Olgeta We Oli Lidim Kongregesen—Elda We i Lukaot Long Tiokratik Skul
1 Elda we i lukaot long Tiokratik Skul i wan brata we i stap longtaem finis long trutok. Hem i wok had long fasin blong toktok mo tij, mo samting ya i pulum ol brata sista blong ona long hem mo blong wokgud wetem hem. (1 Tim. 5:17) ?Hem i gat wanem responsabiliti?
2 Hem i lukaot long laebri blong Tiokratik Skul long Haos Kingdom. Hem i intres tumas long olgeta we oli naf, mo i leftemap tingting blong olgeta blong joen long skul ya. Hem i meksua se i gat wan gudfala program blong mekem se ol brata sista oli kasem ol pepa blong tok blong olgeta samwe long tri wik bifo we oli mekem tok. Hem i mas savegud olgeta long kongregesen. Hem i mas tingbaot evri studen wanwan mo ol tok we oli naf blong mekem. Wan narafala brata i save givhan long hem blong mekemrere program blong ol tok, be hem nao i mas lukaot long wok blong jusum wanem tok i stret long ol studen wanwan blong mekem.
3 Elda we i lukaot long Tiokratik Skul i mas reregud evri wik. Blong kam naf blong tijimgud ol studen long skul ya, hem i mas stadi gud long ol samting we bambae ol studen oli tokbaot. Long fasin ya, bambae hem i save pulum kongregesen blong stap glad long program blong skul, luksave sipos ol studen oli yusum ol poen we oli stret long tok blong olgeta, mo talemaot ol impoten poen we bambae oli kamaot long ol kwestin blong tingtingbak.
4 Elda ya i lesingud long ol tok blong ol studen mo hem i presem gudfala wok blong olgeta. Hem i mas eksplenem from wanem wan studen i mekemgud tok blong hem, no from wanem studen ya i mas wok bakegen long wan poen. Taem wan studen i nidim sam moa help blong mekemrere ol tok blong hem, elda we i lukaot long skul i save givhan long studen ya, no hem i save askem long wan narafala brata blong halpem studen ya.
5 Sipos yumi wantem kasem gudfala frut from hadwok blong elda ya we i lukaot long Tiokratik Skul mo ol narafala brata we oli wok wetem hem blong givim advaes, yumi mas kam oltaem long miting blong Tiokratik Skul. I gud blong mekem olgeta tok we oli givim long yumi, folemgud ol advaes we yumi kasem, mo lesingud long ol advaes we oli givim long ol narafala studen tu. Long fasin ya, bambae yumi kam gud moa long wok blong talemaot mesej blong Kingdom long fored blong plante man mo long ol haos wanwan.—Wok 20:20; 1 Tim. 4:13, 15.