Ansa Long Wan Kwestin

● ?Ol studen long Tiokratik Skul, oli mas givim plante tok, no sam nomo?

Wan bigfala risen blong Tiokratik Skul i blong givhan long ol man blong toktok long fored blong ol narafala man. From samting ya, program blong Tiokratik Skul i givim bighaf blong ol tok long ol brata.

Be wan narafala risen blong skul ya i blong trenem olgeta man blong Jeova blong oli kam moa gud long wok blong prij mo tij, long minista wok blong ol Kristin. From samting ya, i stret we ol sista tu oli joen long skul ya.

Blong skul ya i givhan long olgeta we oli joen long hem, i gud we ol studen oli givim plante tok lelebet. Taem studen i givim wan tok, i gud we hem i givim nekiswan tok blong hem bifo we tri manis i pas. Sipos i stret long kongregesen, ol brata oli save givim moa tok. Oltaem ol elda oli givim namba wan tok mo ol bigfala poen blong Baebol riding. Taswe oli no nid blong mekem sam narafala tok long skul tu.

Kolosap 50 yia finis, Tiokratik Skul i givhan long plante milyan man blong gru long saed blong speret, mo blong lanem olsem wanem blong kam gud moa long wok blong talemaot Kingdom mesej. Olgeta evriwan oli mas yusum gudfala samting we Jeova God i stanemap blong givhan long yumi. Yumi mas traehad blong kam we yumi man blong wok we God i stap harem gud long yumi. Yumi mas kam we yumi ‘no gat sem long ol wok blong yumi, we yumi man we yumi stap tijim ol man long trutok blong God, long stret fasin nomo.’​—⁠2 Timote 2:⁠15.