volontia: Rijenol komiti i stap lukaot blong yusum olgeta we oli gat gudhan blong wok we oli stap long kongregesen we bambae oli nidim blong wokem ol nyufala no wokemgud bakegen olfala Haos Kingdom. Oli wok tu wetem ol narafala lokol brata, antap moa ol elda mo man blong givhan, blong trenem olgeta blong mekem ol wok ya. From we oli kasem save long fasin blong wok we oli save yusum long taem blong bildim Haos Kingdom, stat long taem ya ol brata ya we oli bigman long saed blong speret oli save givhan blong bildim ol narafala Haos Kingdom long rijen ya. Taswe, olgeta we oli stap long ol kongregesen we oli joen blong bildim wan Haos Kingdom oli mas soem fasin mo tingting blong woktugeta, be oli no mas ting se rijenol komiti wetem olgeta we oli wok wetem hem bambae oli lukaot long olgeta wok blong Haos Kingdom blong olgeta. (Neh. 4⁠:6b) Afta we oli kasem trening, lav i mas pusum ol brata blong givhan blong bildim ol Haos Kingdom blong ol narafala kongregesen we oli nidim kwiktaem wan nyufala Haos Kingdom no mekem olfala Haos Kingdom i kam moa gud.—⁠Neh. 5:19; Fil. 2:3, 4.

¹² Mifala i leftemap tingting blong ol pablisa we oli baptaes finis we oli gat gudhan blong mekem sam wok mo we oli olsem gudfala eksampel long kongregesen blong wok olsem volontia blong givhan long bigfala wok ya. Mifala i nidim ol man we oli gat save mo ol man we oli no gat save blong bildim. Ol volontia oli save kasem wan fom long presiden elda no long sekretari blong kongregesen mo talem ekspiryens blong olgeta olsem ol bisnes man no long sam narafala wok, olsem lukaot kakae, sefti, lukaot long ol materiol, lukaot long kaon, mo ol pepa we loa i agri long olgeta. (Taem oli nidim moa fom blong volontia, oli save raet i go long Sosaeti mo askem.) Fasin blong givhan long saed ya i wan pruf blong lav we yumi gat long ol man we oli stap kolosap moa long yumi—⁠ol Kristin brata blong yumi.—⁠Mat. 7:12; 22:39; Jon 13:⁠35.

¹³ Fasin Tangkyu Long Wok Blong Volontia: Kam kasem taem we samfala oli joen long wok blong bildim Haos Kingdom, samfala oli luksave se i wan bigfala wok blong mekem. Afta we wok blong bildim wan Haos Kingdom i finis, ol elda oli raet se: “Fasin blong wet blong kasem rod blong wok long ol brata blong Rijenol Bilding Komiti i wan bigfala blesing long mifala. Taem mifala i tingbaot sapot we oli givim long mifala tru long rod blong wok mo ol man blong wok we oli gat gudhan, mifala i no save givim help be mifala i tingbaot 1 Pita 5⁠:2, 3, we yumi ridim long fasin blong lukaot ol sipsip ‘Yufala i mas lukaotgud long olgeta, we tingting blong yufala i glad blong mekem, olsem God i wantem. I nogud yufala i mekem wok ya we tingting blong yufala i no glad. Mo i nogud yufala i mekem blong kasem pei long hem. Yufala i mas mekem from we tingting blong yufala i glad long hem. Bambae yufala i no kam bigfala masta long olgeta ya we God i putum olgeta long han blong yufala. Yufala i mas soemaot ol stret fasin long ol man blong yufala blong oli save folem, olsem ol sipsip oli folem man blong lukaot long olgeta.’ Tru ya, ol brata ya oli ol gudfala eksampel mekem wok blong Jeova. Long taem we wok i stap gohed, yumi no save kaontem taem we ol brata oli yusum blong kam long ol ples longwe, oli spenem plante haoa, oli givim fri ol tul blong olgeta, mo tu oli givim ol materiol olsem presen, evri samting ya oli blong halpem mifala blong bildim nyufala Haos Kingdom blong mifala! !Glad hat blong ol brata ya i soemaot bigwan se oli ‘laekem tumas olgeta Kristin man’ mo samting ya i leftemap tingting blong mifala bigwan!—⁠1 Pita 2:17.”

