?Olsem Wanem Long Ol Famle Blong Yu?
1 Bighaf long yumi i gat sam famle we oli no stap long trutok. !Yumi wantem tumas we olgeta ya we yumi laekem olgeta tumas oli joen wetem yumi blong wokbaot long rod blong laef! Maet yumi wari moa long saed blong fyuja laef blong olgeta sipos oli prapa famle blong yumi. Nating se yumi bin traehad blong plante yia finis blong pulum olgeta blong intres long trutok, yumi no mas lusum hop.
2 Taem Jisas i stap prij, ‘ol brata blong hem tu, oli no bilif long hem.’ (Jon 7:5) Wan taem, ol famle blong hem oli ting se hem i krangke. (Mak 3:21) Be, Jisas i no lusum hop se bambae oli jenis. Biaen, ol brata blong hem oli bilif long trutok. (Wok 1:14) Brata blong hem Jemes i kam olsem wan lida blong Kristin kongregesen. (Gal. 1:18, 19; 2:9) Sipos yu wantem kasem glad ya we i kamaot taem ol famle oli bilif long trutok, yu no mas stop blong traem mekem olgeta oli kasem save long gud nyus blong Kingdom.
3 Mekem Olgeta Oli Haremgud, No Bitim Mak: Taem Jisas i prij long ol narafala, olgeta we oli lesin long hem oli haremgud, oli no harem se hem i stap daonem olgeta. (Mat. 11:28, 29) Hem i no bitim mak wetem tumas toktok long saed blong ol tijing we ol man oli no naf blong kasem save long olgeta. !Blong mekem ol famle blong yu oli haremgud long wora blong trutok, yu mas givim wan kap nomo long olgeta long wantaem, be no givim wan ful baket! Wan elda we i stap goraon blong visitim ol kongregesen, i talem se: “Olgeta we oli kasem moa frut, hemia olgeta we oli prij smol mo slou long famle blong olgeta, mekem se famle i wantem save moa.” Long rod ya, ol famle tu we oli agensem yumi, maet oli stat askem sam kwestin, mo biaen, maet oli tosta from trutok.—1 Pita 2:2; skelem wetem 1 Korin 3:1, 2.
4 Plante Kristin we oli mared oli gat gudfala risal wetem hasban no waef blong olgeta we i no bilif long trutok, taem oli livim ol buk olbaot long haos, we oli open long wan pej we i save pulum intres blong hasban no waef blong olgeta. Wan sista i mekem olsem, mo tu, hem i mekem Baebol stadi wetem ol pikinini blong hem, taem man blong hem i stap kolosap. Insaed long stadi ya, hem i eksplenem plante samting we oli save givhan long man blong hem. Sam samtaem, hem i askem long man blong hem se: “Mi lanem wan samting long stadi blong mi tede. ?Wanem tingting blong yu long saed ya?” Biaen, hasban blong hem i bilif long trutok.
5 Soem Respek Mo Longfala Tingting: Wan pablisa i talem se, “ol famle tu oli gat raet blong talemaot prapa tingting mo bilif blong olgeta.” Taswe, yumi mas soem respek taem oli talemaot ol tingting blong olgeta, mo taem oli talem stret long yumi blong no toktok wetem olgeta long saed blong trutok. (Ekles. 3:7; 1 Pita 3:15) Taem yumi gat longfala tingting, soem lav, mo lesingud, yumi save lukaot ol gudfala jans blong givim wetnes long fasin we oli no luksave. Longfala tingting olsem i save karem gudfala frut, olsem yumi luk long store blong wan Kristin hasban we waef blong hem i gohed blong mekem nogud fasin long hem blong 20 yia. Taem woman ya i stat blong jenisim fasin blong hem, man ya i talem se: “Mi mi talem tangkyu tumas long Jeova we hem i bin givhan long mi blong gat longfala tingting, from we naoia mi luk frut blong hem: !Waef blong mi i stat finis blong wokbaot long rod blong laef!”
6 ?Olsem wanem long ol famle blong yu? Maet “yu save pulum olgeta oli kam long saed blong Jeova,” from gudfala Kristin fasin blong yu mo from ol prea blong yu.—1 Pita 3:1, 2, futnot, NW.