Bildim Ol Haos Kingdom—Wan Impoten Haf Blong Ol Tabu Wok
1. ?Wanem wok we oli mekem finis blong bildim ol Haos Kingdom, be i gat wanem nid yet?
1 Long ol faef yia we oli pas, long ol ples we branj ofis blong yumi i lukaot long olgeta, oli bildim 4 niufala Haos Kingdom, oli jenisim 2, mo oli riperem 4. Komiti blong Bildim Ol Haos Wosip long ol ples we branj ofis i lukaot long olgeta, i lukaot long bighaf blong ol wok ya. Mifala i talem tangkiu tumas from hadwok blong komiti ya wetem Komiti blong Bildim Ol Haos Wosip long ples blong yumi, mo olgeta we oli givhan long olgeta. Oli mekem bigfala wok finis, be i gat plante wok i stap yet blong bildim ol Haos Kingdom. ?Olsem wanem yumi evriwan i save givhan long impoten haf blong tabu wok ya we yumi mekem i go long Jeova?—Rev. 7:15, NW.
2. ?Olsem wanem yumi save givhan long wok blong bildim ol Haos Kingdom?
2 Glad Blong Wok: Sipos yu yu wan pablisa we i baptaes finis, mifala i askem long yu blong yu volontia blong wok wetem Komiti blong Bildim Ol Haos Wosip long ol ples we branj ofis i lukaot long olgeta. Blong mekem olsem, yu mas fulumap pepa ya Ol Kwestin Blong Volontia Blong Bildim Ol Haos Kingdom (Kingdom Hall Volunteer Worker Questionnaire). (Sam 110:3) Olgeta we oli fulumap pepa ya oli mas ol man we oli glad blong wok, mo oli mas glad blong joen wetem ol narafala blong wok. (Sam 133:1) Nating sipos yu no gat gudhan blong bildim haos, yu save mekem plante samting blong givhan blong bildim ol haos wosip. Maet yu save kasem sam moa trening we bambae yu save yusum long fiuja.
3. ?Wanem sam narafala rod blong soemaot se yumi sapotem wok ya?
3 Sipos yu yu no naf blong volontia, yu save sapotem wok ya yet. Yu mekem olsem taem yu leftemap tingting blong ol narafala we oli naf blong joen long wok ya. Olgeta we oli gat wok long kongregesen bambae oli no stap sipos oli joen long wok blong bildim Haos Kingdom. Yu yu save givhan blong mekem ol wok blong ol brata ya. Taem ol elda oli plangud fastaem, oli save meksua se ol wok blong kongregesen oli gohed gud taem samfala oli gowe blong mekem wok blong bildim Haos Kingdom. I sua se Jeova i glad taem yumi joen tugeta wetem wan tingting blong mekem wok blong Kingdom i gohed moa.—Hib. 13:16.
4. ?Olsem wanem yumi save leftemap tingting blong olgeta we oli joen long wok ya blong bildim ol Haos Kingdom?
4 Leftemap Tingting: Blong bildim ol haos wosip, i nidim plante taem mo hadwok. Taswe olgeta we oli joen blong bildim ol haos ya bambae oli spenem taem longwe long kongregesen blong olgeta. I gud we yumi kwik blong talem ol gudfala toktok blong leftemap tingting blong ol volontia ya we oli wok blong bildim ol haos wosip. Olgeta ya oli lego plante samting blong olgeta blong oli save “lukaot long bisnes ya.”—Wok 6:3; Rom 14:19.
5. ?Olsem wanem olgeta we oli joen long wok blong bildim ol haos wosip oli save soemaot se oli skelemgud ol samting?
5 Skelemgud Ol Samting: Wok blong talemaot Kingdom blong God i faswan tiokratik wok we yumi mas mekem. (Mak 13:10) Komiti blong Bildim Ol Haos Wosip long ol ples we branj ofis i lukaot long olgeta i no fogetem samting ya, taswe taem oli mekem program blong bildim ol Haos Kingdom, oli traem mekem se ol volontia oli no stap longwe long kongregesen blong olgeta sipos i no gat nid. Long sem fasin, ol volontia blong bildim ol haos wosip oli traehad blong skelemgud ol samting blong oli save lukaot yet long olgeta wok blong olgeta. Oli meksua se narafala i mekem wok blong olgeta long kongregesen taem oli no stap.
6. ?Wanem i save kamaot taem evriwan long kongregesen oli wok tugeta blong mekem se tufala wosip i kam antap moa?
6 Aposol Pol i tokbaot ol memba blong kongregesen se oli wok tugeta blong ‘mekem bodi ya i save gru, nao yumi stap lavlavem yumi, mo bodi ya blong Kraes i save kam strong moa.’ (Efes. 4:16) Lav we yumi gat long Jeova mo long trufala wosip i pulum yumi blong wok tugeta blong talemaot gud nius mo blong givhan long wok blong bildim Haos Kingdom.