Mekem Ol Visit Bakegen Long Olgeta We Oli Karem Buklet
1 Aposol Pol i talem ol gudfala toktok long ol Kristin long Filipae, from we ‘oli soemaot se oli tingbaot hem bakegen.’ (Fil. 4:10) Sipos yumi folem eksampel blong olgeta long wok blong prij, bambae yumi ‘tingbaot bakegen’ olgeta we yumi bin prij long olgeta, mo samting ya bambae i pusum yumi blong visitim olgeta bakegen.
2 Sipos yu bin livim buklet ya “Gavman Ya We Bambae i Mekem Paradaes,” maet yu talem samting olsemia:
◼ “Mi stap tingbaot storeyan blong yumitu lastaem, mo i gat tu vas we oli kam long tingting blong mi we mi laekem blong soem long yu. Maet yu rimemba se yumitu bin tokbaot we bambae i olsem wanem sipos God i rul antap long wol. Long Baebol, Jeova God i promes se samting ya bambae i hapen. [Ridim Daniel 2:44.] ?Yu yu bilif se samting ya i save hapen? [Wet long ansa.] Lesin long tok we God i talem, blong soem se hem i naf blong mekem ol promes blong hem oli kamtru. [Ridim Aesea 55:11.] ?Yu ting se samting ya i mas mekem yumi trastem promes long saed blong Kingdom blong God? ?Be wetaem bambae God i mekem ol promes blong hem oli kamtru?” Eksplenem se bambae yu ansarem kwestin ya nekis taem.
3 Maet yu talem samting olsemia taem yu visitim bakegen wan man we hem i bin karem buklet ya “When Someone You Love Dies”:
◼ “Mi mekem wan spesel visit long yu tede, from we yumitu bin tokbaot taem we yumi lusum wan we yumi laekem tumas long ded.” Soem pija long pej 30, mo talem se: “?Yu tingbaot we yumi bin luk pija ya blong ol hapi man we oli laef bakegen long ded, taem oli mitim bakegen olgeta we oli laekem tumas? Taem mi lego yu lastaem, mi bin askem wan kwestin se, weples samting ya bambae i kamaot, long heven no long wol ya. Maet yu faenem finis ansa we Baebol i givim, long pej 26 blong buklet ya.” Tokbaot ol bigfala poen long haf 3 kasem 5, mo ridim Jon 5:21, 28, 29. Sipos i gat taem, ridim sam long ol narafala vas long pej ya.
4 ?Yu yu bin statem wan stadi long “Look! I Am Making All Things New”? Long nekis visit, maet yu save mekem olsem:
◼ Gobak long pej 30, mo poen i go long kwestin ya: “?Baebol i nambawan long wanem rod?” Nao tanem i go long pej 3 mo 4, mo storeyan long haf 1 kasem 4, mo long pija long fored blong buklet. Ridim wan no tu vas we oli stap long futnot blong haf 4. Eksplenem se Baebol nomo i save givim wan nambawan hop olsem. Mekem plan blong kambak bakegen. !Afta namba tri visit, sipos i luk olsem we stadi bambae i gohed, yu save raetem wan nyufala stadi long ripot blong yu!
5 Maet yu storeyan moa long buklet ya “The Divine Name That Will Endure Forever” long fasin ya:
◼ “Lastaem, mi bin soem long yu nem blong God long Baebol. Blong save mo yusum nem ya Jeova, i wan impoten haf long wosip blong yumi.” Openem buklet long pej 31, ale tokbaot ol bigfala poen long ol fo laswan haf, mo ridim Jon 17:3 mo Maeka 4:5. Eksplenem se i gat wan program blong stadi Baebol we i save soem olsem wanem nem blong God bambae i kam tabu long stret rod, mo olsem wanem yumi save haremgud long ol blesing blong paradaes long wol.
6 Taswe, tingbaot bakegen olgeta we yu bin prij long olgeta. Gobak plante taem. Mekemrere wan gudfala storeyan blong serem wetem olgeta. Yu yu save kam wan man we i “gat frut blong tok ya,” taem yu mekem sam nyufala disaepol.—Mat. 13:23.