Yumi Soem Se Yumi Glad Blong Wok
1 Deved i raetem wan profet tok long Ol Sam, se ol man blong Jeova ‘bambae oli glad blong wok,’ hemia se, oli “kwik blong joen long wan wok we oli no kasem pei from.” (Sam 110:3, NW futnot) Tok ya i stap kamtru fulwan long medel blong kampani blong ol brata blong yumi long wol. Long ol fo sevis yia we oli jes pas, ol man blong Jeova oli bin spenem bitim wan bilyan haoa blong talemaot gud nyus blong Kingdom. Mo antap long wok blong prij mo mekem disaepol, i gat plante narafala rod blong soem se yumi glad blong givhan long ol narafala.
2 Ol Rod Blong Soem Se Yumi Glad Blong Wok: Maet samfala long kongregesen oli nidim narafala blong karem olgeta oli kam long ol miting. I gud sipos yu talem long olgeta se yu yu glad blong kam tekem olgeta. Maet sam narafala oli sik, oli olfala, no oli stap slip long hospital. Yu save girap mo go visitim olgeta, no givhan long olgeta long wan rod. Maet i gat wan man no wan famle we i nidim samfala blong leftemap tingting blong olgeta. ?Yu bin tingbaot blong askem olgeta blong joen long famle stadi blong yufala sam samtaem? Maet wan paenia no wan pablisa i nidim wan narafala blong joen wetem hem long wok blong prij. Yu save talem long hem se yu glad blong prij wetem hem. Hemia nao sam rod we yumi save folem blong soem se yumi glad blong mekem i gud long ol brata mo sista blong yumi long saed blong bilif.—Gal. 6:10.
3 Ol brata oli save soem se oli glad blong mekem wok insaed long ogenaesesen blong Jeova, taem oli traehad blong kasem ol mak we oli naf blong kam wan elda no wan man blong givhan. (1 Tim. 3:2-10, 12, 13; Taet. 1:5-9) Taem namba blong yumi i stap kam bigwan moa, i gat nid blong plante brata we oli nafgud long saed blong speret. Oli mas soem se oli glad blong lidim wok blong prij mo tij, mo mekem wok blong lukaot long ol kongregesen.—1 Tim. 3:1.
4 Maet long sam manis, sam long yumi i save soem se yumi glad blong mekem moa long wok blong Jeova olsem ol haftaem paenia. Mo tu, sipos yumi jenisim sam samting long program blong yumi, maet yumi save haftaem paenia oltaem, no ating mekem wok blong fultaem paenia. ?Laef blong yumi i stret blong yumi save muf i go long wan narafala ples we i nidim moa help? ?Yumi save soem se yumi glad blong wok long Betel, we yumi givhan stret blong mekem wok i gohed long fulwol? Mo tu, i gat plante wok i stap gohed long saed blong bildim ol Haos Kingdom, ol Haos Asembli, mo ol hedkwota long plante ples blong wol. Long ol wok ya, i nidim tumas ol man we oli glad blong wok. !Yumi gat bigfala tangkyu long olgeta we oli givim taem mo paoa blong olgeta blong mekem ol gudfala wok ya, mo oli bin kasem plante bigfala blesing from!—Luk 6:38.
5 Yumi stap laef nambawan taem. !Jeova i stap yusum tabu speret blong hem blong mekem wan nambawan wok long wol wetem ol man blong hem we oli glad blong wok! Taem Jeova, tru long ogenaesesen blong hem, i askem long yumi blong joen long wan wok blong mekem moa long saed blong Kingdom, i gud yumi askem se: ‘?Mi mi stap soem se mi glad blong wok?’ Nao yumi mas prea, mo tingtinggud long samting we i stap long hat blong yumi mo long laef blong yumi. Fasin blong yumi blong fasgud long God bambae i pusum yumi blong mekem olgeta samting we yumi naf blong mekem long tabu wok blong hem. !Olsem nao, bambae yumi mekem hat blong Jeova i glad tumas!—Sef. 3:17.