Wan Kwestin
◼ ?Long wanem rod yumi mas lukaot long ol samting we yumi yusum long wok blong prij?
1 Maet wan pablisa i tingbaot wan gudfala fasin blong storeyan long Baebol wetem ol man. Be maet hem i no reregud long saed blong ol samting we hem i yusum. Maet hem i stanap long doa we hem i no gat stret buk blong givimaot. Maet ol magasin, buklet mo traket long basket blong hem oli doti no maet ol pej oli tanem no oli gat hol long olgeta. Maet hem i no gat pen blong raetem ol pepa blong prij from we hem i no mekem reregud basket blong prij. I impoten blong luklukgud long ol samting we yu yusum bifo we yu go long wok blong prij.
2 ?Wanem samting i mas stap insaed long wan basket we i reregud? Yumi nidim wan Baebol. Putum sam pepa blong prij insaed long hem tu. Mekem sua se yu gat stret buk we yumi stap givimaot long manis ya. Yumi nidim tu ol nyufala magasin, wetem sam traket mo buklet. Karem wan Reasoning buk wetem yu. Sipos yu karem Kingdom Wok Blong Yumi blong manis ya, yu save luklukbak long ol rod blong storeyan bifo we yu go long haos blong ol man. Sipos yu stap prij long ples we maet yu mitim ol man we oli toktok narafala lanwis, i gud blong karem buklet ya Good News for All Nations. Sipos yu karem wan long ol buk we oli blong ol yangfala, bambae yu rere blong toktok wetem ol yangfala tu.
3 Evri samting we yumi yusum i mas stap long prapa ples blong hem long basket. Yu no nid blong karem wan nyu basket, be hem i mas klin mo gud. Basket blong yu i haf long ol tul we yu yusum blong talemaot gud nyus. Lukaotgud long hem.