!I Gud Long Yumi Blong Tingbaot Wanem We Jeova i Bin Mekem!
1 Man we tabu speret i pusum hem blong raetem Ol Sam 48, i pusum ol man Isrel blong ‘wokbaot i goraon long bigfala taon ya Saeon, kaontem ol wajhaos blong hem, makemgud ol strong haos blong hem, blong oli save talemgud long ol pikinini we bambae oli kamaot biaen long olgeta.’ From lav blong Jeova i pusum olgeta, oli intres tumas long evri smosmol samting blong ples ya we hem i stampa blong tiokratik rul blong God long wol. !Ol smosmol samting ya oli impoten tumas from we hemia nao taon we Jeova hem wan i putum nem blong hem long hem! Bambae oli stap tokbaot hem, mo antap moa oli mas sua se ol pikinini blong olgeta bambae oli harem olgeta samting we oli stap olsem ol sas samting long hat blong olgeta.—Sam 48:12, 13.
2 Yumi stap laef naoia long taem we stampa blong tiokratik rul blong Mesaea blong Jeova i no moa stap long Saeon blong wol be long Jerusalem blong heven. (Hib. 12:22) Kingdom blong Jeova long han blong Jisas Kraes i bin stat rul long 1914. (Rev. 12:10) Yumi intres bigwan long ol wok blong hem. Mo tu yumi intres olsem wanem Jeova i stap lidim ol man blong hem long wol, blong mekem se oli save finisim wok blong hem olsem ol man we yumi save luk olgeta we oli wok long nem blong Kingdom. Sam gudfala poen long saed blong samting ya oli stap long nyufala buk blong yumi, Jehovah’s Witnesses—Proclaimers of God’s Kingdom. !Yumi glad tumas blong kasem buk ya long “Tijing Blong God” Distrik Asembli we yumi jes mekem!
3 Long Septemba 1, buk ya i bin kamaot finis long 20 lanwis, mo wok blong transletem mo prentem bakegen long 13 narafala lanwis i stap gohed blong fulumap nid blong olgeta we oli toktok ol lanwis ya. ?Yufala i gat wan buk olsem long haos blong yufala? ?Yufala i stap ridim? ?Yufala i stap tokbaot ol samting we yufala i lanem insaed?
4 Plante brata mo sista oli lukluk ol pija mo ridim ol stampa tok blong hem, olsem we oli talem long taem blong asembli, nao kwiktaem nomo biaen, oli stat ridim ol tok insaed long buk ya. ?Wanem sam toktok we oli talem? Hemia sam nomo long olgeta.
5 Wan sista i raetem se: “Long olgeta buk we mi kasem, buk ya nomo we mi wantem finisim kwiktaem blong bambae mi save ridim bakegen. Naoia mi stap long japta 25. Moa mi ridim, moa ol wora blong ae blong mi oli ron mo hat blong mi i fulap long lav blong Jeova. Buk ya i leftemap tingting mo i mekem bilif i strong.”
6 Wan brata we i bin stap mekem wok blong Jeova bitim 40 yia nao i talem se: “Mi no luksave fastaem olsem wanem buk ya bambae i pulum tingting. Mi stap wekap let long naet mo mi stap wekap eli long moning nao mi ridim buk ya fulwan long tu wik. Tru ya, buk ya i tajem hat blong mi moa bitim ol narafala buk we mi bin ridim. Hem i nambawan frut blong hadwok mo dip stadi be tu hem i nambawan buk blong leftemap tingting.”
7 Wan Program Blong Ridim Oltaem: Samfala we oli ridim ful buk kwiktaem nomo oli mekem disisen blong ridim bakegen be naoia bambae oli go slou lelebet.
8 Sipos i gat moa long wan memba blong famle blong yu oli stap long trutok, maet yu wantem yusum sam haf blong buk ya long famle stadi blong yufala. Sam famle oli stat mekem olsem sam dei afta we oli kasem buk ya long asembli. Samting ya i no minim se oli mas lego long ol narafala stadi, olsem rere long Wajtaoa stadi. Be yu save faenem se i givhan bigwan long yu sipos yu spenem 15 no 20 menet moa blong ridim mo tokbaot sam haf long Proclaimers buk.
