Soem Trufala Fasin Kea Long Olgeta We Oli Intres
1 Wok blong talemaot Kingdom long olgeta ples blong wol bambae i finis i no longtaem, mo biaen, olgeta we ‘oli no save God’ bambae oli lus. (2 Tes. 1:7-9) Taswe, trufala fasin blong kea long laef blong ol narafala, i stap pusum ol man blong Jeova blong traem kasem olgeta man wetem mesej blong Kingdom.—Sef. 2:3.
2 Evri manis, oli spenem plante milyan haoa blong traem faenem olgeta we oli wantem harem “gud nyus blong samting we i moagud.” (Aes. 52:7) Long manis ya, plante man oli karem Wajtaoa mo Wekap! no buklet ya ?Wanem Samting We God i Wantem Yumi Blong Mekem? we yumi stap seremaot. Trufala fasin blong kea long ol man ya i mas pusum yumi blong gobak mo traem mekem intres ya i gru moa.—Prov. 3:27.
3 Raetemdaon Ol Stret Save: Bambae yu kasem moa frut sipos yu raetemdaon fulwan mo long stret fasin, ol man we oli intres mo we oli karem buk. Ol save olsem, nem mo adres blong olgeta, dei mo taem we yu bin mitim olgeta, ol buk we yu bin livim, mo samting we yu bin tokbaot, oli save givhan long yu blong karem moa frut taem yu visitim olgeta bakegen. Mo tu, sipos yu raetemdaon sam toktok we oli bin talem long fastaem we yu mitim olgeta, yu save yusum ol toktok ya bakegen taem yu mekem visit.
4 Gobak Kwiktaem: ?Yu mekem visit finis long hamas man we yu bin givim sam buk long olgeta long manis we i pas? ?I gat plante wik i pas finis we yu no moa luk olgeta bakegen? Fasin blong rili kea long fyuja laef blong olgeta i mas pusum yu blong gobak kwik, maet sam dei nomo afta we yu mitim olgeta. Olsem nao, oli no fogetem yet samting we yufala i bin tokbaot. Sipos yu gobak kwik blong traem mekem intres i gru, maet yu save blokem ol traehad blong Setan blong “kam tekemaot tok ya we oli harem.”—Mak 4:15.
5 I Impoten Blong Mekemrere: Frut we yu karem long ol visit, i joen stret wetem fasin blong yu blong mekemrere. Rerem fastok blong yu bifo we yu gobak. Laswan pej blong Kingdom Wok Blong Yumi blong Epril 1997, i talem sam rod blong storeyan we oli gud blong yusum, taem yu seremaot ol magasin no buklet ya Samting We God i Wantem. Nekiswan samting se, yu mas rere long tingting blong yu blong serem sam poen wetem man blong haos taem yu gobak. ?Yu save talem wanem blong mekem intres i gru moa? ?Olsem wanem blong statem wan Baebol stadi?
6 Taem yu gobak long wan man we yu bin storeyan wetem hem long rod blong klinim wol ya mo blong mekem i kam wan ples we i moagud, maet yu talem se:
◼ “Lastaem we mi toktok wetem yu, yumitu agri se i nidim sam bigfala jenis long wol ya blong mekem i kam wan paradaes we i gat pis long hem. ?Yu ting se ol man oli naf blong mekem samting ya? [Wet long ansa.] Traem makem from wanem God i mas kam insaed long ol bisnes blong man.” Ridim Ol Sam 37:38. Nao openem buklet ya Samting We God i Wantem, i go long stadi 5, mo yusum sam poen long haf 4 mo 5 blong soem olsem wanem God bambae i mekem profet tok ya i kamtru. Nao askem man blong haos blong stadi Baebol wetem buklet ya.
7 Sipos yu bin tokbaot Kingdom blong God mo yu bin livim buklet ya “Samting We God i Wantem,” taem yu gobak yu save talem olsem:
◼ “Lastaem yumitu storeyan, yumi tokbaot se Kingdom blong God i wan trufala gavman we bambae i rul antap long fulwol. Baebol i soem se Jisas Kraes bambae i king blong kingdom ya. ?Yu ting se wan gavman mo king olsem, oli save karem blesing i kam long ol man?” Wet long ansa. Openem buklet ya Samting We God i Wantem, i go long stadi 6. Yusum sam poen long haf 6 mo 7, mo pija long pej 13, blong soem wanem we Kingdom blong God bambae i mekem blong ol man long fyuja. Ridim Daniel 2:44 mo askem man blong haos blong stadi Baebol.
8 Sipos yu bin faenem wan man we i agri se ol skul blong wol oli bin mekem plante problem i kamaot long wol, maet yu askem hem taem yu gobak:
◼ “?Yu bin tingbaot olsem wanem blong makemaot skul we God i glad long hem? [Wet long ansa.] Buklet ya ?Wanem Samting We God i Wantem Yumi Blong Mekem? i tokbaot ol samting we oli makemaot trufala skul.” Openem buklet i go long stadi 13, nao talem faefala poen we oli stap long italik long haf 3-7. Yu save gohed olsem: “Yumi mas faenem trufala skul, mo antap long hemia, yumi mas faenemaot ol samting we God i wantem yumi wanwan blong mekem.” Ridim Jon 4:23, 24. Talem se yu glad blong tokbaot samting ya moa wetem hem. Gobak long stadi 1 blong buklet ya, mo soem long hem olsem wanem blong mekem stadi.
9 Taem yu gobak blong storeyan moa long saed blong glad insaed long famle, maet yu talem olsem:
◼ “Long faswan taem we yumitu bin storeyan, mi bin serem wetem yu rod blong kasem glad insaed long famle, hemia blong folem ol advaes long Tok blong God, Baebol. Long saed blong ol samting we ol famle long taem blong yumi oli nidim, ?yu yu bilif se ol tok blong Baebol i stret long laef blong ol man bifo nomo, no yu bilif se i stret long taem blong yumi tu?” Wet long ansa. Soem buk ya Save. Openem i go long japta 2, mo ridim tok we wan man i talem long haf 13. Yusum ol poen long haf 3, mo askem man blong haos sipos famle blong hem i wantem mekem Baebol stadi.
10 Sipos yumi raetemdaon ol save we i stret, yumi mekemrere gud, mo yumi gobak kwik blong mekem intres i gru moa, yumi save soemaot lav long ol man raonabaot long yumi, we bambae i pulum olgeta blong folem rod blong kasem laef.—Mat. 22:39; Gal. 6:10.