Yumi Gat Wan Wok Blong Mekem
1 Jisas i givim oda long ol man blong hem, se oli mas ‘pulum ol man long olgeta ples blong wol oli kam ol man blong hem.’ (Mat. 28:19) Long 232 kantri mo aelan blong wol, bitim faef milyan man oli stap presem Jeova God. Samting ya i olsem pruf we i laef, blong soem se oda ya blong Jisas i stap kamtru. ?Be olsem wanem long yumi wanwan? ?Yumi tinghevi long wok ya blong prij we hem i givim long yumi?
2 Wan Samting We Yumi Mas Mekem: Wan oda i minim, “toktok we i talem long narafala blong mekem wan spesel wok.” Kraes nao i givim oda long yumi blong prij. (Wok 10:42) Aposol Pol i luksave se oda ya i putum wan wok long hem, hemia blong talemaot gud nyus. (1 Kor. 9:16) Tingbaot pijatok ya: Yu yu wan boskru blong wan sip we i stap draon. Nao kapten i givim oda long yu blong givim woning long ol man long sip, mo lidim olgeta oli go long ol smol bot blong sevem laef blong olgeta. ?Bambae yu fogetem oda ya mo lukaot rod blong sevem laef blong yu wan nomo? No gat. Ol narafala oli stap dipen long yu. I no longtaem bambae oli lusum laef blong olgeta. Yu mas mekem wok we hem i talem long yu blong mekem, mo givhan long olgeta.
3 God i talem long yumi finis se yumi mas givim wan woning. I no longtaem, bambae Jeova i finisim olgeta rabis fasin long ful wol ya. Plante milyan man oli save lusum laef blong olgeta. ?I stret we yumi fogetem denja we ol narafala oli stap long hem, be yumi tingbaot blong sevem laef blong yumi nomo? No gat. Yumi mas givhan blong sevem laef blong ol narafala.—1 Tim. 4:16.
4 Ol Gudfala Eksampel We Yumi Save Folem: Profet Esikel i harem se hem i mas talemaot wan woning long ol man Isrel we oli no obei long God. Jeova i givim wan strong woning long hem long saed blong samting we bambae i hapen sipos hem i no mekem wok ya. Hem i se: “Taem mi talem long wan rabis man se, ‘Bambae yu ded,’ be yu yu no givim woning long hem . . . , ale man ya we i rabis, bambae hem i ded from sin blong hem, be bambae mi askembak blad blong hem long yu.” (Esik. 3:18) Esikel i holemstrong long wok blong hem gogo i finis, nating se plante man oli agensem hem bigwan. From samting ya, hem i haremgud taem Jeova i mekem jajmen blong hem i kamtru long ol man ya.
5 Plante handred yia biaen, aposol Pol i raetem tok long saed blong wok blong prij we hem i mekem. Hem i talem se: “Sipos wan long yufala bambae i lus, be i no fol blong mi. From we mi mi no haedem wan samting long yufala, mi talemaot finis long yufala, olgeta samting we God i wantem.” Pol i prij long ol pablik ples mo long olgeta haos wanwan, from we hem i save se sipos hem i no mekem olsem, bambae hem i gat fol long fes blong God.—Wok 20:20, 26, 27.
6 ?Yumi gat strong tingting mo wok strong olsem Esikel? ?Yumi olsem Pol we i harem se hem i mas prij? Wok we yumi bin kasem, hem i sem mak olsem wok we tufala i bin kasem. Yumi mas gohed blong mekem wok blong yumi blong givim woning long ol man, nating se oli no kea, oli no intres no oli agensem yumi. Maet plante taosen moa oli lesin long Kingdom mesej yet, mo maet oli talem se: “Bambae mifala i kam wetem yufala, from we mifala i harem se God i stap wetem yufala.” (Sek. 8:23) Lav we yumi gat long God mo long ol narafala man, i mas pusum yumi blong no kam slak. !Yumi gat wok blong mekem blong prij!