Ansa Long Wan Kwestin

◼ ?I stret blong givim smol mane long narafala we i stap karem yumi long trak blong hem?

Sam long yumi i mas dipen long ol narafala oltaem blong karem yumi long trak blong olgeta, long ol miting mo long wok blong prij. From kaen fasin blong plante brata mo sista, oli mekem wan spesel fasin traehad, mo wetem lav, oli yusum taem, trak, mo mane blong olgeta blong karem yumi. Nating se oli mas hareap blong rere eli blong go long miting mo oli mas gobak long haos let, oli glad blong karem yumi.

Rul we i stap long Galesia 6:5 i stret long bisnes ya, olsem i stret long ol narafala Kristin wok blong yumi. Hem i se: “Evri man i gat basket blong hem blong karem.” Taswe, taem wan brata i karem yumi oltaem long trak blong hem, sipos yumi naf, i stret we yumi soem fasin tangkyu, i no long ol tok blong yumi nomo, be wetem smol presen mane tu, blong givhan long hem blong pem bensin.​—Mat. 7:​12; 1 Kor. 10:⁠24.

Nating se brata ya i no askem yumi blong givim smol mane, mo maet i luk olsem we hem i no nidim, be bambae hem i glad sipos yumi soem se yumi rili wantem givhan long hem. Maet hem i no karem mane ya, samting ya i stap long hem nomo. Be i stret we yu traem givim long hem. Sipos yu no naf blong givim smol mane naoia, yu save tingbaot bakegen biaen. Maet yu save givim smol moa long hem nekis taem we hem i karem yu.​—Luk 6:​38.

Olgeta we oli gat trak oli soemaot bigfala lav, taem oli stap karem ol narafala we oli no gat rod blong kam long ol miting mo joen long wok blong prij. (Prov. 3:​27) Long semtaem, olgeta we oli kasem kaen fasin ya, oli save soem lav taem oli talem tangkyu wetem smol presen mane, we i stret long samting we oli naf blong givim.​—Kol. 3:​15.