Sapotem Fulwan Program Blong Pablik Miting Blong Kongregesen Blong Yufala
1 Sam yia i pas finis wan yangfala man i faenem wan smol pepa we i tokbaot ol miting blong lokol kongregesen. From we hem i stap lukaotem trutok, hem i mekem disisen blong go long Pablik Miting long Sande blong wik ya, ale hem i kasem Haos Kingdom longtaem lelebet bifo long miting. Wan pablisa i talem welkam long hem wetem kaen fasin mo, taem tufala i stap storeyan, hem i askem man ya blong stadi Baebol wetem hem, be man ya i no wantem. Be, hem i sapraes long pablik tok we oli reregud long hem mekem se hem i jenisim tingting blong hem, mo afta long miting hem i agri blong stadi. Yangfala man ya i gohedgud long saed blong speret mo sam manis biaen hem i baptaes. Yumi save lanem tri poen long ekspiryens ya we oli save halpem yumi.
2 Faswan, oli bin talemaot Pablik Miting fastaem. ?Yufala i stap yusum ol smol pepa we oli prentem finis blong talemaot program blong ol miting blong kongregesen blong yufala? Taem jeaman i talemaot stampa blong pablik tok we bambae oli givim long wik we i kam, tingbaot olgeta long teritori blong yufala we maet oli gat spesel intres long poen ya, nating se oli stap ridim ol buk blong yumi oltaem no no gat. Sam man oli no laekem blong rid, no oli faenem i had blong rid, be maet oli rere blong lesin long wan tok we i stanap long Baebol.
3 Seken samting, oli mekem welkam long nyuwan we i jes kam. Sipos yu mekem plan blong stap long Haos Kingdom sam taem bifo miting i stat, yu save mekem welkam long ol brata mo sista mo ol nyuwan tu. (Hib. 10:24) Sipos i fastaem blong wan nyuwan blong kam, maet hem i no save wanem bambae i hapen. Eksplenem long hem se ol miting blong yumi oli stat wetem wan singsing mo prea, mo talem long hem olsem wanem bambae oli mekem miting ya. Sipos i oraet, askem hem blong sidaon wetem yu blong mekem se yu save serem Baebol mo buk blong singsing wetem hem. Askem hem blong storeyan wetem yu long eni kwestin we maet hem i gat taem miting i finis.
4 Namba tri samting, brata i bin reregud long tok blong hem. Olgeta we oli gat blesing ya blong stanap from ful kongregesen blong mekem pablik tok oli spenem plante haoa blong rere mo talem bakegen tok blong olgeta blong oli save pusum ol man we oli lesin blong gat bigfala lav moa mo mekem ol gudfala wok. Yumi evriwan i kasem plante trabol tede, mo ol trutok long Tok blong God we oli mekem man i haremgud, hemia nao wanem we yumi nidim blong yumi save stanap strong. Yes, nating se pablik tok i fulap long plante gudfala save, bambae i no givhan long yumi wanwan sipos yumi no lesingud long wanem we brata i talem. ?Samtaem yu faenem i had blong stap kwaet mo lesin taem brata i stap givim tok? Maet i save givhan bigwan sipos yu raetem sam smol not, olsem we yumi stap mekem long taem blong ol asembli blong yumi. Yu mas sua blong folem long Baebol blong yu, ol vas we brata i ridim mo eksplenem.
5 Sosaeti i bin givim plante pablik tok we oli tokbaot plante poen long Baebol. Bodi blong ol elda i wok tru long presiden elda no wan brata we hem i jusum, blong lukaot long program blong ol Pablik Miting blong kongregesen. Ol stampa tok we Sosaeti i givim, oli jusum blong oli laenap long lokol nid we i stap. Yufala i no mas mestem wan long ol save ya we yufala i nidim, mo sapotem fulwan Pablik Miting blong kongregesen blong yufala evri wik.