Kasem Blesing From Ol Nyufala Pablik Tok
1 Proveb 4:18 i stret nomo long samting we i kamaot long ol Wetnes blong Jeova long taem blong yumi, hem i se: “Rod blong ol stret man i olsem wan laet we i saengud we i stap kam bigwan gogo dei i fulap gud long laet.”
2 Olsem vas ya i soem, long stret taem blong hem, Kristin kongregesen i stap kasem ol klia mo nyufala save long ol tijing blong Baebol. (Mat. 24:45-47) Maet yu save talem sam eksampel long saed ya, we yu bin makem, stat long taem ya we yu jes joen wetem ol Wetnes blong Jeova. Ol miting blong kongregesen, olsem ol pablik tok, oli halpem yumi blong folemgud laet blong trutok, we i stap kam bigfala moa.
3 Nyufala Plan Blong Ol Pablik Tok: I no longtaem i pas, Sosaeti i jenisim plan blong sam pablik tok. Oli putum ol nyufala save long ol tok ya, mo oli mekem ol bigfala poen oli kam klia moa. Blong kongregesen i kasem ful blesing from ol nyufala save ya, ol brata we oli givim pablik tok, oli mas yusum nomo ol nyufala plan blong pablik tok.
4 Sipos yu wantem blong kasem ol gudfala samting long ol pablik tok, fastaem yu mas tingting long stampa blong ol tok ya. Ale, bifo yu go long wan Pablik Miting, traem tingbaot ol laswan save long poen ya, we i bin kamaot long ol tiokratik buk. Nao taem yu stap lesin, traem tingbaot ol poen we maet brata ya i tokbaot biaen. Raetemdaon ol nyufala rod blong talemaot ol trutok ya, blong yu save yusum long fyuja. Samting ya bambae i mekem se yu kasem bigfala blesing long ol nyufala pablik tok ya.
5 Ol Pablik Tok Oli Mas Givim Save Mo Pusum Olgeta We Oli Stap Lesin: Taem Jisas i toktok, hem i kasem hat blong ol man we oli stap lesin long hem. Antap long hil, Jisas i givim wan Bigfala Toktok, wan nambawan pablik tok we i bitim ol narafala pablik tok. Long lastok blong hem, Matyu 7:28 i talem se: “Taem Jisas i finisim ol tok ya ol man oli sapraes long ol tok blong hem.”
6 Ol bodi blong ol elda oli mas tingbaot eksampel blong Jisas, nao oli mas waes taem oli jusum ol nyufala brata blong givim pablik tok. Oli mas jusum nomo ol brata we oli gat gudfala fasin blong tij, we bambae oli folemgud ol plan we Sosaeti i givim, mo oli save holem intres blong ol man we oli lesin, kasem en blong tok ya. Ol brata we oli kasem blesing ya blong givim pablik tok, oli mas traehad oltaem blong mekem fasin blong toktok blong olgeta i kam moa gud. Mo oli mas akseptem eni advaes mo ol tok we ol elda oli talem long olgeta.
7 Olsem Aesea 65:13, 14 i talem, fasin ya blong haremgud long saed blong speret we ol man blong God oli gat, i stap gohed blong kam bigwan moa. Plan blong ol pablik tok, i wan long plante rod blong ‘Jeova i tijim yumi.’—Aesea 54:13.