Wokem Intres Long Kingdom Blong God We i Givim Pis

¹ Long manis Febuwari, bambae yumi seremaot buk ya Yu Save Laef Foreva Long Paradaes Long Wol. Mak we yumi wantem kasem i blong halpem ol man we hat blong olgeta i tru blong wokem fasin tangkyu long Kingdom blong God mo long wanem we bambae hem i mekem. Ol kwestin blong save tingting blong man i save givhan long yumi blong kasem mak ya.

² Afta we yumi talem halo long hem wetem smael, yumi save talem wan samting olsemia:

◼ “I gat plante jenis we yumi sapraes from long ol gavman long wol tede, mo oli tokbaot oltaem se oli wantem pis. ?Yu ting se trufala pis bambae i kamtru samtaem? [Wet long ansa.] Nating se plante man oli hop se ol gavman blong man bambae oli putum pis, makem olsem wanem God i promes blong putum pis olsem Ol Sam 46⁠:9 i talem. [Ridim.] ?Yu ting se wanem ol jenis nao God bambae i mekem i kamtru long wol? [Lesin long ansa blong man blong haos, mo afta soem traket ya Laef Long Pis Long Nyufala Wol.] ?Long tingting blong yu, yu save luk samting ya long pija ya olsem we bambae i sua blong kamtru?” Lukluk long ol save aninit long smol stampa tok ya “Laef Long Nyufala Wol Blong God.” Sipos i gat taem, yu save luk sam moa save long Reasoning buk, pej 227-232 (F. 336-341), aninit long kwestin ya “What will God’s Kingdom accomplish?,” (?Wanem nao Kingdom blong God bambae i mekem i kamtru?) Yumi save finisim storeyan taem yumi askem se: “?Yu ting se wan gavman blong God bambae i save mekem ol jenis ya?” Nao yu save soem Laef Foreva buk mo eksplenem olsem wanem oli save yusum buk ya blong faenem ansa blong kwestin ya. Long en blong storeyan, mekem plan blong visit bakegen.

³ No maet yumi save talem se:

◼ “Plante oli talemaot wari blong olgeta long ol bigfala problem we yumi evriwan i mas fesem evri dei. ?Yu ting se i gat hop blong winim ol problem ya? [Wet long ansa.] Maet samfala oli harem se God i no kea long ol trabol blong yumi. Be, makem wanem hem i promes long Revelesen 21⁠:​3, 4.” Ridim tufala vas ya. Sipos man blong haos i bisi, yumi save soemaot traket ya ?Wol Bambae i Lus No i Stap? Sipos yumi seremaot traket, yumi save lukluk moa long poen we i stap long pej 3 mo 4 aninit long stampa tok ya “Fyuja Blong Wol Ya.” Sipos man i soem intres, maet yu save seremaot Laef Foreva buk. Maet yu save stanemap kwestin ya: “?From wanem God i letem fasin nogud i stap?” Soemaot japta 11 long buk, mo mekem plan blong tokbaot poen ya long nekis visit.

⁴ Maet yu save jusum blong soem wan atikol long wan magasin we i jes kamaot taem yu tokbaot wan stret poen long wan haf we yu jusum finis.

Blong soemaot magasin, maet yu save talem se:

◼ “Atikol ya i tokbaot moa long poen ya. [Ridim wan no tu fultoktok we yu jusum finis.] Atikol ya i givim sam moa tingting we i save leftemap tingting blong yu mo famle blong yu. Mi sua se bambae yu laekem blong ridim ol magasin ya, mifala i glad blong livim magasin ya wetem magasin we i joen wetem hem long wan smol praes blong 60 VT.”

⁵ Plante taem ol man tede oli konfyus from oli no save weples oli mas luk long hem blong kasem ansa long ol problem we ol man oli stap fesem. Yumi gat jans blong serem wan klia hop blong fyuja wetem olgeta. (Wok 17⁠:27) Taswe, yumi wantem traehad blong pulum tingting blong ol man i go long Kingdom blong God, trufala stampa blong pis.