9 Sam narafala famle oli stap ridim tu no tri pej—maet wan no tu smol stampa tok—evri sapa taem oli stap yet long tebel blong kakae. Maet wanwan long olgeta oli ridim bighaf blong buk finis, be oli stap kasem gudfala samting taem oli stap ridim sloslou wetem jans blong storeyan long ol haf blong hem. Samfala we oli stap mekem olsem oli bin mekem wok blong Jeova plante yia finis. Taem oli stap ridim, oli tingbaot bakegen plante gudfala taem we oli gat bifo. Taem oli stap tokbaot olsem wanem oli bin joen long ol samting we oli stap ridim, samting ya i mekem olgeta oli haremgud long hat blong olgeta.
10 From sam samting long haos, maet yu faenem se yu mas mekem prapa riding blong yu wan. Wan sista we i bin raet i go long Sosaeti i talem se: “Mi stap ridim buk ya smosmol evri naet bifo mi go long bed. Buk ya i mekem fasin tangkyu mo lav long trutok i kam dip moa long mi, mo mi harem se mi kam kolosap moa long Jeova mo mi tangkyu tumas we mi stap insaed long ogenaesesen blong hem. Mi rili haremgud long wanwan pej we mi ridim.”
11 Nating se buk ya i bigwan, ol wanwan haf oli no olsem. Fas haf blong hem i kavremap kwik be i pulum tingting long ol samting we oli hapen stat long taem blong Ebel kasem yia 1992—long 108 pej nomo. Wanwan long ol narafala haf oli gat 13 kasem 150 pej long olgeta. Oli seraotem ol wanwan haf long sam japta. I nogud blong go tru long olgeta kwiktaem, i moa gud blong tekem wan haf, wan japta, no wan smol stampa tok nomo; haremgud long hem; mo kasem gudfala samting from.
12 Tekem Taem Blong Tingbaot Wanem Yu Ridim: ?Wanem mak we yu wantem kasem taem yu ridim? Yu no mas putum mak blong kavremap ol pej—finisim buk—nomo. Proclaimers buk i givim histri blong ol samting we yu yu gat naoia long saed blong speret. Yu mas savegud long hem. Tekem taem blong tingbaot olsem wanem laef blong yu i joen long wanem yu stap ridim. Taem yu luklukbak long wok blong ol Wetnes blong Jeova long taem bifo, traem luk olsem wanem yu save folem bilif blong olgeta. (Hib. 12: 1, 2) Taem yu ridim olsem wanem bigfala apostasi i kamaot mo i kam antap, makemgud ol trap we oli kasem olgeta we oli foldaon, wetem tingting blong lukaotgud long yu wan long saed blong speret. Mo taem yu lukluk bakegen histri long taem blong yumi, luklukgud long ol gudfala fasin blong speret blong olgeta we God i stap yusum olgeta, olsem wanem oli soemaot se wok blong God i faswan samting long laef blong olgeta, mo olsem wanem oli mekem taem oli kasem trabol—we sam long olgeta oli strong tumas—we God i letem i stap.—Hib. 13:7.
13 Bambae yu faenem se i mekem bilif i strong taem yu stadi long ol smosmol samting we oli soemaot olsem wanem Jeova i bin lidim ol man blong hem blong kasem klia save long trutok blong Baebol we yumi stap haremgud long hem naoia. Fasin tangkyu blong yu long plan we Jeova i stap yusum long wol bambae i gru moa taem yu savegud moa olsem wanem ogenaesesen i stat mo i gohed kam kasem naoia. Sua bambae yu glad tumas taem yu ridim olsem wanem, gud nyus i go finis long olgeta laswan ples long wol, blong fulumap ol profet tok. Bambae hat blong yu i haremgud from ol ekspiryens blong olgeta we oli holemstrong long olgeta ples long wol we oli wok strong blong talemaot Kingdom. Bambae i mekem yu yu strong blong winim ol traem blong yu wan taem yu ridim ol traem we ol brata mo sista we oli holemstrong oli bin kasem, mo olsem wanem oli bin stanap strong from lav blong olgeta long Jeova.
14 Afta we yu ridim wan smol haf, tekem taem blong storeyan tugeta long ol gudfala samting blong hem mo luk bakegen ol smosmol haf blong hem. Sipos yu gat ol smol pikinini, askem olgeta blong eksplenem ol pija mo talem long yu ol samting we oli save long saed blong ol man we oli stap long ol pija. Nating sipos yu stap ridim yu wan nomo, traehad blong serem wetem ol narafala ol samting we yu stap lanem. Sipos taem i stret blong mekem olsem, yusum sam haf long visit bakegen mo taem yu stap mekem ol Baebol stadi. Taem yu stap talem bakegen, bambae i mekem se i stap strong long tingting mo hat blong yu, mo bambae i givhan long ol narafala tu.
