Givhan Blong Gru Tru Long Visit Bakegen We i Gat Mining
1 Blong halpem olgeta we oli soem intres finis, i nidim se yumi gohed blong givim kakae blong speret long olgeta long ol visit bakegen we yumi mekem oltaem. Ol visit blong yumi bambae oli gohed sloslou blong halpem fasin blong gru blong olgeta long saed blong speret. (1 Kor. 3:6-9) Be, blong mekem ol visit blong yumi oli gat mining, i nidim se yumi mas rere fastaem, mo tingbaot man ya taem yumi mekem olsem.
2 Gobak Long Olgeta We Yumi Livim Traket Long Olgeta Finis: Ating yumi livim finis traket ya Laef Long Pis Blong Nyufala Wol long fastaem we yumi toktok wetem man.
Afta we yumi tingtingbak kwiktaem long wanem we yumi bin tokbaot, maet yumi save askem samting olsem se:
◼ “?Wanem gavman nao i save mekem ol jenis ya oli kamtru? [Wet long ansa.] Maet yu tu yu glad blong laef long ples olsem ya. ?Olsem wanem yumi wanwan i save haremgud long wan laef olsem?” Nao maet yu save lukluk long poen aninit long smol stampa tok ya “Olsem Wanem Long Yu.” Mo tu yu save pulum tingting i go long Laef Foreva buk, japta 15, “Rod Blong Kam Sabjek Blong Gavman Blong God.” Maet yumi save storeyan long tufala faswan paragraf mo afta askem kwestin ya se: “?Fasin blong kasem save long God i mekem wanem long yumi?” Yu save mekem plan blong ansa long kwestin ya mo blong storeyan moa long japta ya long nekis visit.
3 Taem yumi gobak long olgeta we yumi livim finis buklet ya “?God i Rili Kea Long Yumi?,” maet yumi save talem se:
◼ “Lastaem we mi kam, yumi bin storeyan long ol problem we oli stap kasem ol man mo wanem God i promes blong mekem long olgeta. Be, ?from wanem God i letem ol man blong oli harem nogud longtaem? Yumi save faenem wan ansa we yumi intres long hem long haf 6 blong buklet we yumi bin luk long hem.” Sipos i stret, askem man blong haos blong karem buklet blong hem. Afta we yumi tokbaot sam paragraf, yumi save askem se: “?I nidim blong yumi mekem wanem blong haremgud long ol promes blong God?” Maet yumi save makem poen we i stap long haf 11, “Faondesen Blong Nyufala Wol i Stat Naoia,” long pej 28-31, blong storeyan long hem long nekis visit.
4 Gobak Long Olgeta We Yumi Livim Sam Magasin Long Olgeta Finis: Sipos yu jusum wan stret atikol we man blong haos i intres long hem, tokbaot sam moa poen long atikol ya taem yu gobak, mekem ol tok blong yu oli stanap long wan stampa vas mo haf we i tokbaot vas ya. Nao yumi save eksplenem ol gudfala samting we magasin i save givim. Mo tu, yumi save pulum tingting i go long nekis namba blong magasin sipos hem i gat wan atikol we i tokbaot semfala poen ya. Sipos no, yumi save pulum tingting i go long haf blong Laef Foreva buk long sem poen ya mo mekem plan blong storeyan long hem long nekis visit blong yumi.
5 Taem yumi wanwan i soem intres blong mekem ol visit bakegen we long fasin we i gat mining, bambae yumi soemaot lav blong yumi long ol man mo long Jeova. (Jon 13:34, 35) Givhan long olgeta long teritori blong yumi blong oli gru long saed blong speret taem yumi gohed blong mekem ol visit bakegen we oli gat mining.