¹⁴ I tru nomo se ol brata blong yumi oli gat tingting ya we oli glad blong wok mo blong wok strong, olsem wan grup blong man i raetem se: “!I wan bigfala glad blong luk ol man Koria, ol man Spen, mo ol kongregesen we oli toktok engglis lanwis oli stap wokgud wanples wetem wan tingting nomo long wosip blong Jeova! Ol tok blong Ol Sam 133⁠:1, 3 oli tru nomo se: “I gud tumas taem ol man blong God oli stap wanples, we oli gat wan tingting nomo. !Fasin ya i gud tumas!” Wan elda we i wok wetem rijenol komiti i raet blong talem se i wan blesing blong mekem wok blong givhan long ol narafala brata. Hem i talem se “ol brata we oli kam long ol ples we oli stap plante handred kilomita longwe blong kam givhan long ol kongregesen blong mekem promes blong olgeta long Jeova i kamtru i rili leftemap tingting blong kongregesen ya. . . . !Tru tumas yumi kam wan kampani blong ol brata we i oli gat lav!”

¹⁵ Blong soem tangkyu long wok we oli mekem long Haos Kingdom blong wan kongregesen, presiden elda i raetem se: “From we i gat plante olfala brata long kongregesen ya, mifala nomo i no save finisim wok ya. Taswe, mifala i talem bigfala tangkyu long yufala mo ol brata olsem yufala we oli haremsave lav blong Jeova mo we oli wantem soemaot lav ya. Mifala i wantem talem long ol brata blong mifala se: ‘Gohed blong mekem gudfala wok.’ Plante brata blong yumi oli luksave fasin traehad blong yufala mo samting ya i rili mekem Papa blong yumi, Jeova, i glad.” Wan narafala bilding komiti i raetem se: “Mifala i savegud ol hadwok we plante oli soem. (Fael. 21) Ol man long eria ya we oli no ol Wetnes oli talem se ‘!Jeova i stap wetem yufala!’ ”

¹⁶ Presen Mane i Gohed Blong Givhan: Ol presen mane we oli givim wetem glad hat long Sosaeti blong bildim ol Haos Kingdom i bin givhan long ol kongregesen long ol taem we oli pas mo bambae i gohed olsem long fyuja. Jeova God hemwan i faswan blong soem gudfala fasin blong givim we i no tingbaot hemwan. (Jem. 1⁠:17) I tru se save mo jans we yumi gat blong givim oli no sem mak. Be sipos yu lukaotgud long fasin blong spenem mane blong yumi, bambae yumi save givhan blong sapotem wok blong bildim. Fasin blong givim wetem glad hat olsem i rili mekem hat blong Jeova i glad, mo tu i leftemap bigwan tingting blong ol brata blong yumi.

¹⁷ “Tede wan bigfala hif blong man” i stap gohed blong obei long mesej blong Kingdom. “Ol gudgudfala samting” oli stap kam insaed long haos prea blong Jeova long saed blong speret, mo hem i stap ‘fulumap haos wetem gudfala samting.’ (Rev. 7⁠:9; Hag. 2:⁠7) Olsem ol man Jyu we oli holem strong long God long taem blong Hagae, i gud yumi tu yumi putum hat blong yumi long wok blong God, sapotem fulwan nid blong bildim moa Haos Kingdom. Nating se oli bin bildim plante taosen gudfala Haos Kingdom long ol yia we oli pas, namba i stap gru kwiktaem. Sapot we yumi stap gohed blong soem taem yumi givim presen mane long Sosaeti blong bildim ol Haos Kingdom i wan nambawan rod blong joen long wok blong God.