15 Intres Long Ol Smosmol Haf Blong Hem: Ol taem we yu yusum blong ridim Proclaimers buk i mas wan taem blong glad mo blong kasem plante gudfala samting from.
16 ?Yu wantem se famle blong yu i visitim wol hedkwota blong ol Wetnes blong Jeova? Pej 208-209 i soem ol bilding we Sosaeti i bin yusum wan handred yia i pas long eria blong Pitasbeg. Pej 216-217 i halpem yu blong luksave ol bilding we oli yusum samtaem afta long Bruklin. Ol pija long pej 352-356 oli save halpem yu blong mekem wan pija long tingting blong yu long wol hedkwota tede. Japta 26 mo 27 oli givim sam save long saed blong wok we oli stap mekem long Betel, mo pej 295-298 i givim sam moa save long saed blong laef long Betel.
17 Plante long yumi oli no gat jans blong visitim sam branj blong Sosaeti. Pej 357-401 blong Proclaimers buk i tekem yu i goraon long wan trep long wol. I no nidim blong hareap blong go tru long hem. Spenem smol taem long wanwan kantri mo haremgud long hem. Yusum map blong wol long pej 415-417 blong faenem ol wanwan ples. Ridim ol komen we oli joen wetem wanwan pija blong branj. Taem yu yusum indeks yu save faenem ol nara gudfala save long saed blong wanwan kantri tu. Yusum jans ya blong kasem save long ol memba blong famle blong yu long saed blong speret long ol narafala kantri.
18 Taem ol man oli kam wanples, samtaem oli mekem sam pleplei we i nidim save long ol defren samting. ?Yu ting se i gud moa blong save ol impoten det mo ol impoten samting we oli hapen long histri blong ol Wetnes blong Jeova long taem blong yumi? Bambae yu faenem plante samting oli stap long lis long pej 718-723 blong Proclaimers buk. Lis ya i givim wan stampa plan; yu save ademap ol samting we yu faenem long ol nara haf blong buk long hem. Yusum ol samting ya olsem wan stampa plan blong tingtingbak. Ating ol yangfala long famle bambae oli holem olgeta kwiktaem long tingting blong olgeta. Sam long yumi we yumi olfala moa bambae yumi slou lelebet. Be hemia ol smosmol samting long tiokratik histri we yumi save kasem gud samting from, taem yumi save. Afta we yu lanem ol det mo ol stampa samting we oli hapen, wok long fandesen ya. Luk hamas narafala samting yu save tingbaot long saed long wanwan samting we i hapen. Nao tokbaot haf wok we wanwan samting we i hapen i mekem blong halpem wil blong God i kamtru. Nekis samting, tokbaot olsem wanem hem i gat paoa long prapa laef blong yu wan mo olsem wanem yu joen long wok we Jeova i stap mekem.
19 Luksave Ol Jans Blong Yu: Taem yu ridim mo tokbaot buk ya Jehovah’s Witnesses—Proclaimers of God’s Kingdom, bambae yu faenem se bigfala mining blong profet tok blong Aesea 60:22 i kam klia moa long yu. Buk i talem long pej 519 se: !“Promes blong ‘smolwan bambae i kam taosen’ i kam tru finis, mo long wan fasin we i bigwan! Long wanwan long moa long 50 kantri we bifo i no gat ‘wan smolwan’ nating—we i no gat wan Wetnes blong Jeova long hem long 1919, we oli no prij nating long hem—tede i gat moa long taosen man blong presem Jeova. !Long sam long olgeta kantri ya, naoia i gat plante taosen, yes, moa long handred taosen, blong ol Wetnes blong Jeova we oli stap wok strong blong talemaot Kingdom blong God! Long ful wol, ol Wetnes blong Jeova oli kam ‘wan strong nesen’—namba blong olgeta olsem wan kongregesen long olgeta ples long wol i bitim namba blong ol man long eniwan long ol 80 nesen long wol we olgeta nomo oli rul long kantri blong olgeta.”
20 Wok ya blong Kingdom we i stap kam antap i no finis yet. Long defren fasin, Jeova i mekem i spid bitim oltaem bifo. ?Bambae yu yu joen long wok ya kasem wanem mak? ?Yu yu rili luksave ol jans blong yu? Taem yu kasem save wanem we plante narafala oli stap mekem, i gud we hat blong yu i pusum yu blong givim yu wan blong joen fulwan long bigfala wok ya we God ya we i laekem yumi i lidim tru long Jisas Kraes, long taem blong yumi.