Givhan Long Ol Narafala Blong Haremgud
1 Plante man oli les blong harem ol nyus long saed blong disasta, faet, raf fasin blong kilim man, mo fasin blong safa. Fasin blong haremgud i wan samting we ol man oli rili nidim, be ol nyus tede oli no givim samting ya long olgeta. Blong mekem man i haremgud i minim “givim paoa mo hop long hem” mo “mekem sore mo trabol blong hem i kamgud lelebet.” Yumi ol Wetnes blong Jeova, yumi gat evri samting we yumi nidim blong mekem wok ya. (2 Kor. 1:3, 4) Ol buklet blong yumi we oli tokbaot Baebol mo we bambae yumi seremaot long Julae mo Ogis oli givimaot ol mesej blong trutok we oli save mekem man i haremgud. (Rom 15:4) Hemia nao sam rod blong seremaot olgeta long ol defren kaen man:
2 Wan nogud store long nyus i save givim jans long yumi blong wetnes mo mekem narafala i haremgud. Maet yu talem samting olsemia:
◼ “Taem ol nogud samting olsem oli hapen, samfala oli stap tingting sipos God i rili stap no nogat, mo sipos hem i rili kea long yumi. [Wet long ansa.] Wan rod blong faenemaot sipos God i stap, i blong folem wan rul we i stap longtaem finis i kam.” Ridim Hibrus 3:4. Soem sam narafala samting raonabaot long yumi we i nidim wan man blong wokem olgeta. Nao gohed olsem: “Mi mi gat wan buklet we mi save se bambae i mekem yu yu haremgud. Nem blong hem ?God i Rili Kea Long Yumi? [Ridim ol kwestin long fored.] Hem i givim pruf se God i stap, mo se i no longtaem, bambae hem i finisim ol nogud trabol we yumi stap kasem tede. ?Yu yu glad blong ridim buklet ya?” Mekem plan blong kambak.
3 Taem yu gobak blong luk man ya bakegen, yu save talem se:
◼ “Yumitu bin tokbaot ol pruf ya se God i stap mo mi bin livim buklet ya ?God i Rili Kea Long Yumi? wetem yu. Maet yu bin ridim finis poen ya long pej 7. [Soem pija mo tokbaot haf 15.] Hemia wan samting nomo blong soem se i mas gat wan God i stap we i rili kea long yumi. [Ridim haf 27 long pej 9.] Wan stadi long saed blong Baebol i bin givhan long mi blong stanap strong tru long ol problem long laef, from we hem i soemaot tingting blong God long evri samting.” Talem se yu glad blong soem long hem olsem wanem blong stadi.
4 Maet yu wantem yusum buklet ya “Speret Blong Ol Dedman—?Oli Save Halpem Yu no Spolem Yu? ?Oli Rili Stap?” Yu save storeyan olsemia:
◼ “Plante man oli wantem save sipos ol dedman oli pas i go long wol blong ol speret man.” Yusum store long pej 2 mo 3, nao talem se: “Ol bilif olsem oli stap long evri kantri blong wol. Be kwestin we i moa impoten se: ?Tok blong God Baebol i talem wanem long bisnes ya?” Ridim haf 2 long pej 4. Askem man blong haos wanem tingting blong hem, mo wet long ansa blong hem. Nao ridim wan long ol vas long pej 5. Biaen, eksplenem risen blong buklet ya, mo askem hem blong karem blong 40 VT.
5 Taem yu gobak, maet yu yusum ol toktok ya blong traem statem wan Baebol stadi:
◼ “Mi wantem soem long yu wan narafala vas we i tokbaot wanem i hapen long ol man taem oli ded. Long Jenesis 2:7, God i talemaot wanem i hapen long Adam mo Iv taem tufala i ded. [Ridim haf 4 long pej 4 long buklet ya Speret Blong Ol Dedman.] Taswe, ol dedman oli no kam ol speret man. ?Yu ting se wanem samting i hapen long olgeta? [Wet long ansa.] Plante man we oli wantem faenemaot se ded i olsem wanem oli bin stadi long Tok blong God, Baebol. Mi mi askem long yu blong tekem jans ya blong stadi.” Eksplenem Baebol stadi we yumi mekem long haos blong ol man mo mekem plan blong statem stadi ya.
6 Sipos yu stap seremaot buklet ya “Gavman Ya We Bambae i Mekem Paradaes,” yu save askem se:
◼ “?Yu ting se wol ya bambae i olsem wanem sipos God nomo i rulum hem? [Wet long ansa.] Taem yumi talem Prea blong Masta, we Jisas Kraes i tijim yumi long hem, yumi stap askem se God bambae i kam rula blong wol ya. [Openem buklet i go long pej 3, mo ridim haf 1 we i tokbaot Matyu 6:10.] Sipos yu wantem stap long wan wol olsemia, yu mas ridim buklet ya.” Talem se yu glad blong livim buklet ya wetem hem.
7 Sipos lastaem yu bin livim buklet ya “Gavman Ya We Bambae i Mekem Paradaes,” maet yu talem samting olsemia taem yu gobak:
◼ “Mi mi stap tingbaot storeyan blong yumitu lastaem, nao tu vas oli kam long tingting blong mi. Mi glad blong ridim tufala vas ya long yu. Maet yu rimemba se yumi bin tokbaot we God bambae i kam rula blong wol ya. Long Baebol, Jeova God i promes se samting ya bambae i hapen. [Ridim Daniel 2:44.] ?Yu yu bilif se samting ya i save hapen? [Wet long ansa.] Lesin long tok blong God long saed blong fasin blong hem blong mekem ol promes blong hem oli kamtru. [Ridim Aesea 55:11.] ?Yu ting se samting ya i mas pulum yumi blong trastem Kingdom blong God? ?Be wetaem bambae God i mekem promes blong hem i kamtru?” Eksplenem se bambae yu ansarem kwestin ya nekis taem.
8 Yumi mas rili traehad long ol manis we oli kam blong folem fasin blong Jisas mo ‘mekem olgeta we oli stap krae oli haremgud.’—Aes. 61:2.