Joen Long Wok We Neva Bambae Yumi Mekem Bakegen
1 Sam samtaem long ol yia bifo, Jeova i luk se i gat nid blong mekem jajmen i kamtru long sam enemi blong hem. Be, from sore blong hem, hem i givim jans long ol man we hat blong olgeta i stret, blong oli stap sef. (Sam 103:13) Blesing ya i dipen long fasin we oli mekem taem God i soem sore long olgeta.
2 Sam eksampel: Bifo we Bigfala Wora i ron long 2370 B.K.T., Noa i “wan prija blong talemaot stret fasin.” Ol man we oli lus, hemia olgeta we oli no lesin long woning blong God. (2 Pita 2:5; Hib. 11:7) Bifo we ol ami oli spolem Jerusalem long 70 K.T., Jisas i talemaot klia ol samting we ol man oli mas mekem, blong laef tru long bigfala trabol we bambae i spolem taon ya. Olgeta we oli no wantem harem woning blong hem, biaen oli harem nogud tumas. (Luk 21:20-24) Plante taem long ol yia bifo, God i givim woning olsem, mo i mekem jajmen i kamtru long ol man.
3 Wok Blong Givim Woning Tede: Long taem bifo, Jeova i talemaot se bambae hem i soemaot kros blong hem agensem rabis wol ya, mo se ol man wetem tingting daon nomo bambae oli laef tru long taem ya. (Sef. 2:2, 3; 3:8) !Taem blong talemaot woning ya i stap kam kolosap long en blong hem! Taem blong “bigfala trabol” i stap jes long fored blong yumi, mo ol man we oli gat tingting daon, oli stap hivap. Tru ya, long “garen,” ‘ol lif oli drae finis, i taem blong go tekem kakae.’ Taswe, i no gat wan narafala wok we i impoten moa, we yumi mas mekem kwik, olsem hemia.—Mat. 24:14, 21, 22; Jon 4:35.
4 Yumi mas joen long wok blong givim woning long ol narafala tede, “nating se oli harem no oli no wantem harem.” Hemia wan wok we God i bin givim long yumi, mo yumi mas fraet blong no tinghevi long wok ya. (Esik. 2:4, 5; 3:17, 18) Taem yumi joen fulwan long wok ya, yumi soemaot klia se yumi gat dip lav long God, yumi rili wari long laef blong ol man raonabaot long yumi, mo yumi gat bilif we i no save seksek long Sevya blong yumi, Jisas Kraes.
5 Naoia i Stret Taem Blong Tekem Aksin: Long ol taem we Jeova i jajem ol man bifo, i gat ol rabis fasin i kamaot biaen bakegen, from we Setan mo ol rabis enjel blong hem oli stap wok yet. Be, taem Jeova i jajem ol man tede, bambae ol samting oli defren. Paoa blong Setan bambae i finis olgeta. Bambae i no moa nidim blong yumi talemaot bakegen wan woning long ful wol, se i no longtaem, bambae i gat wan “bigfala trabol” i kasem wol ya. (Rev. 7:14; Rom 16:20) Yumi gat spesel jans blong joen long wok ya we neva bambae yumi mekem bakegen. Naoia i stret taem blong yumi tekem jans ya fulwan.
6 Wetem strong tingting, aposol Pol i talem long saed blong wok blong prij blong hem, se: “Sipos wan long yufala bambae i lus, be i no fol blong mi.” (Wok 20:26) Hem i no harem se hem i gat fol sipos ol man ya oli lus, olsem we hem i bin slak blong givim woning long olgeta. ?From wanem hem i save harem olsemia? Hem i talem long saed blong wok blong prij blong hem se: “From wok ya nao, mi mi stap hadwok tumas.” (Kol. 1:29) !I gud yumi save haremgud olsem, from we yumi bin joen fulwan long wok ya we neva bambae yumi mekem bakegen samtaem!—2 Tim. 2:15.