Mekem Intres Blong Ol Visit Bakegen i Kam Bigwan Moa
1 Minista wok i sem mak olsem fasin blong wokem garen, mo mekem ol visit bakegen i olsem fasin blong digim graon raon long ol plan mo putum wora long olgeta. (Mat. 13:23; Luk 10:2; 2 Kor. 9:10) Olsem ol man blong “joen wetem God blong mekem wok blong hem,” yumi gat wan responsabiliti blong givhan long wan nyufala sid we i gru smol finis, blong kam bigwan mo karem frut. (1 Kor. 3:6, 9) ?Wanem nambawan rod blong mekem samting ya?
2 Kwik blong mekem visit bakegen long olgeta we oli soem intres. Lukluk bakegen ol not blong yu long pepa blong prij, mo jusum hu nao bambae yu visitim mo wanem bambae yu tokbaot. Kolosap oltaem poen we bambae yu tokbaot i stanap long wanem yu bin tokbaot long fastaem we yu toktok wetem man ya. Rere blong jenisim toktok blong yu, holem sam narafala poen blong Baebol long tingting blong yu we yu save yusum tu. Oltaem i gud blong yusum Baebol, luksave paoa blong hem blong tajem hat.—Hib. 4:12.
3 Sipos yu bin livim buklet ya “?God i Rili Kea Long Yumi?,” yu save statem storeyan olsem se:
◼ “Plante man we oli ting hevi long skul oli bilif se God bambae i spolem wol ya. Sam narafala oli fraet se man bambae i mekem samting ya hem wan. ?Wanem tingting blong yu? [Wet long ansa.] Baebol i talem long yumi se God bambae i no save spolem wol. Bambae Hem i klinim from ol rabis fasin, mekem i kam wan ples blong pis mo seftaem.” Pulum tingting i go long pej 22, mo ridim Proveb 2:21, 22, we i stap ya. Sipos man ya i soem intres, eksplenem olsem wanem blong mekem Baebol stadi no askem hem blong karem ol nyufala magasin, mo mekem plan blong gobak mo storeyan moa long saed blong promes blong God long wan nyufala wol.
4 Sipos yu bin seremaot buklet ya “Gavman,” yu save yusum:
◼ Ol poen long pej 154-156 blong Reasoning buk. No yu save askem kwestin ya se: “?Yu save se Baebol i tokbaot tu hop? Wan i blong laef blong olwe long wol ya. Buklet ya i eksplenem olsem wanem samting ya bambae i kamtru.” Afta, openem buklet long pej 15, mo ridim trifala vas we oli stap ya.
5 Taem yu gobak blong luk wan man we i intres long saed blong skul we yu bin livim buklet ya “!Harem Gud Long Wol!” wetem hem, maet i stret blong yu save talem se:
◼ “Ating yu bin talem Prea blong Masta plante taem. ?Yu tingbaot wanem, taem yu askem blong Kingdom blong God i kam? Dipen long ansa blong man blong haos, pulum tingting long ol pija 41 kasem 49, mo ridim Daniel 7:14. Maet yu save gohed long storeyan taem yu eksplenem se, taem Kingdom blong God i kam i minim en blong ol fasin nogud mo fasin blong harem nogud. Soemaot se sipos yumi stret long ae blong God, yumi save haremgud long laef we i no save finis long Paradaes long wol ya.
6 Tingbaot se yumi save mekem wan visit bakegen long eniman we i bin lesin, nating se yumi bin livim wan buk no no gat. Traem mekem program blong holem sam taem evri wik blong mekem ol visit bakegen. Jeova bambae i blesem fasin traehad blong yu blong mekem intres we yu faenem i kam bigwan moa. Bambae i karem frut we i leftemap nem blong hem.—Jon 15:8.