Yusumgud Nyufala Buklet
1 Long distrik asembli blong yumi we i jes pas, yumi glad tumas blong kasem nyufala buklet ya When Someone You Love Dies (Taem Wan We Yu Laekem Tumas i Ded). Buklet ya i stret nomo long ol man long olgeta ples, from we plante oli bin harem nogud from oli lusum wan we oli laekem tumas long ded. Ol foto mo pija blong hem we oli pulum ae blong man oli mas mekem i isi blong seremaot. Long pej 29, klia pija blong Lasros we i stap girap bakegen long ded i soem se Jisas i “wantem tumas blong tekemaot ol trabol we ded i mekem long ol man.” Pija we i kavremap nekis pej fulwan, i soem fasin glad we bambae i kamaot long nyufala wol taem ol man oli laef bakegen long ded. !Samting ya i mas mekem hat blong olgeta we oli harem nogud from ded i glad!
2 Buklet ya i save givhan bigwan blong leftemap tingting blong ol man we oli harem nogud from oli lusum wan long ded. Plan blong hem i mekem i isi blong yusum blong storeyan. Ol kwestin we oli makem ol bigfala poen, oli stap long bokis long en blong wanwan haf, oli no stap daon long ol pej wanwan. Yu save yusum ol “Kwestin ya blong Tingting Dip” long wanem rod yu ting se bambae i givhan moa long studen blong yu.
3 Taem yu mekem ol visit bakegen, jusumgud ol poen blong storeyan insaed long buklet. Maet yu ting se i stret blong soem nem blong ol japta long pej 2 mo askem man blong haos blong jusum wanem hem i intres long hem. Yu mas luksave nid blong wanwan man. Letem hem i talemaot ol filing blong hem, mo afta, soem olsem wanem buklet i save mekem hem i haremgud. Evri haf i yusum plante vas blong Baebol we oli givim stampa blong hop blong yumi.
4 Smol stampa tok long pej 5, “There Is a Real Hope,” (I Gat Wan Trufala Hop) i leftemap nambawan hop blong ol dedman we i stanap long Baebol. Hemia i mas pulum man blong wantem storeyan long “A Sure Hope for the Dead,” (Wan Hop Blong Ol Dedman We i Sua) long pej 26-31. Bokis long pej 27 i givim sam moa “Vas Blong Baebol We Oli Mekem Man i Haremgud.” Wan man blong haos we i harem nogud from i lusum wan long ded, bambae i luksave kwiktaem se i tru tumas, Jeova i “God we i stampa blong givhan.”—2 Kor. 1:3-7.
5 Buklet ya i gat sam narafala bokis tu we, long kaengud fasin, oli tokbaot ol defren filing we man i gat taem wan we hem i laekem tumas i ded. Oli soem olsem wanem blong winim fasin sore long ded mo olsem wanem ol narafala oli save givhan long trabol ya we i mekem man i harem nogud tumas. I gat wan bokis long pej 25 we stampa blong hem se “Helping Children Deal With Death.” (Halpem Ol Pikinini Blong Winim Fasin Blong Krae From Ded) Samting ya i rili save halpem ol papa mama we oli mas winim problem ya.
6 Holem wan buklet oltaem wetem yu, mo yusum taem yu tekem jans blong prij. Maet yu wantem visitim haos blong ol dedman long teritori blong yu blong luk sipos oli wantem gat sam buklet blong givimaot long ol famle we oli harem nogud from wan i ded. No long waes fasin, maet yu wantem toktok wetem samfala we oli stap harem nogud taem oli gobak long beregraon blong visitim gref blong wan we oli laekem tumas.
7 Yumi glad tumas se Jeova i God ya we i “save leftemap tingting blong man we i stap harem nogud.” (2 Kor. 7:6) I wan blesing blong yumi blong joen long wok ya blong ‘leftemap tingting blong olgeta we oli krae from ded.’—Aes. 61:2.